រាជធានីភ្នំពេញ ៖ កម្មវិធីអាណាចក្រតារាឆ្នាំ២០១៣ បានរៀបចំពិធីប្រកាសជ័យលាភីទាំងបីប្រភេទគឺផ្នែកប្រជាប្រិយភាព ទេពកោសល្យ និងផ្នែកកិត្តិយសអមតៈ កាលពីរាត្រីថ្ងៃទី១៥ សីហា នៅសាលមហោស្រពកោះពេជ្រ រាជធានីភ្នំពេញ ។ ពានរង្វាន់ចំនួន៣៣បានផ្តល់ជូនដល់សិល្បករ-សិល្បការិនីនារាត្រីនោះ ។
ពានរង្វាន់ដែលសិល្បករ-សិល្បការិនីទទួលបានរួមមាន ៖
១-ពានរង្វាន់ពិធីការិនី និងពិធីករទូរទស្សន៍ឆ្នើមប្រចាំឆ្នាំ២០១៣ បានទៅលើអ្នកនាង យុគ ចិន្តា និងលោក ជា វិបុល ។
២-ពានរង្វាន់រឿងភាគល្អប្រចាំឆ្នាំ២០១៣បានទៅលើរឿង កែវភ្នែក និងរឿង ពន្លកស្នេហ៍ក្បែរជាយដែន ។
៣-ពានរង្វាន់កម្មវិធីតន្ត្រីកម្សាន្តផ្សាយផ្ទាល់ល្អជាងគេប្រចាំឆ្នាំ២០១៣ បានទៅលើលោក អឹុង រដ្ឋា ហៅទុយ ។
៤-ពានរង្វាន់ក្រុមកំប្លែងល្បីប្រចាំឆ្នាំ២០១៣បានទៅលើក្រុមកំប្លែងនាយពែកមី ។
៥-ពានរង្វាន់ពិធីការិនី និងពិធីករដែលមានប្រជាប្រិយភាពប្រចាំឆ្នាំ២០១៣បានទៅលើ កញ្ញា ហ៊ិន ច័ន្ទនិរ័ត្ន និងតាប៊ុយ ។
៦-ពានរង្វាន់តារាកិត្តិយសអមតៈប្រចាំឆ្នាំ២០១៣មានចំនួន១០ពាន បានទៅលើអ្នកស្រី ឌី សាវ៉េត, លោកជំទាវ ច័ន្ទ ធី, លោក ហួរ ឡាវី, លោក ប្រាក់ ប៊ន (ប្រធានមន្ទីរវប្បធម៌ និងវិចិត្រសិល្បៈខេត្តតាកែវ), អ្នកគ្រូ អ៊ាង ម៉ាឡៃ, លោក ម៉ៅ អាយុទ្ធ, លោក អុឹម ចំរើន, លោក ទិត្យ ថាវរិទ្ធ, អ្នកស្រី ប៉ន ស្រីម៉ៅ ។
៧-ពានរង្វាន់តារាជោគជ័យរបស់ ABC គឺលោក អ៊ុន សុធា ។
៨-ពានរង្វាន់អ្នកនិពន្ធបទភ្លេងឆ្នើមគឺលោក សួន ពិសិដ្ឋ ។
៩-ពានរង្វាន់អ្នកនិពន្ធទំនុកច្រៀងឆ្នើមប្រចាំឆ្នាំគឺ អ្នកស្រី ប៉ុល ពិសី ។
១០-ពានរង្វាន់ក្រុមតន្ត្រីករសម័យឆ្នើមប្រចាំឆ្នាំគឺក្រុមចចកសមុទ្រ ។
១១-ពានរង្វាន់ក្រុមតារាចម្រៀងឆ្នើមប្រចាំឆ្នាំគឺក្រុមយូធូភា ។
១២-ពានរង្វាន់តារាចម្រៀងបទប្រជាប្រិយឆ្នើម គឺអ្នកស្រី ហ៊ឹម ស៊ីវន ។
១៣-ពានរង្វាន់តារាចម្រៀងស្រីប្រុសសំឡេងពីរោះគឺ អ្នកស្រី មាស សុខសោភា និងលោក ខេមរៈ សិរីមន្ត ។
១៤-ពានរង្វាន់តួឯកស្រីឆ្នើមប្រចាំឆ្នាំគឺ អ្នកនាង កែវ ពេជ្រពិសី និងលោក ប៉ែន ចំរ៉ុង ។
១៥-ពានរង្វាន់តួសំខាន់ឆ្នើមគឺ អ្នកនាង ស្វែង សុជាតា និងលោក ជា សំណាង ។
១៦-ពានរង្វាន់អ្នកដឹកនាំរឿងឆ្នើមគឺ អ្នកស្រី ពាន់ ភួងបុប្ផា ។
១៧-ពានរង្វាន់ភាពយន្តលេចធ្លោគឺរឿង កុមារីអាយុ២៥ឆ្នាំ ។
១៨-ពានរង្វាន់តារាសម្តែងស្រីប្រុសដ៏មានប្រជាប្រិយគឺកញ្ញា ព្រីម លីហ្សា និងលោក ប៉ែន ចំរ៉ុង ។
ក្នុងឱកាសនោះលោក អ៊ុក សុជាតិ រដ្ឋលេខាធិការក្រសួងវប្បធម៌ និងវិចិត្រសិល្បៈមានប្រសាសន៍ថា កម្មវិធីអាណាចក្រតារាឆ្នាំ២០១៣នេះ បានបោះជំហានទៅកាន់ភាពជោគជ័យក្នុងឆ្នាំទី២របស់ខ្លួនមួយកម្រិតទៀត បន្ទាប់ពីសម្រេចបានសមិទ្ធផលយ៉ាងគាប់ប្រសើរកាលពីឆ្នាំ ២០១២កន្លងទៅ ។ បេសកកម្មនៃកម្មវិធីអាណាចក្រតារា បានរួមចំណែកយ៉ាងធំធេងក្នុងការអភិរក្ស លើកតម្កើង និងលើកកម្ពស់សិល្បៈវប្បធម៌ជាតិឱ្យកាន់តែរស់រវើក និងរីកចម្រើនប្រកបដោយចីរភាព ។
តាមរយៈកម្មវិធីអាណាចក្រតារា ឃើញថាប្រជាពលរដ្ឋខ្មែរចាប់ផ្តើមយល់ច្បាស់ពីតម្លៃនៃវិស័យសិល្បៈជា បណ្តើរៗ ពោលគឺបានយល់ពីតម្លៃពិតប្រាកដនៃសិល្បៈរបស់ជាតិសមស្របទៅនឹងតម្លៃសាកលដែលសិល្បៈគឺជានិមិត្តរូបបង្ហាញពីវប្បធម៌ និងវឌ្ឍនភាពរបស់ជាតិសាសន៍ នីមួយៗនៅជុំវិញពិភពលោក ។ លោក ជី សិលា នាយកប្រតិបត្តិក្រុមហ៊ុន Sabay ដែលបានឧបត្ថម្ភធំដល់កម្មវិធីអាណាចក្រតារា មានប្រសាសន៍ថា គុណភាពនៃសិល្បៈកម្ពុជាគេមើលឃើញជា បណ្តើរៗ ហើយថាកំពុងបោះជំហានទៅមុខកៀកនឹងបទដ្ឋានអន្តរជាតិ ហើយសិល្បករត្រូវបានផ្តល់តម្លៃយ៉ាងធំធេងពីកម្មវិធីនេះ ។
ការចូលរួមឧបត្ថម្ភកម្មវិធីក្រុមហ៊ុន Sabay មិនមែនដើម្បីស្វែងរកប្រាក់ចំណេញទេ ជាក់ស្តែងចំណូលទាំងអស់ដែលទទួលពីការផ្ញើសារគាំទ្រតារាតាម SMS និងពីការលក់សំបុត្រចូលទស្សនាកម្មវិធីប្រគល់ពាន គឺត្រូវប្រគល់ជូនសមាគមសិល្បករខ្មែរ ។ លោក Roland Bala អគ្គនាយករោងចក្រផលិតស្រាបៀរកម្ពុជាបានថ្លែងថា លើកនេះជាឆ្នាំទី ២ហើយដែលស្រាបៀរ ABC Extra Stout បានចូលរួមឧបត្ថម្ភកម្មវិធីអាណាចក្រតារា ។
អ្វីដែលធ្វើឱ្យក្រុមហ៊ុនបន្តបេសកកម្មឧបត្ថម្ភកម្មវិធីអាណាចក្រតារាឆ្នាំនេះទៀតព្រោះក្រុមហ៊ុនបានមើលឃើញពីបេសកកម្មរបស់អាណាចក្រតារាយ៉ាងច្បាស់ថាបានចូលរួមលើកស្ទួយ និងអភិវឌ្ឍសិល្បៈខ្មែរ និងបានដើរតួជាស្ពានភ្ជាប់ការទាក់ទងរវាងសិល្បករ និងប្រិយមិត្តគាំទ្ររបស់ពួកគេ ដើម្បីសម្តែងពីទឹកចិត្តស្រឡាញ់ គាំទ្រ និងផ្តល់ឱកាសដល់សិល្បករខ្មែរពង្រឹង និងអភិវឌ្ឍសមត្ថភាពរបស់ខ្លួនឆ្ពោះទៅ កាន់ស្តង់ដាអន្តរជាតិ ៕
ចែករំលែកព័តមាននេះ