ខេត្តកណ្ដាល ៖ រដ្ឋបាលខេត្តកណ្ដាល បានរៀបចំពិធីប្រណាំងទូកងរយៈពេលពីរថ្ងៃ ចាប់ពីថ្ងៃ២៣-២៤ តុលា ដើម្បី ត្រៀមទៅប្រណាំង ថ្នាក់ជាតិ នៅមុខព្រះបរមរាជវាំងនាខែវិច្ឆិកាខាងមុខនេះ។
កាលពីរសៀលថ្ងៃទី២៣ តុលា លោកបណ្ឌិត ម៉ៅ ភិរុណ អភិបាលខេត្តកណ្ដាល បានអញ្ជើញ បើកការប្រណាំងទូកងនេះជាផ្លូវការ ដោយមានការអញ្ជើញចូលរួមពី មន្ត្រី នានាជាច្រើនទៀត។
លោកអភិបាលខេត្តបានថ្លែងថា ការប្រារព្ធពិធីប្រណាំងទូកថ្ងៃនេះ ក្នុងគោលបំណង អបអរសារទរ បុណ្យចេញព្រះវស្សាផង និងជាការសាកល្បងសមកំលាំង កីឡាករ កីឡាការិនី ដើម្បី រកទូកងមានល្បឿនលឿនត្រៀមទៅប្រណាំងខ្នាតជាតិនៅមុខព្រះបរមរាជវាំង រយៈពេលបីថ្ងៃ ក្នុងពិធី បុណ្យអុំទូក អកអំបុក និងសំពះព្រះខែ នាខែវិច្ឆិកាខាងមុខនេះ។
ទូកងចូលរួមអុំប្រណាំងមកពីតាមបណ្ដាស្រុក ក្នុងខេត្តកណ្ដាល និងមកពីរាជធានីភ្នំពេញ និងខេត្តកំពង់ចាម មានចំនួន៥៩ទូក មានទូកអុំខ្នាតអន្តរជាតិចំនួន១៨ទូក ទូកអុំផ្កាចារ១៨ទូក និងទូកអុំខ្នាតវែងចំនួន២៣ទូក។
លោកអភិបាលខេត្ត បានក្រើនរំលឹកដល់កីឡាករ កីឡាការិនីទាំងអស់ត្រូវមានសាមគ្គីភាពគ្នា គោរពវិន័យនិងខិតខំ ប្រឹងប្រែងអោយអស់ពីកំលាំងកាយចិត្ត ដើម្បីរកសមត្ថភាព ទូកឈ្នះ ពិតប្រាកដត្រៀមទៅអុំប្រណាំងនៅមុខព្រះបរមរាជវាំង ក្នុងព្រះរាជពិធីបុណ្យអុំទូក អកអំបុក និងសំពះព្រះខែនាពេលខាងមុខ
នេះ៕
ចែករំលែកព័តមាននេះ