រាជធានីភ្នំពេញ ៖ កូនប្រុស២នាក់របស់លោកឧកញ៉ា ឌួង ងៀប ដែលកាចសាហា.វខ្វះសេចក្តីថ្លៃថ្នូរត្រូវបានសមត្ថកិច្ចចាប់ខ្លួនបញ្ជូនទៅតុលាការ និងត្រូវបញ្ជូនបន្តទៅដាក់ពន្ធនាគារព្រៃស ជាបណ្តោះអាសន្នបានម្នាក់រង់ចាំបើកសវនាការនៅថ្ងៃណាមួយ ។ ចំណែកម្នាក់ទៀតបញ្ជូនមកសាលាដំបូងនៅព្រឹកនេះ ។
រាជធានីភ្នំពេញ ៖ កូនប្រុស២នាក់របស់លោកឧកញ៉ា ឌួង ងៀប ដែលកាចសាហាវខ្វះសេចក្តីថ្លៃថ្នូរត្រូវបានសមត្ថកិច្ចចាប់ខ្លួនបញ្ជូនទៅតុលាការ និងត្រូវបញ្ជូនបន្តទៅដាក់ពន្ធនាគារព្រៃស ជាបណ្តោះអាសន្នបានម្នាក់រង់ចាំបើកសវនាការនៅថ្ងៃណាមួយ ។ ចំណែកម្នាក់ទៀតបញ្ជូនមកសាលាដំបូងនៅព្រឹកនេះ ។
ក្នុងចំណោមបងប្អូន២នាក់ ម្នាក់ឈ្មោះឌួង គឹមឡុង ភេទប្រុស អាយុ១៧ឆ្នាំ ជាសិស្ស ស្នាក់នៅផ្ទះលេខ១៥បេ ផ្លូវលេខ១០៥ សង្កាត់បឹងព្រលឹត ខណ្ឌ៧មករា ត្រូវសមត្ថកិច្ចកងរាជអាវុធហត្ថរាជធានីភ្នំពេញចាប់ខ្លួនបញ្ជូនទៅតុលាការ។ ចំណែកឈ្មោះឌួង ឧត្តមឆវិន ហៅឆាយ បានរត់គេចខ្លួន តែសមត្ថកិច្ចអះអាងថាមានបទបញ្ជា និងដីការបស់តុលាការឱ្យតាមចាប់ឈ្មោះឌួង ឧត្តមឆវិន ហៅឆាយ ឱ្យខាងតែបាន និងត្រូវចាប់បាននៅរសៀលថ្ងៃទី១៨ មេសា ។
រឿងរ៉ាវបណ្តាលឱ្យសមត្ថកិច្ចកងរាជអាវុធហត្ថត្រូវកាច់បំបាក់ធ្មុងកូនអ្នកមានល្បីឈ្មោះក្នុងរាជធានីភ្នំពេញនេះគឺ កាលពីវេលាម៉ោងប្រមាណ១ និង៤០នាទីរំលងអធ្រាត្រ ឈានចូលថ្ងៃទី១៤ មេសា មានករណីទាស់គ្នាមួយរវាងភាគីម្ខាងមានកាំភ្លើងខ្លីគឺក្រុមឌួង ឆាយ និងភាគីម្ខាងទៀតមានតែដៃទទេ បណ្តាលឱ្យមានរបួសស្នាមយ៉ាងធ្ងន់ធ្ងរ ។ ហេតុការណ៍នេះបានកើតឡើងនៅភោជនីយដ្ឋានហ្គេឡាងឡារ៉ង់៩ ស្ថិតនៅតាមបណ្តោយផ្លូវត្រសក់ផ្អែម សង្កាត់បឹងកេងកងទី១ ខណ្ឌចំការមន ។
ប្រភពព័ត៌មានពីសមត្ថកិច្ចកងរាជអាវុធហត្ថរាជធានីភ្នំពេញបានឱ្យដឹងថា នៅហាងហ្គេឡាងឡារ៉ង់៩ មានជម្លោះគ្នាគឺភាគីម្ខាងដែលគេស្គាល់ច្បាស់នោះ មានឈ្មោះឌួង ឧត្តមឆវិន ហៅឆាយ និងប្អូនប្រុសឈ្មោះឌួង គឹមឡុង ព្រមទាំងអង្គរ័ក្ស និងមិត្តភក្តិសរុប៧ទៅ៨នាក់។ រីឯម្ខាងទៀតមានឈ្មោះមុំ ឌីណា ដែលជាជនរងគ្រោះត្រូវបែកក្បាល ត្រូវបានក្រុមគ្រួសារនាំទៅសង្គ្រោះនៅក្រៅប្រទេស និងមិត្តភក្តិ៣ទៅ៤នាក់ ។ ក្រុមទាំងពីរអង្គុយតុផ្សេងគ្នា ពេលនោះក្រុមរងគ្រោះបានអង្គុយជជែកគ្នាលេង បន្តិចក្រោយមកពួកគេបានស្រែកកុម្មង់ម្ហូបដែលមានសម្លេងឮខ្លាំងៗម្តងជាពីរដង ។ ប្រហែលជាដោយសារគេស្រែកខ្លាំងៗស្រាប់តែឈ្មោះឌួង ឧត្តមឆវិន បានងើបពីតុរបស់ខ្លួនដើរសំដៅទៅរកតុឈ្មោះមុំ ឌីណា ហើយបានសួរក្រុមមុំ ឌីណា ថា «អាណាឡូឡា» ជាមួយនោះដែរលោកឆាយបានទះតុ១ដៃ បណ្តាលឱ្យជ្រុះកែវ និងចានចង្កឹះធ្លាក់រាយប៉ាយបែកខ្ចាយភ្ញាក់ផ្អើលពេញហាង ។
មន្ត្រីកងរាជអាវុធហត្ថបានឱ្យដឹងថា ពេលឃើញលោកឆាយបញ្ចេញកំហឹងខ្លាំងដូច្នោះ ក៏មានការទាស់ពាក្យសម្តីគ្នារវាងក្រុមទាំងពីរ ។ ដោយលោកឌួង ឆាយ ធ្លាប់តែជាជើងខ្លាំងខាងបង្ក្រាបគេ បានដកកាំភ្លើងខ្លីម៉ាករ៉ូឡូ ពណ៌ស វាយក្បាលលោកមុំ ឌីណា ជាច្រើនកន្លែង បណ្តាលឱ្យរងរបួសធ្ងន់ធ្ងរ ព្រមទាំងបញ្ជាឱ្យអង្គរក្ស២នាក់ចាប់អូសលោកមុំ ឌីណា នាំចេញពីក្នុងហាងបម្រុងរុញចូលរថយន្តរបស់គេ ដោយមានពាក្យសម្តីគម្រាមថា យកវាទៅសម្លាប់ចោល ។ ពេលនោះលោកមុំ ឌីណា បានរើប្រមះរួច ក៏រត់ចូលក្នុងហាងវិញ និងបានទៅសំងំក្នុងបន្ទប់ទឹកដោយដាក់គន្លឹះពីក្នុងជាប់ ដែលពេលនោះជាសុវត្ថិភាពរបស់លោកមុំ ឌីណា ។ ហេតុការណ៍នោះបានធ្វើឱ្យមានការភ្ញាក់ផ្អើលរន្ធត់ដល់ភ្ញៀវតុផ្សេងទៀតមានភាពតក់ស្លុតគ្រប់គ្នា ។ បន្ទាប់ពីកើតមានអំពើហិង្សាយ៉ាងព្រៃផ្សៃរួចមក លោកឌួង ឆាយ បានកែនគ្នាឡើងរថយន្តទៅកាន់សណ្ឋាគារមួយស្ថិតនៅក្បែរសណ្ឋាគារកាំបូឌីយ៉ាណា ដែលក្រុមគេបានជួលស្នាក់នៅទីនោះ ។ ដោយឃើញទង្វើក្រុមលោកឌួង ឆាយ រត់ចោលហេតុការណ៍ និងមិននៅទទួលខុសត្រូវនូវអ្វីដែលគេបានប្រព្រឹត្តលើលោកមុំ ឌីណា ដែលអះអាងថា ជាភាគីជនរងគ្រោះ បានទាក់ទងប្តឹងទៅសមត្ថកិច្ចកងរាជអាវុធហត្ថរាជធានីភ្នំពេញ ដើម្បីឱ្យជួយចាត់ការរឿងនេះ ។ ក្រោយពីទទួលបានពាក្យបណ្តឹងទាំងយប់ លោកឧត្តមសេនីយ៍ទោ យ៉ា គឹមអុី មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានបញ្ជាទៅលោកវរសេនីយ៍ទោ អ៊ុង ដារ៉ាវុធ អនុប្រធានមន្ទីរស្រាវជ្រាវយុតិ្តធម៌ ទទួលការងារព្រហ្មទណ្ឌនៃទីបញ្ជាការកងរាជអាវុធហត្ថរាជធានី បានចុះទៅសហការជាមួយកងរាជអាវុធហត្ថខណ្ឌ ដូនពេញដោយមានការដឹកនាំពីសំណាក់លោក ហៀង សុភ័ក្រ ព្រះរាជអាជ្ញារងអមសាលាដំបូងរាជធានីភ្នំពេញ។ ដោយមានកិច្ចសហប្រតិបត្តិការតាមចាប់ខ្លួនលោកឌួង ឆាយ និងបក្ខពួកក្នុងសណ្ឋាគារនៅពេលយប់បែបនេះក្រុមសមត្ថកិច្ចបានត្រៀមចាំខាងក្រៅ ។ លុះដល់ពេលទៀបភ្លឺ ក្រុមលោកឌួង ឆាយ បានរំដោះគ្នាចេញ បម្រុងបំភាន់ភ្នែកសមត្ថកិច្ចដោយឱ្យឈ្មោះឌួង គឹមឡុង ជាប្អូនបើករថយន្តខ្លួនម៉ាកមែរសឺដេស៥៥០ ពណ៌ស អត់មានពាក់ស្លាកលេខចេញមុន។ បន្ទាប់មកប្រពន្ធលោកឌួង ឆាយ បើករថយន្តពីក្រោយម៉ាកអិុនភីនីធី គុយអិុច៥៦ ពណ៌ខ្មៅ លាយលឿង ។ តែរថយន្តទាំងពីរគ្រឿងនេះត្រូវបានសមត្ថកិច្ចរបស់លោកអ៊ុង ដារ៉ាវុធ បានឃាត់នៅជិតមន្ទីររដ្ឋសភាថ្មី ហើយបាននាំទាំងរថយន្តនិងមនុស្សទៅកាន់ទីបញ្ជាការកងរាជអាវុធហត្ថក្រុង ។ ពេលនាំខ្លួនឈ្មោះ ឌួង គឹមឡុង និងភរិយាលោក ឌួង ឆាយ ទៅដល់ទីបញ្ជាការ សមត្ថកិច្ចបានឆែកឆេរក្នុងរថយន្តរបស់ពួកគេ រកឃើញមានកាំភ្លើងវែងអាកាស្វាយបត់១ដើម កាំភ្លើងខ្លីម៉ាករ៉ូឡូ១ដើម គ្រាប់១៨ ដែលជាអាវុធគ្មានច្បាប់អនុញ្ញាតអ្វីទាំងអស់ ។ បន្ទាប់មកប្រពន្ធលោក ឌួង ឆាយ ត្រូវឱ្យវិលទៅផ្ទះព្រោះមិនពាក់ព័ន្ធ គឺបានឃាត់ខ្លួនលោកឌួង គឹមឡុង ។ ចំណែកលោក ឌួង ឆាយ ត្រូវបានគេរាយការណ៍ថា ខណៈពេលនោះបានលបចេញតាមផ្លូវក្រោយដោយមានមនុស្សនៅចាំរំដោះ ។
បើទោះបីជាយ៉ាងណាលោក ឌួង ឆាយ ត្រូវមានប្រតិកម្មពីថ្នាក់លើ ឱ្យតាមចាប់ខាងតែបាន មិនតែប៉ុណ្ណោះច្រកទ្វារទាំងឡាយទាំងអន្តរជាតិ ទាំងច្រករបៀងត្រូវចាំស្ទាក់ចាប់ បើច្រកណាធ្វេសប្រហែសឱ្យលោកឌួង ឆាយ ចេញទៅស្រុកក្រៅបាននិងមានបញ្ហា ។
លោកឌួង ឧត្តមឆវិន ហៅឆាយ និងប្អូនប្រុស ឌួង គឹមឡុង នៅថ្ងៃទី១៧ មេសា ត្រូវបានតំណាងអយ្យការធ្វើការចោទប្រកាន់ជាផ្លូវការហើយ មានចំនួន៣បទល្មើស
១-ហិង្សាដោយចេតនាមានស្ថានទម្ងន់ទោស
២- ប្រើប្រាស់អាវុធដោយគ្មានការអនុញ្ញាត
និង៣-ធ្វើឱ្យខូចខាតដោយចេតនាទេលើទ្រព្យសម្បត្តិអ្នកដទៃ ។
ក្រោយពីតំណាងអយ្យការធ្វើការចោទប្រកាន់ជាផ្លូវការ សំណុំរឿងបានធ្លាក់ដល់ដៃលោកជា សុខហៀង ចៅក្រមស៊ើបសួរ ។ បន្ទាប់ពីសាកសួរជនជាប់ចោទឈ្មោះឌួង គឹមឡុង ចប់មក លោកចៅក្រមសម្រេចចេញដីកាឱ្យឃុំខ្លួនដាក់ពន្ធនាគារជាបណ្ដោះអាសន្ន ។
ចំណែកនៅរសៀលថ្ងៃទី១៨ មេសា នេះដែរមានប្រភពព័ត៌មានថា លោកឧកញ៉ា ឌួង ងៀប ដែលជាឪពុកបាននាំខ្លួនលោកឌួង ឧត្តមឆវិន ហៅឆាយ ដែលត្រូវជាកូន និងដែលសមត្ថកិច្ចកំពុងស្វែងរកចាប់នោះ មកប្រគល់ខ្លួនឱ្យនគរបាលរាជធានីដើម្បីចាត់ការតាមផ្លូវច្បាប់ ។
គួរបញ្ជាក់ផងដែរថា លោកឌួង ឆាយ កូនប្រុសលោកឧកញ៉ាឌួង ងៀប មានឈ្មោះបោះសំឡេងខាងបាញ់បោះសេរីនៅពេលយប់ក្នុងរាជធានី ដែលការបាញ់បោះពីសំណាក់លោកឌួង ឆាយ មិនមានសមត្ថកិច្ចណាហ៊ានប៉ះពាល់ទេ ព្រោះហាក់ដូចជាខ្លាចអំណាចនរណាម្នាក់ ប៉ុន្តែពេលនេះលោកឪពុកលែងគាំទ្រហើយ ថែមទាំងបានសហការជាមួយសមត្ថកិច្ចនាំកូនមកប្រគល់ឱ្យច្បាប់វិនិច្ច័យទោសថែមទៀតដែលបញ្ជាក់ថា ពេលនេះលោកឪពុកប្រគល់កូនឱ្យច្បាប់ប្រដៅវិញហើយ ។
ព័ត៌មានពីសាលាដំបូងរាជធានីឱ្យដឹងថា នគរបាលរាជធានីមានបំណងបញ្ជូនលោកឌួង ឧត្ដមឆវិន ហៅឆាយ មកសាលាដំបូងនៅយប់ថ្ងៃទី១៨ មេសា ដើម្បីជូនអយ្យការចាត់ការតាមច្បាប់ ។ ប៉ុន្ដែដោយសារជ្រុលម៉ោងទៅហើយ មិនអាចបន្ដទទួលយកមកចាត់ការបាន ទើបសាលាដំបូងផ្ញើលោកឆាយ ទុកឱ្យដេកនៅជាមួយនគរបាលរាជធានីមួយយប់សិន ហើយត្រូវបញ្ជូនមកសាលាដំបូងព្រឹកនេះ ។ ចំណែកលោកប្អូនប្រុសឈ្មោះ ឌួង គឹមឡុង បានបញ្ជូនទៅទុកនៅពន្ធនាគារព្រៃសរួចហើយ នារសៀលថ្ងៃទី១៨ មេសា ៕
ចែករំលែកព័តមាននេះ