វិនិយោគិន​ខេត្តកំពត​ត្រៀម​ស្វាគមន៍​វិនិយោគិន​ចិន


រាជធានី​ភ្នំពេញ ៖ បន្ទាប់​ពី​វិនិយោគិន​បាន​សម្រុក​ទៅ​វិនិយោគ​នៅ​ក្នុង​ខេត្ត​ព្រះ​សីហ​នុ​មួយរ​យៈមក ពេល​នេះ​ចិន​បាន​បង្វែរ​មុខព្រួញ​ងាក​មក​អភិវឌ្ឍន៍​នៅ​តំបន់​មាត់សមុទ្រ​នៅ​ក្នុង​ខេត្តកំពត និង​កែប​ជា​បណ្ដើរ​ៗ​វិញ​ដែល​ធ្វើ​ឲ្យ​សកម្មភាព​អចលនទ្រព្យ ជា​ពិសេស​ការ​ទិញ​លក់​ដីធ្លី​នៅ​ខេត្ត​ទាំង​ពីរ​នេះ មាន​ភាព​មមា​ញឹក​ឡើង ហើយ​អាជ្ញាធរ និង​វិនិយោគិន​ក្នុង​មូលដ្ឋាន ក៏​បាន​ត្រៀមខ្លួន​រួច​ជា​ស្រេច​ក្នុង​ការ​រង់ចាំ​ទទួល​ស្វាគមន៍​ផង​ដែរ ។

បើ​តាម​លោក កែវ សុ​ជាតិ នាយក​គ្រប់គ្រង​ក្រុមហ៊ុន​អចលនទ្រព្យ ប្ល៊ូ​ស្តារ កំពត រៀល​អុ​ី​ស្ទេ​ត បាន​ឲ្យ​ដឹង​ថា ជា​ការ​ពិត​ណាស់ បន្ទាប់​ពី​ការ​វិនិយោគ​នៅ​ខេត្ត​ព្រះ​សី​ហនុមាន​កំណើន​ខ្លាំង ពេល​នេះ​គម្រោង​អភិ​វឌ្ឍន៍​អចលនទ្រព្យ មួយ​ចំនួន​ក៏​ត្រូវ​បាន​ហៀរ​មក​ដល់​ខេត្តកំពត ដែល​ជា​តំបន់​មាត់សមុទ្រ​ដូច​គ្នា​ដែរ ។

លោក​បន្ដ​ថា គម្រោង​វិនិយោគ​របស់​ចិន ទៅ​លើ​ខេត្តកំពត ក៏​មិន​ខុស​គ្នា​ពី​ខេត្ត​ព្រះ​សីហ​នុ​ប៉ុន្មាន​ដែរ ។ ម្យ៉ាង​ទៀត ដោយ​មើលឃើញ​ថា កំណើន​វិនិយោគិន​ចិន មក​កាន់​ខេត្តកំពត​កាន់តែ​ច្រើន​នោះ អាជ្ញាធរ និង​វិនិយោគិន​ក្នុងស្រុក ក៏​ដូច​ជា​ភ្នាក់ងារ​អចលនទ្រព្យ​នៅ​ក្នុង​ខេត្តកំពត បាន​ត្រៀម​សម្រាប់​ទទួល​បម្រើសេវា ក៏​ដូច​ជា​សម្រួល​ដល់​វិនិយោគិន​ចិន​មក​អភិវឌ្ឍន៍​ក្នុង​ខេត្ត​មាត់សមុទ្រ​មួយ​នេះ​ផង​ដែរ ។

លោក​បន្ត​ថា ក្រោយ​ពេល​មាន​ដំណឹង​អភិវឌ្ឍន៍​ក្នុង​ខេត្តកំពត ក៏​បាន​ធ្វើ​ឲ្យ​តម្លៃ​ដីធ្លី ក្នុង​ខេត្ត​នេះ​កើនឡើង​មួយ​កម្រិត​ដែរ ពោល​គឺ​ចាប់តាំងពី​ដើមឆ្នាំ​២០១៨​មក​ម្ល៉េះ ហើយ​រហូត​មក​ដល់​ពេល​នេះ ក៏​នៅ​តែ​កើន​ឡើង​ដែរ តែ​ក្នុង​កម្រិត​តិចតួច ដោយសារ​តែ​វា​បាន​ឡើង​ដល់​កម្រិត​មួយ​កាលពីដើម​ឆ្នាំ​។ លោក​ថា ៖« ដី​នៅ​តំបន់​សក្ដានុពល​ដូច​ជា មាត់​ព្រែក​បាន​ឡើង​ដល់​រាប់រយ​ដុល្លារ​អា​មេ​រិ​ក ក្នុង​១​ម៉ែត្រការ៉េ ខណៈ​កាល​មុន តម្លៃ​របស់​វា​ហាក់​នៅ​ទាប ហើយ​ក៏​មិនសូវ​មាន​អ្នក​ចាប់អារម្មណ៍​ដែរ » ។

លោក សុខ គែន ភ្នាក់ងារ​អចលនវត្ថុ​ប្រចាំ​ខេត្តកំពត​ក៏​បាន​ដឹងផង​ដែរ​ថា បច្ចុប្បន្ន​នេះ មាន​គម្រោង​ធំ​ៗ​មួយ​ចំនួន គឺជា​ការ​វិនិយោគ​របស់​វិនិយោគិន​ចិន ក្នុង​នោះ​ដូច​ជា គម្រោង​តំបន់​សេដ្ឋកិច្ច​ពិសេស​នៅ​ភាគ​ខាងលិច​ទីរួមខេត្ត​កំពត​ជាដើម ហើយ​គម្រោង​នេះ​ដែរ ក៏​បាន​ត្រៀមខ្លួន​ក្នុង​ការ​អភិវឌ្ឍ ព្រោះ​ចិន​បាន​ឲ្យ​វិនិយោគិន​ខ្មែរ​ដើរ​ទិញ​ដី​រួចរាល់​ហើយ​ផង​ដែរ និង​រង់​ចាំតែ​អនុវត្ត​នៅ​ពេល​ឆាប់​ៗ​នេះ​ប៉ុណ្ណោះ ។

លោក​បន្ដ​ថា ៖« ជំហាន​ដំបូង​របស់​ចិន​ក្នុង​ការ​អភិវឌ្ឍ​គម្រោង​នេះ គឺ​ប្រមូល​ទិញ​ដី​ដែល​ពី​មុន​មិន​ប្រើ​ការ ដើម្បី​ទុក​នៅ​ពេល​បាន​ទទួល​អាជ្ញាប័ណ្ណ​វិនិយោគ​ជា​ផ្លូវការ​ពី​រាជរដ្ឋាភិបាល​កម្ពុជា »​។

លោក​បន្ត​ថា សម្រាប់​វិនិយោគិន​ក្នុងស្រុក​ជា​ពិសេស​នៅ​ក្នុង​មូលដ្ឋាន​ខេត្តកំពត​ផ្ទាល់​តែ​ម្ដង គេ​សង្កេត​ឃើញ​ពួក​គេ​មាន​ភាព​មមាញឹក ក្នុង​ការ​ជួយ​ទិញ​ដីធ្លី​ឲ្យ​ចិន និង​ខ្នះខ្នែង​ទាំង​ផ្លូវច្បាប់​សម្រាប់​គម្រោង​របស់​ចិន ។ ម្យ៉ាងទៀត ដោយសារ​តែ​កំណើន​វិនិយោគិន​ចិន​មក​កាន់​ខេត្តកំពត​កាន់តែ​ច្រើន​នេះ​ហើយ បាន​ធ្វើ​ឲ្យ​តម្លៃ​ដីធ្លី កើន​ឡើងជា​បន្តបន្ទាប់ ។

លោក សុខ គែន បន្ថែម​ថា ៖« តាម​ការ​សង្កេត មិនយូរ​នោះ​ទេ អាច​ត្រឹម​២​ឬ​៣​ឆ្នាំ​ទៀត ក្នុង​ខេត្តកំពត​នឹង​អភិវឌ្ឍន៍​ប្លែក​ច្រើន ព្រោះ​គម្រោង​ខ្លះ​កំពុង​ចាប់ផ្ដើម និង​ខ្លះ​ទៀត​នឹង​ចាប់ផ្ដើម​នៅ​ឆ្នាំ​ក្រោយ ។ អីចឹង ត្រឹមតែ​២​ឬ​៣​ឆ្នាំ​ទៀត គម្រោង​ទាំងនោះ​នឹង​ត្រូវ​បញ្ចប់ ឬ​ជិត​បញ្ចប់ ដែល​ធ្វើ​ឲ្យ​វិស័យ​អចលនទ្រព្យ ក្នុង​ខេត្ត​នេះ​កាន់តែ​មាន​តម្លៃ​ខ្ពស់ »​។

ប៉ុន្មាន​ឆ្នាំ​ចុង​ក្រោយ​នេះ ការ​ធ្វើ​ពាណិជ្ជកម្ម​ទ្វេភាគី​ពី​ចិន​មក​កម្ពុជា​មានការ​រីក​ចម្រើន​យ៉ាង​ខ្លាំង​។ ប្រទេស​ចិន​បាន​ក្លាយជា​ដៃគូ​ពាណិជ្ជកម្ម​ដ៏​សំខាន់ និង​ជា​ប្រទេស​មាន​ទុន​វិនិយោគ​ធំ​ទី​១​នៅ​កម្ពុជា ។ គិត​ត្រឹម​រយៈពេល​ជាង​ពាក់កណ្ដាល​ឆ្នាំ​នេះ ចិន​បាន​បោះទុន​ប្រមាណ​៥​ពាន់​លាន​ដុល្លារ​អា​មេ​រិ​ក ក្នុង​នោះ​ការ​វិនិយោគ​លើ​វិស័យ​អចលនទ្រព្យ​មាន​ទំហំ​ច្រើន​ជាងគេ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ