រាជធានីភ្នំពេញ៖ តន្ត្រីករវីយូឡុងលោក អ៊ុំ ដរ៉ា មានប្រវត្តិច្រើនក្នុងការជួយអ្នកនាងឈួន សុវណ្ណឆៃ ឲ្យក្លាយជាតារាជោគជ័យម្នាក់មកទល់នឹងពេលនេះ ។ ដោយសារបែបនេះហើយអ្នកនាងឈួន សុវណ្ណឆៃ មិនភ្លេចគុណលោកអ៊ុំ ដរ៉ា ទេ ។
កាលពីពេល ថ្មីៗកន្លងមក អ្នកនាងឈួន សុវណ្ណឆៃវ បានយកប្រាក់ទៅប្រគល់ជូនដល់លោកអ៊ុំ ដរ៉ា ដល់កន្លែងព្យាបាលឆ្អឹងនៅក្រុងតាខ្មៅ ។ គ្រានោះអ្នកនាងឈួន សុវណ្ណឆៃ និយាយថា«បើគ្មានលោកអ៊ុំ ដរ៉ា ទេនាងខ្ញុំប្រហែលជាគ្មានសំណាងបានក្លាយជាតារាចម្រៀងមកទល់ពេលនេះឡើយ ដោយសារតែក្នុងពេលនោះ នាងខ្ញុំគ្រាន់តែជាតារាមួយរូបដែលគ្មានខ្នងបង្អែក។ ក្នុងអំឡុងឆ្នាំ១៩៩៩ នាងខ្ញុំបានឡើងមកពីខេត្តបន្ទាយមានជ័យ ហើយប្រលងក្នុងកម្មវិធីមួយនៅប៉ុស្ដិ៍លេខ៥ តែដោយសារតែលោកអ៊ុំ ដរ៉ា ជាតន្ត្រីករផ្នែកវីយូឡុង ស្រឡាញ់ពេញចិត្ត ក៏ជ្រើសឲ្យចូលច្រៀងក្នុងក្រុមក្រុមយោធាភិរម្យ ដែលក្នុងពេលនោះទទួលបានប្រាក់ខែក្នុងមួយខែប៉ុន្មានម៉ឺនរៀល និងអង្ករ២០គីឡូ។
ខ្ញុំបានទទួលការបង្ហាត់បង្ហាញ ពីសិល្បករជើងចាស់រូបនេះយ៉ាងច្រើន ទាំងការបង្រៀនច្រៀង និងជួយឲ្យមានហាងច្រៀងបន្ថែម ដើម្បីឲ្យនាងខ្ញុំអាចឈរជើងបាននៅរាជធានីភ្នំពេញ។ អ្វីដែលខ្ញុំនាងខ្ញុំចងចាំមិនភ្លេច គឺលោកអ៊ុំ ដរ៉ា បានអង្វរឲ្យក្រុមតន្ត្រីដំឡើងអង្ករឲ្យនាងខ្ញុំបានមួយខែដល់មួយបាវ និងបន្ថែមប្រាក់ខែ ដើម្បីឲ្យនាងខ្ញុំអាចបន្តរស់នៅភ្នំពេញបាន ក្នុងពេលនាងខ្ញុំពិបាកខ្លាំង ហើយគិតចង់ទៅរស់នៅខេត្តបន្ទាយមានជ័យវិញ »។
អ្នកនាងឈួន សុវណ្ណឆៃ រំលឹកទៀតថា លោកអ៊ុំ ដារ៉ា បាននិពន្ធបទថ្មីឲ្យនាង៣បទ ដើម្បីបានច្រៀងជាបទចម្រៀងផ្ទាល់ខ្លួន ។ ក្រោយពេលថតចប់បទចម្រៀងទាំងនោះមិនបានចេញលក់ ហើយមិនដឹងថាតើ លោកអ៊ុំ ដរ៉ា រក្សាទុក ឬបាត់បង់ទៅហើយទេ ។
អ្នកនាងឈួន សុវណ្ណឆៃ អំពាវនាវដល់អ្នកសិល្បៈផ្សេងទៀតដែលធ្លាប់ទទួលបានការជួយជ្រោមជ្រែងពីលោកអ៊ុំ ដរ៉ា គួរយកចិត្តទុកដាក់ចំពោះគាត់ផង ។ អ្នកនាងសុវណ្ណឆៃ ថាលោក អ៊ុំ ដរ៉ា មានគុណច្រើនណាស់ដល់តារាចម្រៀងមួយចំនួន ក្នុងពេលដែលលោកនៅប្រកបអាជីពជាតន្ត្រីករ ជាអ្នកនិពន្ធ និងជាអ្នកបង្ហាត់សិស្ស។
កញ្ញាសម ថារ័ត្ន កូនស្រីពៅរបស់លោកអ៊ុំ ដរ៉ា ជាកីឡាការិនីផ្នែកល្បុកត្តោ បានថ្លែងបញ្ជាក់ថា ឳពុករបស់នាងត្រូវដឹកយកទៅព្យាបាលឆ្អឹងជាមួយគ្រូខ្មែរប្រមាណជិតមួយខែមកហើយ បន្ទាប់ពីគាត់បាក់ឆ្អឹងក្រោយពេលគ្រោះថ្នាក់ ហើយគ្រួសារមិនមានលទ្ធភាពវះកាត់ ។ ពេលនេះបើទោះជាវះកាត់ក៏ហួសពេលដែរ ។ ឳពុកនាងពិការមួយរយៈមកហើយ ចំណែកផ្នែកស្មារតីក៏ចាំខ្លះភ្លេចខ្លះ មិនសូវដូចមុនទេ ៕
ចែករំលែកព័តមាននេះ