ខេត្តកំពង់ធំ ៖ តាមប្រភពព័ត៌មានបានឱ្យដឹងថា មានគ្រោះថ្នាក់៣ករណីផ្សេងគ្នាបានកើតឡើង ក្នុងនោះរួមមាន ៈ ករណីទី១-កាណូតនឹងកាណូតពន្លះគ្នាបណ្តាលឱ្យស្លាប់មនុស្សម្នាក់ បានកើតឡើងកាលពីវេលាម៉ោង១២និង២៥នាទីយប់ឈានចូលថ្ងៃទី៣០ ខែឧសភា ឆ្នាំ២០១៨…
ខេត្តកំពង់ធំ ៖ តាមប្រភពព័ត៌មានបានឱ្យដឹងថា មានគ្រោះថ្នាក់៣ករណីផ្សេងគ្នាបានកើតឡើង ក្នុងនោះរួមមាន ៈ
ករណីទី១-កាណូតនឹងកាណូតពន្លះគ្នាបណ្តាលឱ្យស្លាប់មនុស្សម្នាក់ បានកើតឡើងកាលពីវេលាម៉ោង១២និង២៥នាទីយប់ឈានចូលថ្ងៃទី៣០ ខែឧសភា ឆ្នាំ២០១៨ ស្ថិតនៅតាមបណ្តោយដងស្ទឹងជីនិត ត្រង់ចំណុចកែងអាញៀន ក្នុងភូមិសាស្ត្រភូមិកងមាស ឃុំពៅ្ន ស្រុកសន្ទុក ខេត្តកំពង់ធំ ។
សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍ផ្លូវទឹកខាងលើបង្កឡើងរវាងកាណូតនឹងកាណូត ( ទូកស្មាច់ ) ម៉ាកហ៊ីយ៉ាន់ដាយ កម្លាំង១៨សេស ពណ៌ខៀវលាយស បើកបរពីក្រោមឡើងលើ ដោយឈ្មោះ
ឡេង តាំងគា ភេទប្រុស អាយុ២៣ ឆ្នាំ រស់នៅភូមិជីមាឃ ឃុំកកោះ ស្រុកសន្ទុក បណ្តាលឱ្យស្លាប់នៅនឹងកន្លែងកើតហេតុ ខណៈពេលដែលបានបើកកាណូតទៅបុកជាមួយនឹងកាណូតមួយគ្រឿងទៀតម៉ាកហ៊ីយ៉ាន់ដាយ ពណ៌ខៀវលាយស កម្លាំង១៨សេសដូចគ្នា ដែលបើកបរដោយឈ្មោះ ស៊ុន សុទ្ធ ភេទប្រុស អាយុ២០ឆ្នាំ រស់នៅភូមិទួលចាន់ ឃុំតាំងក្រសាំង ស្រុកសន្ទុក បានរត់គេចខ្លួនបាត់បន្ទាប់ពីកើតហេតុ ។
សមត្ថកិច្ចបញ្ជាក់ថា ករណីគ្រោះថ្នាក់ចរាចរណ៍ផ្លូវទឹកខាងលើ មូលហេតុបង្កឡើងដោយកាណូតបើកពីក្រោមឡើងលើដោយជនរងគ្រោះឈ្មោះ ឡេង តាំងគា បើកបរមិនប្រកាន់ស្តាំ ។ ករណីនេះកម្លាំងនគបាល កំពុងកសាងសំណុំរឿងតាមនីតិវិធី ។
ករណីទី២-មានករណីរន្ទះបាញ់បណ្តាលឲ្យរបួសធ្ងន់មនុស្សម្នាក់កាលពីរសៀលថ្ងៃទី២៩ ខែឧសភា ស្ថិតនៅក្នុងកសិដ្ឋានទី២របស់ក្រុមហ៊ុនតានបៀន អភិវឌ្ឍន៍ចំការកៅស៊ូ នៅភូមិថ្មសំលៀង ឃុំក្រយា ស្រុក
សន្ទុក ខណៈជនរងគ្រោះឈ្មោះ អុី វេង ភេទប្រុស អាយុ៤៥ ឆ្នាំ រស់នៅភូមិថ្មី ឃុំឈូក ស្រុកសន្ទុក កំពុងជ្រកភ្លៀងស្ថិតនៅក្រោមផ្ទះនៅទីនោះ ក៏ត្រូវរន្ទះបាញ់ចំ បណ្តាលឱ្យរងរបួសធ្ងន់ ហើយត្រូវបានសាច់ញាតិដឹកបញ្ជូនជនរងគ្រោះមកព្យាបាលនៅមន្ទីរពេទ្យបង្អែកបារាយណ៍សន្ទុក ។
និងករណីទី៣-នៅរសៀលថ្ងៃដដែលមានមនុស្សលង់ទឹកស្លាប់ម្នាក់ ស្ថិតនៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ។
សមត្ថកិច្ចបានឱ្យដឹងថា ជនរងគ្រោះដែលស្លាប់ឈ្មោះ ថន ម៉ាលី ភេទស្រី អាយុ១៣ឆ្នាំ រស់នៅក្នុងភូមិកើតហេតុខាងលើ ។
បើតាមការឲ្យដឹងពីសាច់ញាតិបានប្រាប់ថា នៅមុនពេលកើតហេតុ គេឃើញជនរងគ្រោះបានចុះងូតទឹកស្រះលេងយ៉ាងសប្បាយ ក៏បណ្តាលឱ្យលង់ស្លាប់តែម្តង ។
បន្ទាប់ពីសមត្ថកិច្ចពិនិត្យសពរួច ក៏ប្រគល់សពឱ្យសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ