រាជធានីភ្នំពេញ ៖ សិប្បកម្មកែច្នៃកម្ទេចក្រណាត់មួយកន្លែងដែលមានទីតាំងស្ថិតក្នុងភូមិកំបូល សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ ត្រូវបានអាជ្ញាធរខណ្ឌរកឃើញថាបានធ្វើអាជីវកម្មអត់ច្បាប់ មិនតែប៉ុណ្ណោះបានបង្កផលប៉ះពាល់ដល់សុខភាពប្រជាពលរដ្ឋ និងបរិស្ថានធ្ងន់ធ្ងរ។
បន្ទាប់មកនៅវេលាម៉ោង៩ព្រឹកថ្ងៃទី១២ ខែឧសភា ឆ្នាំ២០១៩ កម្លាំងគណៈបញ្ជាការឯកភាពរបស់ខណ្ឌដឹកនាំដោយលោក ប៉ាង លីដា អភិបាលរងខណ្ឌពោធិ៍សែនជ័យនិង លោកសើន កែវវណ្ណធី មេបញ្ជាការរងកងរាជអាវុធហត្ថខណ្ឌ បានចុះបិទផ្អាកអាជីវកម្មជាបណ្ដោះអាសន្នផងដែរ។
សមត្ថកិច្ចបានឲ្យដឹងថា ម្ចាស់សិប្បកម្មខាងលើឈ្មោះ ឆាយ យ៉ូវផាយ ភេទប្រុស អាយុ៤៧ឆ្នាំ ជាជនជាតិចិន ហើយសិប្បកម្មមួយនេះបានកែច្នៃកម្ទេចក្រណាត់ឲ្យក្លាយទៅជាជ័រនាំចេញទៅកាន់ក្រៅប្រទេស ប៉ុន្តែពុំដឹងថាជ័រដែលបំឡែងចេញពីកម្ទេចក្រណាត់នេះយកទៅលើការផលិតអ្វីបន្តទៀតឡើយ។
តាមប្រភពដដែលបានបន្តថា ថៅកែជនជាតិចិនខាងលើបានបើករកស៊ីមុខរបរមួយនេះដោយគ្មានច្បាប់ឡើយ ហើយបានបង្កឲ្យមានការប៉ះពាល់ដល់សុខភាពប្រជាពលរដ្ឋនិងបរិស្ថានយ៉ាងខ្លាំង ព្រោះកម្ទេចក្រណាត់និងផ្សែងភ្លើងឡបានហើរពាសវាលពាសកាល មិនតែប៉ុណ្ណោះមានធុំក្លិនឈ្ងៀមថែមទៀតផង។
តាមប្រភពដដែលបានបន្តថា កន្លងមកផលប៉ះពាល់ខាងលើបានធ្វើឲ្យអ្នកភូមិនោះមានការក្ដៅក្រហាយគ្រប់ៗគ្នា ហើយក្រោយមកមន្ទីរបរិស្ថានរាជធានីភ្នំពេញក៏បានចេញលិខិតផ្អាកនិងផាកពិន័យម្ដងរួចមកហើយ ប៉ុន្តែម្ចាស់ទីតាំងមួយនេះមិនព្រមផ្អាក និងមិនអនុវត្តន៍តាមឡើយ ហើយបានធ្វើឲ្យប្រជាពលរដ្ឋមានការក្ដៅក្រហាយជាបន្តទៀត ដោយសារតែការផ្គើនបែបនេះ ទើបពេលនេះកម្លាំងគណៈបញ្ជាការឯកភាពខណ្ឌសម្រេចចុះទៅបិទផ្អាកអាជីវកម្មនោះជាបណ្ដោះអាសន្ន។
តាមប្រភពដដែលបានបន្តទៀតថា បន្ទាប់មកសមត្ថកិច្ចបានធ្វើការដកហូតយកសម្ភារៈនៅក្នុងសិប្បកម្មនោះមួយចំនួនមានដូចជារថយន្តកូរ៉េចំណុះ១តោនកន្លះមួយគ្រឿង ពណ៌ស ពាក់ស្លាកលេខ ភ្នំពេញ ២AC-១២៤៧ , ជ័រកែច្នៃរួចចំនួន១០បាវ , ក្រណាត់មិនទាន់កែច្នៃចំនួន២០បាវ និងជញ្ជីងថ្លឹង១គ្រឿង។
ក្រោយមកសមត្ថកច្ចបានយកសម្ភារទាំងនោះទៅរក្សាទុកនៅសាលាខណ្ឌពោធិ៍សែនជ័យ ហើយមិនបានឃាត់ខ្លួនម្ចាស់សិប្បកម្មនេះទេ ប៉ុន្តែប្រសិនបើនៅតែផ្គើនទៀតនោះនឹងត្រូវចាត់វិធាការតាមច្បាប់ជាមិនខានឡើយ៕
ចែករំលែកព័តមាននេះ