បាងកក ៖ ជំងឺគ្រោះថ្នាក់សរសៃឈាមក្នុងខួរក្បាល ឬហៅថា Stroke គឺជាការបាត់បង់មុខងារខួរក្បាលយ៉ាងឆាប់រហ័សដោយសារការរំខានក្នុងការផ្គត់ផ្គង់ឈាមដែលនាំអុកស៊ីសែន និងសារធាតុចិញ្ចឹមទៅខួរក្បាល ហើយវាអាចធ្វើឲ្យអ្នកជំងឺបាត់បង់ជីវិត ឬមានពិការភាពអស់មួយជីវិត ។…
បាងកក ៖ ជំងឺគ្រោះថ្នាក់សរសៃឈាមក្នុងខួរក្បាល ឬហៅថា Stroke គឺជាការបាត់បង់មុខងារខួរក្បាលយ៉ាងឆាប់រហ័សដោយសារការរំខានក្នុងការផ្គត់ផ្គង់ឈាមដែលនាំអុកស៊ីសែន និងសារធាតុចិញ្ចឹមទៅខួរក្បាល ហើយវាអាចធ្វើឲ្យអ្នកជំងឺបាត់បង់ជីវិត ឬមានពិការភាពអស់មួយជីវិត ។
លោកវេជ្ជបណ្ឌិត ឈីរ៉ាផាត់ អ៊ុកាឈុក ( Chirapat Ukachoke ) ដែលជាប្រធានផ្នែកប្រព័ន្ធប្រសាទ នៃមន្ទីរពេទ្យ Phyathai 3 Hospital មានប្រសាសន៍ថា ជំងឺគ្រោះថ្នាក់សរសៃឈាមខួរក្បាល គឺមានសញ្ញាជាច្រើនដែលបងប្អូនអាចធ្វើការកត់សម្គាល់បានថា តើអ្នកប្រហែលជាមានជំងឺដាច់សរសៃឈាមខួរក្បាលឬអត់? លោកនិយាយថា សញ្ញាដែលថាអ្នកប្រហែលជាមានជំងឺដាច់សរសៃឈាមខួរក្បាលគឺមានដូចជា ស្ពឹក ឬខ្សោយនៃមុខ ដៃ ឬជើង ជាពិសេសនៅផ្នែកម្ខាងនៃរាងកាយ។ ការយល់ច្រឡំភ្លាមៗ មានបញ្ហានិយាយមិនចេញ ឬស្តាប់មិនយល់ មានបញ្ហាក្នុងការមើលឃើញ ឬមើលឃើញព្រាលៗក្នុងភ្នែកមួយ ឬភ្នែកទាំងសងខាង ការឈឺក្បាលខ្លាំងៗភ្លាម និងមានបញ្ហាក្នុងការដើរ បាត់បង់តុល្យភាពនៃការដើរ ។
លោកវេជ្ជបណ្ឌិតបញ្ជាក់ថា សញ្ញាធ្ងន់ធ្ងរមួយចំនួនទៀតគឺមានការធ្លាក់ចុះមុខ, ភាពខ្សោយរបស់ដៃជើងមួយចំហៀងខ្លួន និងការលំបាកក្នុងការនិយាយ ។ លោកដុកទ័របន្ថែមទៀតថា ជំងឺគ្រោះថ្នាក់សរសៃឈាមក្នុងខួរក្បាល អាចបណ្តាលមកពីសរសៃឈាមដែលស្ទះ ឬការដាច់ចេញពីសរសៃឈាម។ មនុស្សមួយចំនួនអាចមានការរំខានបណ្តោះអាសន្ននៃលំហូរឈាមទៅខួរក្បាល (ការវាយប្រហារកង្វះឈាមបណ្តោះអាសន្ន ឬដែលមិនបណ្តាលឱ្យមានការខូចខាតជាអចិន្ត្រៃយ៍)។
លោកបានផ្តល់យោបល់ថា «ដោយសារជំងឺគ្រោះថ្នាក់សរសៃឈាមក្នុងខួរក្បាល ជាប្រភេទជំងឺធ្ងន់ធ្ងរ ដែលអាចបណ្តាលឲ្យអ្នកជំងឺបាត់បង់ជីវិត ឬក៏ពិការភាពបាន ដូច្នេះចាំបាច់បំផុត ប្រសិនបើអ្នកកត់សម្គាល់ឃើញមានសញ្ញាខាងលើ អ្នកត្រូវរហ័សទៅមន្ទីរពេទ្យឲ្យបានលឿន។ ជាពិសេសសម្រាប់អ្នកដែលមានហានិភ័យខ្ពស់នៃការកើតជំងឺគ្រោះថ្នាក់សរសៃឈាមខួរក្បាល ដូចជាអ្នកកើតទឹកនោមផ្អែម ជំងឺបេះដូង ជាដើមត្រូវមានលេខមន្ទីរពេទ្យជំនាញខាងគ្រោះថ្នាក់សរសៃឈាមក្នុងខួរក្បាល ដើម្បីទំនាក់ទំនងឆាប់រហ័ស » ។ គ្រោះថ្នាក់សរសៃឈាមខួរក្បាលតម្រូវឱ្យមានការសង្គ្រោះបន្ទាន់។ ដូច្នេះនៅពេលមានសញ្ញាព្រមានដូខខាងលើ គេគួរឆាប់នាំអ្នកជំងឺមកកាន់មន្ទីរពេទ្យជាបន្ទាន់ដើម្បីចៀសវាងការស្លាប់និងពិការភាព។
លោកវេជ្ជបណ្ឌិត ច័ន្ទ វិជ្ជា ឯកទេសផ្នែកប្រសាទសាស្ត្រនៃមន្ទីរពេទ្យកាល់ម៉ែត បានឲ្យដឹងថា កត្តាបង្កដែលធ្វើឲ្យមានជំងឺគ្រោះថ្នាក់ដាច់សរសៃឈាមក្នុងខួរក្បាលត្រូវបានចែកចេញជា ២ ប្រភេទ ។ ប្រភេទទី១ គឺការស្ទះសរសៃឈាមនៅក្នុងខួរក្បាល កត្តាបង្ករបស់វាគឺមានជំងឺលើសឈាម ជំងឺទឹកនោមផ្អែម ជំងឺលើសខ្លាញ់ធាត់ លើសអាស៊ីត អ្នកជំងឺដែលស្រណុកសុកស្រួលមិនបានធ្វើលំហាត់ប្រាណ ពលកម្មអី អ្នកខ្លះគឺគាត់ពិសារបារី ស្រា និងអ្នកខ្លះទៀតគាត់មានបញ្ហាបេះដូង ដូចជាខូចប្រើសបេះដូង ឬក៏គាត់មានការវះកាត់បេះដូង ជាដើម។ល។
លោកវេជ្ជបណ្ឌិត ច័ន្ទ វិជ្ជា បន្តទៀតថា ប្រភេទទី២ នៃគ្រោះថ្នាក់សរសៃឈាមខួរក្បាល គឺការដាច់សរសៃឈាមក្នុងខួរក្បាល ដែលមូលហេតុ ឬកត្តាបង្កធ្វើឲ្យគាត់មានបញ្ហាប៉ះពាល់ដល់ការដាច់សរសៃឈាមក្នុងខួរក្បាល គឺដោយសារតែជំងឺលើសឈាមសំខាន់ជាងគេ ។ ចំណុចសំខាន់មួយទៀតនោះ ដោយសារបងប្អូនខ្លះគាត់មានសរសៃឈាមរបស់គាត់ប៉ោងខុសពីធម្មតា ដែលអាចងាយនឹងដាច់ ឬបែក ។ កត្តាផ្សេងទៀតដូចជា អ្នកជំងឺគាត់មានបញ្ហាជំងឺឈាមរាវ និងអ្នកខ្លះគាត់ប្រើថ្នាំពង្រាវឈាម ដែលធ្វើឲ្យគាត់ងាយនឹងហូរឈាមក្នុងខួរក្បាល ជាដើម ។ លោកវេជ្ជបណ្ឌិតបញ្ជាក់ថា សម្រាប់ជំងឺគ្រោះថ្នាក់សរសៃឈាមខួរក្បាល គឺកើតមានទៅលើបុរស និងស្ត្រីដូចគ្នា ។ អ្វីដែលសំខាន់ គឺគាត់ឆាប់បានអញ្ជើញមកមន្ទីរពេទ្យដើម្បីធ្វើការព្យាបាល ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ