ខេត្តបាត់ដំបង ៖ សេចក្តីរាយការណ៍បឋមឱ្យដឹងថា សពកុមារាអាយុ១២ឆ្នាំម្នាក់ ដែលគេប្រទះឃើញបន្សល់តែគ្រោងឆ្អឺង នៅក្នុងចំការដំឡូងមីមួយកន្លែងស្រុកកំរៀង កាលពីសប្ដាហ៍មុនទំនងអាចស្លាប់ដោយសារកើតខ្យល់.គរ ។ នេះបើតាមការសន្និដ្ឋានរបស់ក្រុមមន្ត្រីជំនាញ ដែលបានចុះធ្វើការស្រាវជ្រាវ និងស៊ើបអង្កេតយ៉ាងហ្មត់ចត់ជាថ្មី កាលពីថ្ងៃទី២១ សីហា ដែលធ្វើឡើងតាមលក្ខណៈបច្ចេកទេសវិទ្យាសាស្ត្រ។
លោកឧត្តមសេនីយត្រី ជេត វណ្ណនី ស្នងការរងខេត្ត បានប្រាប់កោះសន្តិភាពនៅព្រឹកថ្ងៃទី២២ សីហា នេះថា ដោយសារមានភាពមិនច្បាស់លាស់អំពីការសន្និដ្ឋាន លើការស្លាប់របស់កុមារាអាយុ១២ឆ្នាំម្នាក់ នៅស្រុក
កំរៀង ដែលបន្សល់ទុកតែគ្រោងឆ្អឹង ទើបលោកស្នងការខេត្ត ស្នើដល់មន្ត្រីអង្គការអង្គភាពការពារកុមារ (CPU) ដែលជាដៃគូឱ្យជួយសហការជាមួយមន្ត្រីការិយាល័យបច្ចេកទេសនិងវិទ្យាសាស្ត្រ នៃស្នងការដ្ឋានខេត្តចុះស្រាវជ្រាវ និងបើកការស៊ើបអង្កេតជាថ្មី ដើម្បីស្វែងរកមូលហេតុពិត ដែលកុមារារូបនេះស្លាប់ចោលឆ្អឹងក្នុងព្រៃ ។
លោកស្នងការរងបន្តថា មន្ត្រីជំនាញបានធ្វើការពិនិត្យទីតាំងកើតហេតុ ពិនិត្យលើគ្រោងឆ្អឹងសាកសពដែលបានដាច់រប៉ាត់រប៉ាយនៅក្នុងចំការដំឡូងមី ហើយថែមទាំងបានធ្វើការស្រាវជ្រាវសួរនាំយ៉ាងល្អិតល្អន់បំផុតអំពីប្រវត្តិជនរងគ្រោះជាមួយអាណាព្យាបាល និងអ្នកស្រុកផងដែរ ។
ដឹងខ្លះៗអំពីប្រវត្តិកុមាររងគ្រោះ មុនពេលស្លាប់តាមរយៈការបំភ្លឺសាក្សី និងអាណាព្យាបាលជនរងគ្រោះដូច្នេះថា «កុមាររងគ្រោះជាអ្នកសេពថ្នាំញៀន ។ ជារឿយៗ កុមារានេះតែងដើរ ឬដេកក្រៅផ្ទះ។ កន្លែងដែលគេស្នាក់នៅបណ្ដោះអាសន្នតាមរោងចំការអ្នកស្រុក ដែលបោះបង់នៅឆ្ងាយពីភូមិ ។
អាណាព្យាបាលបាននិយាយដែរថា កូនប្រុសគាត់តែងដើរបាត់ពីផ្ទះយ៉ាងតិច២ទៅ៣ថ្ងៃ ទើបចូលផ្ទះ
ម្ដង ហើយគាត់ក៏ទទួលស្គាល់ថា កូនប្រុសរូបនេះប្រើប្រាសថ្នាំញៀន ថែមទាំងដើរលួចបាយតាមរោង
ចំការអ្នកភូមិ ដើម្បីចំអែតក្រពះមួយពេលៗដែរ ។ ហើយបើតាមការបំភ្លឺនានាពីអ្នកភូមិវិញ កុមារានេះ
ហាក់គ្មានគោលដៅច្បាស់លាស់ អំពីការដើរហើរតាមព្រៃ ឬតាមចំការ ។
បើយោងលើការស្រាវជ្រាវរបស់ការិយាល័យជំនាញ ដែលមានកិច្ចសហការពីមន្ត្រីអង្គភាពការពារកុមារ (CPU) បានចុះធ្វើការងារយ៉ាងល្អិតល្អន់ផងនោះ ក្រុមមន្ត្រីជំនាញបានធ្វើការសន្និដ្ឋានថា កុមារានោះអាចស្លាប់ដោយសារ «ខ្យល់គរ»។
ចែករំលែកព័តមាននេះ