ខេត្តត្បូងឃ្មុំ ៖ ក្រោមការតាមប្រមាញ់របស់សមត្ថកិច្ច សហការជាមួយនឹងកម្លាំងយោធាជាច្រើននាក់ បានតាមប្រមាញ់ឃាតករឈ្មោះ ភាព ម៉ាយ អាយុ២២ឆ្នាំ នៅភូមិស្រែសៀម ឃុំជីរោទ៍២ ស្រុកត្បូងឃ្មុំ ហើយនៅវេលាម៉ោងប្រមាណ៦និង២០នាទីព្រឹកថ្ងៃទី១៥ ខែមិថុនា ក៏ចាប់ខ្លួនបាននៅភូមិទឹកចេញ ដែលមានចំងាយប្រមាណ៧គីឡូម៉ែត្រពីកន្លែងកើតហេតុ ខណៈជននេះបម្រុងឡើងរថយន្តឈ្នួលគេចខ្លួន ។ ការតាមចាប់ខ្លួន គឺក្រោយពេលជននេះបានកាប់ប្រពន្ធ៤ប៉័ងតោស្លាប់ រួចរត់ទៅចង.កតែមិនបានសម្រេចក៏ព្យា យាមគេចខ្លួន ។
ស្ត្រីឈ្មោះ អួន គឹមលី អាយុ៥៨ឆ្នាំ នៅភូមិទួលវិហារ ឃុំជីរោទ៍ទី២ ស្រុកត្បូងឃ្មុំ ប្រាប់ឲ្យដឹងថា ពេលគាត់នៅក្រោមផ្ទះជាមួយចៅប្រុសអាយុ១ខួប៨ខែ និងកូនស្រីឈ្មោះ ជុំ ធារី អាយុ១៧ឆ្នាំ នាវេលាម៉ោងជាង១រសៀលថ្ងៃទី១៤ ខែមិថុនា ក៏បានឃើញកូនប្រសាប្រុសឈ្មោះម៉ាយ ជិះម៉ូតូកគុប១គ្រឿងមកដល់ ។ គ្រាន់ តែស្ទុះមកដល់ភ្លាម ក៏ស្ទុះមកយកកូនពីក្នុងអង្រឹង ដោយប្រាប់ថាយកទៅលេងនៅផ្ទះឯស្រែសៀម២ទៅ៣ថ្ងៃ លុះឃើញប្រពន្ធក៏ចោទសួរថា ម៉េចក៏រត់ចោលប្តីយ៉ាងដូច្នេះ?
ស្ត្រីជាម្តាយក្មេកនិយាយទៀតថា កូនប្រសាប្រុសនេះបានចោទប្រពន្ធថា «មានប្រុសថ្មីហើយបង្ហោះហ្វេសប៊ុករកប្រុស…ភ្លេចប្តីនិងកូន» និងបានចាប់អូសដៃប្រពន្ធឲ្យឡើងជិះម៉ូតូ និងដាក់កូនតូចនៅលើដី ។ ពេលនោះក៏មានការប្រវាយប្រតប់គ្នា អូសប្រពន្ធបម្រុងយកទៅកាប់នៅឯចង្ក្រានបាយ ដែលឃើញបែបនោះគាត់ជាម្តាយបានយកព្រនង់ឈើ១កាន់នៅក្នុងដៃកំញើញទើបកូនប្រសារូបនេះលែងប្រពន្ធ ។ បន្ទាប់មក កូនប្រសានេះបានរត់ទៅយកកាំប៉័ងតោនៅចង្ក្រានបាយ ហើយគាត់បានឲ្យកូនស្រីរត់ចេញទៅក្រៅមុខផ្ទះ ឯប្តីនាងរត់តាមពីក្រោយបានប្រមាណ៦០ម៉ែត្រ ក៏តាមទាន់កាប់ច្រើនកាំបិតត្រូវកស្លាប់ក្នុងថ្លុកឈាមតែម្តង ។
ស្ត្រីជាម្តាយនិយាយថា មុនកើតហេតុកូនស្រីគាត់ឈ្មោះ ធារី រស់នៅផ្ទះខាងប្តីនៅភូមិស្រែសៀម ឃុំជីរោទ៍ទី២ ដែលប្តីមានមុខរបរបើករថយន្តឲ្យគេ និងសេពគ្រឿងញៀនត្រូវបានសមត្ថកិច្ចឃាត់រថយន្តធ្វើតេស្តទឹកនោមឃើញមានសារធាតុញៀន ។ ដោយមិនចង់ឲ្យមានទោសនោះ ថៅកែបានបង់លុយអស់២.០០០ដុល្លារ និងឱ្យឈប់បើកបររថយន្តតទៅទៀត ។ រីឯប្រពន្ធដោយប្តីធ្វើបាបពេក មិនអាចទ្រាំទ្របានក៏យកកូនស្រីតូចមករស់នៅជាមួយគាត់វិញបាន១ សប្តាហ៍ហើយ លុះនៅថ្ងៃទី១៤ ខែមិថុនា ក៏ត្រូវប្តីមកតាមកាប់ស្លាប់ចោលកូនតូចអាយុជិត២ខួបទៀត ។
លោកវរសេនីយ៍ឯក សួស ស៊ាងលី អធិការនគរបាលស្រុកត្បូងឃ្មុំថ្លែងថា ក្រោយកើតហេតុលោកឧត្តម សេនីយ៍ទោ បែន រ័ត្ន ស្នងការនគរបាលខេត្ត បានបញ្ជាដល់កម្លាំងសមត្ថកិច្ចគ្រប់ច្រកល្ហកតាមប្រមាញ់ចាប់ខ្លួនបុរសជាប្តី ដែលបានក្លាយឃាតកររូបនេះ ។ សមត្ថកិច្ចនគរបាលនិងទាហាន បានដើរតាមរុករកក្នុងព្រៃចេញពីកន្លែងមួយទៅកន្លែងមួយ ហើយទីបំផុតក៏ចាប់ខ្លួនបាន ។ សមត្ថកិច្ចនិយាយថា ក្រោយពីកាប់ប្រពន្ធ៤កាំបិតចំកស្លាប់ហើយ ជននេះមានបំណងរត់ចូលរថយន្តបញ្ចប់ជីវិតតាមក្រោយ តែមិនមានរថយន្តបើកឆ្លងកាត់នៅលើផ្លូវជាតិលេខ៧ទេ ។ លុះពេលរត់គេចខ្លួនចូលទៅក្នុងព្រៃ មានបំណងចងក២ដង តែមិនបានសម្រេចទៀត រហូតមកដល់ព្រឹកព្រលឹមថ្ងៃទី១៥ ខែមិថុនា ក៏ត្រូវសមត្ថកិច្ចចាប់ខ្លួនបានតែម្តង ។
ជនឈ្មោះ ភាព ម៉ាយ ឆ្លើយថា នៅរសៀលថ្ងៃទី១៤ ខែមិថុនា ឆ្នាំ២០១៩ រូបគេបានជិះម៉ូតូមកផ្ទះម្តាយ ក្មេកនៅភូមិទួលវិហារ ។ ពេលមកដល់ ឃើញប្រពន្ធមាននាឡិកា មានកងដៃក៏ឲ្យប្រពន្ធដោះឲ្យម្តាយវិញ ដើម្បីនាំគ្នាជិះម៉ូតូត្រឡប់មកផ្ទះនៅភូមិស្រែសៀម ដែលមានចំងាយពីគ្នាប្រមាណ១គីឡូម៉ែត្រ ហើយខ្លួនក៏មានការប្រចណ្ឌប្រពន្ធផងដែរ ។ ប៉ុន្តែប្រពន្ធមិនព្រមមកតាមទេក៏មានការឈ្លោះប្រកែកប្រវាយប្រតប់គ្នា ទើបរូបគេស្ទុះទៅយកកាំបិតមកដេញកាប់ប្រពន្ធស្លាប់ ហើយមានបំណងធ្វើអត្តឃាតតាមក្រោយតែមិនសម្រេច ៕
ចែករំលែកព័តមាននេះ