រាជធានីភ្នំពេញ ៖ កញ្ញាភឿន ស្រីពៅ គឺជាអ្នកស្មូត្រកំណាព្យយ៉ាងចំណាន ដោយនាងបានហាត់រៀនតាំងពីនៅតូចម៉្លេះ ។ សព្វថ្ងៃនេះ នាងចេះចាំរបៀបស្មូត្របានច្រើនបែប និងទទួលបានការងារច្រើនពីអាជីពមួយនេះតាំងពីតាមពិធីបុណ្យ ផ្សេងៗនៅក្នុងស្រុក និងឧស្សាហ៍បានចេញទៅស្មូត្រនៅក្រៅប្រទេសដូចជាអាមេរិក បារាំង និងអូស្ត្រាលីជាដើម ។
រាជធានីភ្នំពេញ ៖ កញ្ញាភឿន ស្រីពៅ គឺជាអ្នកស្មូត្រកំណាព្យយ៉ាងចំណាន ដោយនាងបានហាត់រៀនតាំងពីនៅតូចម៉្លេះ ។ សព្វថ្ងៃនេះ នាងចេះចាំរបៀបស្មូត្របានច្រើនបែប និងទទួលបានការងារច្រើនពីអាជីពមួយនេះតាំងពីតាមពិធីបុណ្យ ផ្សេងៗនៅក្នុងស្រុក និងឧស្សាហ៍បានចេញទៅស្មូត្រនៅក្រៅប្រទេសដូចជាអាមេរិក បារាំង និងអូស្ត្រាលីជាដើម ។
កញ្ញាភឿន ស្រីពៅ នៅវ័យក្មេង តែចាប់អាជីពជាអ្នកស្មូត្រខុសពីនារីភាគច្រើនដែលចូលចិត្តខាងសំអាងការ កាត់ដេរ ឬជាអ្នកចម្រៀង។ ទោះជាអ្នកខ្លះមិនសូវចូលចិត្ត និងគ្មានចំណូលចិត្តសិល្បៈស្មូត្រកំណាព្យ តែសម្រាប់កញ្ញាភឿន ស្រីពៅ ចាត់ទុកថា ចេះអ្វីត្រូវចេះឱ្យប្រាកដ នោះទើបនាងមានកម្លាំងចិត្តអាចទទួលបានផលល្អ ហើយអាចមានសមត្ថភាពស្មូត្របានជាច្រើនបែប ។ ស្រីពៅ មានឱកាសរកបានប្រាក់ដោយសារទេពកោសល្យស្មូត្រកំណាព្យរបស់ខ្លួននេះ ។
ក្នុងជំនួបផ្ទាល់កាលពីពេល ថ្មីៗនេះនៅទូរទស្សន៍ស៊ីធីអិន ខណៈស្រីពៅ ចូលរួមច្រៀងជាកិត្តិយសបានរៀបរាប់ឱ្យដឹងថា នាងជាអ្នកកំពង់ស្ពឺ និងមានបងប្អូនបង្កើតចំនួន៥នាក់ ចំណែកនាងជាកូនទី៤ ។ លោកឪពុកអ្នកម្តាយរបស់នាងជាកសិករ ។ សព្វថ្ងៃនេះស្រីពៅ ជានិស្សិតនៅសាកលវិទ្យាល័យបញ្ញាសាស្ត្រឆ្នាំទី១ ។
ស្រីពៅរៀបរាប់ថា នៅឆ្នាំ២០០៤ នាងមានអាយុ១៣ឆ្នាំ ចាប់ផ្តើមរៀនស្មូត្រ និងមានឱកាសបង្ហាញទេពកោសល្យតាមរយៈកញ្ចក់ទូរទស្សន៍នៅឆ្នាំ២០១០ ។ នាងរៀនស្មូត្រដំបូងតាមរយៈអង្គការខ្មែរអមតៈ ដែលបង្កើតកម្មវិធីបង្រៀននៅតាមភូមិ។ អំឡុងពេលនោះ នាងនៅក្មេងអត់ដឹងថា ការហាត់រៀនល្អបែបណាទេ គ្រាន់តែដឹងថា ខ្លួនមានសំឡេងអាចប្រើការបានប៉ុណ្ណោះ ។
ជាទូទៅអ្នកចេះស្មូត្រ កញ្ញាភឿន ស្រីពៅ ប្រាប់ថា ត្រូវមានចំណុចសំខាន់បំផុតគឺសំឡេង ល្អ និងចេះអត់ធ្មត់ ដោយសារតែសិល្បៈស្មូត្រត្រូវការភាពស្មឹងស្មាធិ៍ ទាល់តែត្រូវការភាពព្យាយាមខ្ពស់ទើបអាចរៀនជំនាញនេះបាន ។ ស្មូត្រជាធម្មតាខ្មែរយើងយល់ថា សម្រាប់តែពិធីបុណ្យសពប៉ុណ្ណោះ តែការណ៍ពិតស្មូត្រសម្រាប់ពិធីជាច្រើនតាំងពីពិធីបុណ្យបច្ច័យបួន បុណ្យនៅតាមវត្តអារាម ។ លើសពីនេះ គេអាចស្មូត្រប្រៀនប្រដៅដល់យុវជនតាមកម្មវិធី ផ្សេងៗ ។
របៀបស្មូត្រខ្មែរយើងមានដល់ទៅ៦០បែបឯណោះ ហើយស្រីពៅ ចេះចាំទាំងអស់ដោយសារតែនាងហាត់រៀនអត់ចោលមួយណាឡើយតាំងពីនៅខេត្តកំពង់ស្ពឺ រហូតមកទល់នឹងពេលនេះ ។ ការស្មូត្រនេះនាងមានស្នាដៃច្រើនដែលបង្ហាញពីសមត្ថភាព និងចែករំលែកដល់មហាជន ក៏ដូចជាពិភពលោកដូចជាបានទៅស្មូត្រនៅអាមេរិកចំនួន៥ដង មិនមែនតែជនជាតិខ្មែរទេ ជាតិសាសន៍គេដទៃបានឮ និងភ្ញាក់ផ្អើល ។ ក្រោយមកនាងបានទៅអូស្ត្រាលី២ដង តៃវ៉ាន់ និងឥណ្ឌា ។ ទាំងនេះជាអ្វីដែលនាងទទួលបានពីទេពកោសល្យស្មូត្រកំណាព្យ ។
កញ្ញាភឿន ស្រីពៅ រំលឹកថា អ្នកដែលហាត់រៀនស្មូត្រជំនាន់នាងមាន១៤នាក់ តែពួកគេរៀនបានតិចប៉ុណ្ណោះក៏ឈប់ទៅ ។ ការរៀនស្មូត្រមិនសូវមានអ្នកចាប់អារម្មណ៍ទេ ដោយសារតែគេយល់ថា រៀនអត់ប្រយោជន៍ តែការគិតរបស់គេផ្ទុយស្រឡះពីនាង ។ ស្រីពៅនិយាយថា «ចំពោះ ខ្ញុំៗគិតថា ចេះអីចេះឱ្យប្រាកដ នោះពិតជាអាចរស់នៅរកសុីចិញ្ចឹមខ្លួនបាន ។ ខ្ញុំសព្វថ្ងៃបម្រើការងារជាមួយវិស័យស្មូត្រ និងពុទ្ធសាសន៍ និងបម្រើការងារនៅទូរទស្សន៍ MYTV និង CTN ក្នុងកម្មវិធីវេទិកាអ្នកបួស និងនាទីវត្តអារាមរាល់ថ្ងៃសៅរ៍-អាទិត្យ វេលាព្រឹក ។ លើសពីនោះនាងខ្ញុំបានបង្ហាត់ស្មូត្រក្នុងអង្គការមួយដល់ក្មេងចំនួន៣០នាក់ ។ ស្នាដៃពិតមួយកើតចេញពីការព្យាយាម ។ ខ្ញុំពិតជាមានមោទនភាពដែលខ្លួនឯងចេះស្មូត្រ និងអាចជួយដល់សង្គមទៀត»៕
ចែករំលែកព័តមាននេះ