ក្រោយពីការចុះបង្ក្រាបរបស់អាជ្ញាធរពាក់ព័ន្ធទៅលើអាជីវករលក់ដុំ លក់រាយបារីក្លែងក្លាយនៅទីតាំងផ្សារធំថ្មី ផ្សារកណ្ដាល រោងចក្រផលិតបារីក្លែងក្លាយក្នុងសង្កាត់គោកឃ្លាង និងក្នុងក្រុងតាខ្មៅដែលមានម្ចាស់ជាជនជាតិចិនកាលពីថ្មីៗកន្លងទៅ គេសង្កេតឃើញការតាំងលក់បារីក្លែងក្លាយពីសំណាក់អាជីវករមានការធ្លាក់ចុះគួរឲ្យកត់សម្គាល់។ តែទោះជាយ៉ាងនេះក្ដី បារីក្លែងក្លាយ គឺនៅតែជាបញ្ហាចោទ និងកំពុងវាយលុកទីផ្សារបារីស្របច្បាប់នៅកម្ពុជាដដែល។
លោក ម៉ាធូ ណូម៉ាន់ ប្រធានសមាគមឧស្សាកម្មថ្នាំជក់កម្ពុជា បានមានប្រសាសន៍ថា «យោងតាមអនុសាសន៍របស់លោក មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយក្នុងកម្មវិធី (Thank You RF3 World) កាលពីថ្ងៃទី ០៩ កញ្ញា កន្លងទៅ ។
លោកបន្ដថា ដែលបានប្រកាសអំពីបេសកម្ម និងយុទ្ធនាការក្ដៅរបស់អង្គភាពលើប្រតិបត្តិការគ្មានការលើកលែងចំពោះចំពោះផលិតផលក្លែងក្លាយ ផលិតផលគេចពន្ធ ផលិតផលគ្មានការត្រួតពិនិត្យចុះបញ្ជីត្រឹមត្រូវ គឺយើងកាន់តែមានជំនឿចិត្តយ៉ាងមុតមាំខ្លាំងឡើងក្នុងការដំណើរប្រយុទ្ធប្រឆាំងនឹងបារីក្លែងក្លាយ និងគេចពន្ធតាមរយៈកិច្ចសហការជាមួយនឹងអាជ្ញាធរពាក់ព័ន្ធ ។
លោកបន្ដថា «ពិសេសក្រសួងមហាផ្ទៃក្នុងការបន្តចុះអនុវត្តច្បាប់ និងបង្ក្រាបបារីក្លែងក្លាយ និងខុសច្បាប់ ដែលផ្ដល់នូវផលប៉ះពាល់អវិជ្ជមានជាច្រើនចំពោះចំណូលពន្ធរដ្ឋ ក៏ដូចជាអនាគតនៃអាជីវកម្មក្រុមហ៊ុនគោរពច្បាប់ដូចជាយើងខ្ញុំ។ សមាគមនឹងសហការធ្វើការចុះបង្ក្រាបទាំងរោងចក្រផលិត និងអ្នកលក់ដុំ អ្នកលក់រាយទាំងអស់នៅទូទាំងប្រទេសចំពោះការផលិត និងតាំងលក់បារីក្លែងក្លាយ»។
គួរបញ្ជាក់ដែរថា ក្រោមប្រតិបត្តិការចុះបង្ក្រាបបារីក្លែងក្លាយនាត្រីមាសចុងក្រោយនេះ អាជ្ញាដកហូតបារី ៥៥៥ ក្លែងក្លាយពីអាជីវករផ្សារធំថ្មី និងផ្សារកណ្ដាលជាង ១០០០ សុងដែលនឹងត្រូវកម្ទេចចោលក្នុងពេលឆាប់ៗ បើអាជ្ញាធររកឃើញថា ពិតជាក្លែងក្លាយប្រាកដមែន។
រសម្រេចបិទទ្វារដំណើរការរោងចក្រផលិតបារីគ្មានច្បាប់អនុញ្ញាត និងក្លែងក្លាយរបស់ជនជាតិចិនពីរកន្លែង ក្នុងសង្កាត់គោកឃ្លាង និងក្រុងតាខ្មៅ ត្រូវបានសមត្ថកិច្ចរកឃើញបារីក្លែងក្លាយជាច្រើនសុង ម៉ាក Marlboro, L&M និង ESSE ហើយម្ចាស់រោងចក្រជាជនជាតិចិនពីរនាក់កំពុងស្ថិតក្រោមការឃុំខ្លួនតាមនីតិវិធីរបស់តុលាការខេត្តកណ្ដាល។
យោងតាមច្បាប់ស្ដីពីម៉ាក ពាណិជ្ជនាម និងអំពើនៃការប្រកួតប្រជែងមិនស្មោះត្រង់ អ្នកនាំចូល អ្នកផលិត និងអ្នកលក់ផលិតផលក្លែងម៉ាក គឺសុទ្ធតែមានទោសប្រឈមនឹងការជាប់ពន្ធធនាគារពី ១ឆ្នាំ ទៅ ៥ឆ្នាំ និងពិន័យជាប្រាក់ដូចគ្នា ដូច្នេះ សូមអំពាវនាដល់បងប្អូនអាជីវករលក់ដុំ និងលក់រាយបារីទាំងអស់ មេត្តាកុំទទួលទិញ និងបញ្ឈប់រាល់ការតាំងលក់បារីក្លែងក្លាយទៀត ជៀសវាងជាប់ទោសទណ្ឌ ក៏ដូចជាការរឹបអូសយកដូចករណីចុះបង្ក្រាបពីសំណាក់អាជ្ញាធរកាលពីប៉ុន្មានខែកន្លងទៅ»។
ការតាំងលក់បារីក្លែងក្លាយ គឺជាកាយវិការចូលរួមលើកតម្កើនការចរាចរផលិតផលក្លែងក្លាយ ហើយថែមទាំងនាំមកនូវការខាតបង់ និងជាប់ទោសទណ្ឌដល់ខ្លួនទៀតផង ហើយលក្ខណៈសម្គាល់បឋមរបស់បារីក្លែងក្លាយ គឺគ្មានបិតតែមប្រិ៍អាករ គ្មានសារព្រមានសុខភាពជារូបភាព និងជាអក្សរខ្មែរ តែអាចមានសារព្រមានជាភាសាបរទេស៕ ដោយសហការ
ចែករំលែកព័តមាននេះ