យោងតាមក្បួនតម្រាហោរាសាស្ត្របានគន់គូរថា កាលបើលោកអ្នកយល់សប្តិឃើញដូចប៉ុន្មានចំណុចខាងក្រោមនេះ នឹងមានសញ្ញាល្អដែលនឹងនាំមកនូវសិរីសួស្តី សុភមង្គល ព្រោះត្រូវបានដំឡើងយសស័ក្តិ ឋានៈ តួនាទី រួមនឹងគិតកិច្ចការអ្វីៗបានសម្រេចដូចក្តីប្រាថ្នា ។ បណ្តាសញ្ញាសុបិនទាំងនោះគឺៈ…
យោងតាមក្បួនតម្រាហោរាសាស្ត្របានគន់គូរថា កាលបើលោកអ្នកយល់សប្តិឃើញដូចប៉ុន្មានចំណុចខាងក្រោមនេះ នឹងមានសញ្ញាល្អដែលនឹងនាំមកនូវសិរីសួស្តី សុភមង្គល ព្រោះត្រូវបានដំឡើងយសស័ក្តិ ឋានៈ តួនាទី រួមនឹងគិតកិច្ចការអ្វីៗបានសម្រេចដូចក្តីប្រាថ្នា ។ បណ្តាសញ្ញាសុបិនទាំងនោះគឺៈ
១-យល់សប្តិឃើញបង់សំណាញ់ អូសអួន ឬស្ទូចត្រី ទោះជាបានត្រីក្តី មិនបានត្រីក្តីតាមក្បួនតម្រាទស្សន៍ទាយថា លោកអ្នកគង់នឹងបានសម្រេចនូវលាភជោគ ពិសេសត្រូវបានដំឡើងបុណ្យស័ក្តិក្នុងពេលដ៏ឆាប់ខាងមុខនេះ ។
២-សុបិនឃើញបានទទួលទានស្ករ ឬទឹកឃ្មុំ នឹងមានសិរីសួស្ដី មានយសស័ក្ដិដ៏ឧត្តុង្គឧត្តម ។
៣-យល់សប្តិឃើញឡើងលើផ្នូកខ្សាច់ នឹងបានជាមន្ត្រី ។
៤-សុបិនឃើញបានស៊ីក្បាលមនុស្ស នឹងបានឡើងជាចៅហ្វាយស្រុកឬចៅហ្វាយខេត្តពោរពេញទៅដោយឥទ្ធិពលអំណាចដ៏មហាសាល ។
៥-ឃើញឡើងទៅបរិភោគបាយនៅលើកំពូលភ្នំ នឹងមានគេនាំទ្រព្យមកឱ្យ និងបានយសស័ក្ដិធំ។
៦-យល់សប្តិឃើញដើរលើទឹក ឬហោះកាត់ទឹក កាត់ព្រៃប្រឹក្សា ឬមួយក៏បានឆ្លងកាត់ទឹកតាមមធ្យោបាយអ្វីមួយក្ដី មិនថាទូក សាឡាង ឬស្ពាន ទោះនឹងគិតការអ្វីៗក៏បានសម្រេចដូចក្តីប្រាថ្នា និងបានឡើងបុណ្យស័ក្តិជាប្រធានក្នុងអង្គភាព ជាក់ជាមិនខាន ។
៧-ឃើញគេលើកឱ្យជិះដំរី ជិះសេះ ឬជិះលើគ្រែស្នែង ឬក៏ជិះរទេះនឹងមានគេជួយឧបត្ថម្ភ ជ្រោងឱ្យបានឡើងយសស័ក្ដិ ។
៨-សុបិនឃើញរាហូលេបព្រះចន្ទ យក្សស៊ីមនុស្ស ពស់លេបកង្កែប ទោះនឹងទៅទីណាៗ នឹងបានជ័យជម្នះ បានឋានៈខ្ពង់ខ្ពស់ ។
៩-ឃើញគេអារសាច់ខ្លួនឯង នឹងបានឡើងជាមន្ត្រី ។
១០-យល់សប្តិឃើញដេកនៅចំកណ្ដាលដីនឹងមានអំណាចផ្សាយទៅក្នុងទីទាំងពួង។
១១-ឃើញជិះរទេះសេះ ឬរទេះគោ អ្នកធំនឹងឱ្យយសស័ក្ដិដ៏ឧត្តម ។
១២-សុបិនឃើញបានឡើងដើមឈើធំ នឹងមានលាភដ៏ប្រសើរ ឬក៏នឹងបានជាមន្ត្រីធំ ។
១៣-ឃើញមិត្តសម្លាញ់ស្លាប់ ទោះនឹងគិតការអ្វីនឹងបានសម្រេចដូចបំណង ។
១៤-បានឡើងលើដំបូល ឡើងភ្នំ នឹងបានឡើងយសស័ក្ដិ។
១៥-ឡើងផ្ទះថ្មីនឹងបានយសស័ក្ដិខ្ពង់ខ្ពស់ និងមានអំណាចច្រើន ។
១៦-គេបក់ផ្លិតឱ្យ នឹងបានធ្វើជាចៅហ្វាយនាយ ។
១៧-បានដើរឆ្លងស្ពានទៅរហូតមិនត្រឡប់ក្រោយ ទោះគិតការអ្វីៗ គង់នឹងបានសម្រេចគ្រប់ប្រការ ។
១៨-បានចូលជ្រកក្រោមដើមឈើធំនឹងបានជាធំក្នុងអង្គភាព ។
១៩-យល់សប្តិឃើញជិះគ្រែស្នែង មានគេសែង ទោះនឹងប៉ងធ្វើការអ្វីនឹងបានសម្រេចដូចក្ដីប្រាថ្នា។
កាលបើលោកអ្នកយល់សប្តិឃើញដូចការពោលមកនេះ បើទោះជាមិនឆុតមួយរយភាគរយក៏គង់ត្រឹមត្រូវភាគច្រើន ។
ចែករំលែកព័តមាននេះ