ខេត្តស្វាយរៀង ៖ មេបញ្ជាការកងរាជអាវុធហត្ថខេត្តបានធ្វើសន្និសីទកាសែតបង្ហាញមុខក្រុមឧក្រិដ្ឋជនជួញដូរ និងចែកចាយគ្រឿងញៀនទ្រង់ទ្រាយធំមួយ ដែលសមត្ថកិច្ចបានពន្លាតភូមិសាស្ត្ររបស់ខ្លួន ក្នុងការតាមប្រមាញ់ពីខេត្តរហូតមកដល់រាជធានីភ្នំពេញ ដោយបានចាប់ខ្លួនជនសង្ស័យបាន១០នាក់ និងរឹបអូសបានគ្រឿងញៀនចម្រុះជាង៧គីឡូក្រាម ។
អ្វីដែលធ្វើឱ្យមានការភ្ញាក់ផ្អើលសម្រាប់មជ្ឈដ្ឋានអ្នកសង្កេតការណ៍នោះ គឺការបែកធ្លាយមេខ្លោងជួញដូរគ្រឿងញៀននេះ គឺជាអ្នកទោសស្ថិតនៅក្នុងគុកព្រៃស ជាអ្នកបញ្ជាក្នុងការជួញដូរនិងចែកចាយគ្រឿងញៀននៅរាជធានីភ្នំពេញ និងបន្តចែកចាយតាមបណ្តាខេត្តរហូតដល់ខេត្តស្វាយរៀង ។ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថបានថ្លែងថា កងរាជអាវុធហត្ថខេត្ត បានបើកប្រតិបត្តិការបង្ក្រាបរយៈពេល៣ថ្ងៃ ចាប់បានជនសង្ស័យចំនួន១០នាក់ ស្រី៤នាក់ក្នុងនោះជនជាតិវៀតណាម៤នាក់និងដកហូតថ្នាំញៀន សរុបបានចំនួន៧គីឡូ៣៥៦ក្រាម៥៤ ។ រថយន្តម៉ាកTOYOTA ព្រូស១គ្រឿង ម៉ូតូចំនួន២គ្រឿង អាវុធខ្លីចំនួន២ដើមគ្រាប់២បង់ ជញ្ជីងថ្លឹងគ្រឿងញៀន២គ្រឿង សម្ភារប្រើប្រាស់គ្រឿងញៀនមួយចំនួន ប្រាក់អាមេរិកចំនួន៥០០ដុល្លារ ប្រាក់វៀតណាម២ ៥០០ ០០០ដុង ប្រាក់ខ្មែរ៤៥០.០០០រៀល។
លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀងបានមានប្រសាសន៍ទៀតថា នេះជាលើកទី១ហើយដែលកងរាជអាវុធហត្ថខេត្ត ចុះធ្វើប្រតិបត្តិការបង្ក្រាបក្រុមឧក្រិដ្ឋជនរក្សាទុក ឬជួញដូរចែកចាយគ្រឿងញៀន មានលក្ខណៈទ្រង់ទ្រាយធំនៅដើមឆ្នាំ២០១៨នេះ ។ សន្និសីទកាសែតនេះត្រូវបានធ្វើឡើងកាលពីល្ងាចថ្ងៃទី២២ មករា នៅសាលប្រជុំទីបញ្ជាការដ្ឋានកងរាជអាវុធហត្ថខេត្តស្ថិតនៅភូមិរោងបន្លែ សង្កាត់ស្វាយរៀង ក្រុងស្វាយរៀង ។
លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តបានថ្លែងពីប្រតិបត្តិលំអិតក្នុងការតាមប្រមាញ់ក្រុមឧក្រិដ្ឋជននេះថា ការបង្ក្រាបបទល្មើសគ្រឿងញៀនបានជោគជ័យនេះដោយមានការខិតខំប្រឹងប្រែងរបស់កម្លាំងមន្ត្រីមន្ទីរយុត្តិធម៌ សហការជាមួយកងរាជអាវុធហត្ថក្រុងបាវិត ចុះប្រតិបត្តិការបង្ក្រាបករណីរក្សាទុក ឬជួញដូរនូវសារធាតុញៀន នៅចំណុចផ្ទះសំណាក់យីហោ PPT៣ បន្ទប់ឈ្មោះកូរ៉េស្ថិតនៅភូមិបាវិតកណ្តាល សង្កាត់បាវិត ក្រុងបាវិត ចាប់ឃាត់ខ្លួនជនសង្ស័យបានម្នាក់ឈ្មោះ យូ បញ្ញា ភេទប្រុស អាយុ២៦ឆ្នាំនិងដកហូតវត្ថុតាងរួមមាន ថ្នាំញៀនប្រភេទគ្រាប់ ពណ៌ផ្កាឈូកចំនួន២៩០គ្រាប់ ថ្នាំគ្រាប់ពណ៌ស ចំនួន១០គ្រាប់ និងទូរសព្ទ័ដៃចំនួន២គ្រឿងនៅថ្ងៃទី១៩ មករា ២០១៨ វេលាម៉ោង៨និង៣០នាទីយប់ ។
ក្រោយពីសមត្ថកិច្ចសាកសួរជនសង្ស័យឈ្មោះ យូបញ្ញា បានសារភាពថា ខ្លួនបានយកថ្នាំពីឈ្មោះ វិសាល ហៅពៅ ភេទប្រុស នៅរាជធានីភ្នំពេញ ។លោកឧត្តមសេនីយ៍បន្តទៀតថា ដោយមានចម្លើយសារភាព ថាមានមេខ្លោងនៅរាជធានីភ្នំពេញលោកក៏បានរាយការណ៍ជូនលោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស លោកអភិបាល នៃគណៈអភិបាលខេត្តស្វាយរៀង បានបញ្ជាផ្ទាល់សហការជាមួយកម្លាំងកងរាជអាវុធហត្ថលើផ្ទៃប្រទេស ដឹកនាំដោយលោកឧត្តមសេនីយ៍ឯក ស៊ិន សូផាន្នី មេបញ្ជាការរងទទួលផែននគបាលយុត្តិធម៌ និងមានការសម្របសម្រួលពីលោក គង់ ចន្ទ័ខេមរិទ្ធ ព្រះរាជអាជ្ញាអមសាលាដំបូងខេត្តស្វាយរៀង និងលោក សឿន មុនីរត្ន័ ព្រះរាជអាជ្ញារង រាជធានីភ្នំពេញចុះបង្ក្រាប៣ករណីជាបន្តបន្ទាប់ ។
ក្នុងការតាមប្រមាញ់នៅរាជធានីភ្នំពេញនៅវេលាម៉ោង៩យប់ថ្ងៃទី២០ មករា មុខសញ្ញាបានបង្ហាញខ្លួន នៅចំណុចផ្លូវលេខ១៦៣ សង្កាត់វាលវង់ ខណ្ឌ៧មករា រាជធានីភ្នំពេញ សមត្ថកិច្ចធ្វើការឃាត់ខ្លួនជនសង្ស័យម្នាក់ឈ្មោះ ហ៊ុន ស្រីកា ភេទស្រី អាយុ៣៣ឆ្នាំ ឆែកឆេររកឃើញវត្ថុតាងគ្រឿងញៀនរួមមាន១-ម្សៅក្រាមពណ៌សថ្លា ចំនួន១កញ្ចប់ធំ ។២-ថ្នាំគ្រាប់ពណ៌ផ្ទៃមេឃចំនួន១កញ្ចប់ធំសរុបទាំងពីរមានទម្ងន់៣៥០ក្រាម ។៣-ទូរសព្ទ័ដៃចំនួន១គ្រឿង ។
ក្រោយពីការសាកសួរឈ្មោះ ហ៊ុន ស្រីពៅ បានសារភាពថាខ្លួនត្រូវឈ្មោះ ពៅ ឱ្យយកកញ្ចប់ថ្នាំទៅឱ្យបុរសម្នាក់ស្នាក់នៅក្នុងបន្ទប់ជួលលេខ១៤០៣ ខុនដូរមេគង្គវីយូថោន ទើបប្រតិបត្តិការនេះបន្តនៅចំណុចនោះ តែពុំបានឃើញបុរសនោះនៅទីនោះទេ ទើបកម្លាំងសមត្ថកិច្ចធ្វើការឆែកឆេរបន្ទប់លេខ១៤០៣ រកឃើញវត្ថុតាងរួមមាន៖
១-ម្សៅក្រាមពណ៌សថ្លាចំនួន១កញ្ចប់តូច
២-ថ្នាំញៀនពណ៌ផ្កាឈូកចំនួន២គ្រាប់
៣-ជញ្ជីងថ្លឹងគ្រឿងញៀន១គ្រឿង
៤-សម្ភារសម្រាប់ប្រើប្រាស់គ្រឿងញៀនមួយចំនួន ។
ជាមួយគ្នានេះកម្លាំងកងរាជអាវុធហត្ថដែលនៅខាងក្រោមមានការសង្ស័យបុរសម្នាក់ ក៏បានសាកសួរទើបបុរសនោះឆ្លើយថា ខ្លួនស្នាក់នៅក្នុងបន្ទប់លេខ១៤០៣ ក៏បានធ្វើការឃាត់ខ្លួននិងក្រុមជនសង្ស័យចំនួន៦នាក់ ស្រី៤នាក់ក្នុងនោះមានស្ត្រីវៀតណាម៤នាក់ ។
ការឆែកឆេរជនសង្ស័យម្នាក់ឈ្មោះ ជ័យសុភាព ភេទប្រុស រកឃើញវត្ថុតាងរួមមាន
១-ថ្នាំញៀនពណ៌ទឹកក្រូច១កញ្ចប់ធំ ទម្ងន់ស្មើ១៨៩,៦ក្រាម ។
២-ថ្នាំគ្រាប់ពណ៌ផ្កាឈូក២គ្រាប់ ។
៣-កញ្ឆាក្រៀម២កញ្ចប់ ។
៤-ម្សៅខេ១កញ្ចប់ ។
៥-ថ្នាំគ្រាប់ពណ៌ផ្ទៃមេឃ៣គ្រាប់ ។
៦-ម្សៅក្រាមពណ៌សថ្លា១កញ្ចប់ ។
៧-អាវុធខ្លីម៉ាកP២៣០ ចំនួន១ដើម បង់១និងគ្រាប់ចំនួន៧គ្រាប់ ។
៨-រថយន្តម៉ាកព្រូស១គ្រឿង ។
៩-ជញ្ជីងថ្លឹងគ្រឿងញៀន១គ្រឿង
១០-សម្ភារប្រើប្រាស់គ្រឿងញៀនមួយចំនួន ។
ឈ្មោះ ជ័យ ភាព បានសារភាពថាបន្តិចទៀតឈ្មោះ ពៅ ជាមេខ្លោងនឹងមកដល់ ។ កន្លះម៉ោងក្រោយមកឈ្មោះ យឹម វិសាល ហៅពៅ អាយុ៣៤ឆ្នាំ ក៏បានជិះម៉ូតូមកដល់សមត្ថកិច្ចក៏ធ្វើការចាប់ខ្លួនឆែកឆេររកឃើញវត្ថុតាងរួមមាន
១-ម្សៅក្រាមពណ៌សថ្លា ចំនួន៦កញ្ចប់ទម្ងន់៤៩,១ក្រាម ។
២-ទូរសព្ទ័ដៃ១គ្រឿង ។
៣-ម៉ូតូ១គ្រឿង
៤-ប្រាក់ដុល្លារ៥០០ដុល្លារ ។
មេខ្លោងឈ្មោះ វិសាល ហៅពៅ បានសារភាពថា ខ្លួនបានទិញថ្នាំញៀនពីអ្នកនៅក្នុងគុកព្រៃស ។ សមត្ថកិច្ចបានប្រើល្បិចឱ្យឈ្មោះ ពៅ កម្មង់ទិញថ្នាំពីអ្នកនៅក្នុងគុកព្រៃស រហូតដល់វេលាម៉ោង២និង៤០នាទីរសៀលថ្ងៃទី២១ មករា ២០១៨ មេខ្លោងជួញដូរគ្រឿងញៀនបានណាត់ជួបគ្នានៅចំណុចហាងសាច់អាំងព្រហ្មបាយ័ន ខាងក្រោយរោងភាពយន្តលុច្ស ស្ថិតនៅចំណុចសង្កាត់ផ្សារកណ្តាល ផ្លូវលេខ១៥៤ កែងផ្លូវលេខ១៩ ខណ្ឌដូនពេញ ដោយមេខ្លោងដែលនៅក្នុងគុកព្រៃសបានបញ្ជាឱ្យឈ្មោះ ងូវ សុភារម្យ ភេទប្រុស អាយុ៣០ឆ្នាំ យកថ្នាំមកជំនួស ។ពេលធ្វើការឆែកឆេររកឃើញវត្ថុតាងរួមមាន ១-ម្សៅក្រាមពណ៌សថ្លា១កញ្ចប់ មានទម្ងន់៩៩៣,៤០ក្រាម ។ ២-ម៉ូតូ១គ្រឿង ។ ៣-ទូរសព្ទ័ដៃ១គ្រឿង ។
ឈ្មោះ ងូវ សុភារម្យ សារភាពថាខ្លួនជាកូនចៅ មេខ្លោងគ្រឿងញៀននៅគុកព្រៃស មានបន្ទប់ជួលលេខ៥ស្ថិតនៅភូមិព្រៃតាគង់២ សង្កាត់ចាក់អង្រែលើ ខណ្ឌមានជ័យ ។ លុះដល់ម៉ោង១១និង៣០នាទីព្រឹកថ្ងៃទី២២ មករា សមត្ថកិច្ចបានធ្វើការឆែកឆេបន្ទប់លេខ៥ នៅភូមិតាគង់២ ដកហូតបានវត្ថុតាងរួមមាន១-ម្សៅក្រាមពណ៌សថ្លា ៥កញ្ចប់ធំនិង១២កញ្ចប់តូចស្មើនិង៥,៩១៣ក្រាម ។ ២-កាំភ្លើងខ្លីម៉ាកK៥៩ មួយដើមបង់១មាន៨គ្រាប់ ។ ៣-ជញ្ជីងថ្លឹងគ្រឿងញៀន២គ្រឿង ។ ៤-សម្ភារប្រើប្រាស់គ្រឿងញៀនមួយចំនួនធំ ។ សរុបថ្នាំញៀនដែលបង្ក្រាបទាំង៤ដំណាក់កាលទី១នៅខេត្តស្វាយរៀង ដកហូតបានមានទម្ងន់៩៩.៤៤ក្រាម នៅឯរាជធានីភ្នំពេញមានទម្ងន់៧,២៥៧.១ក្រាម គិតទាំងសំបកវិចខ្ចប់ ។ សរុបទាំងអស់មានទម្ងន់៧,៣៥៦.៥៤ក្រាម គិតទាំងសំបកវិចខ្ចប់ ។
ចំណែកជនសង្ស័យ១-ឈ្មោះ យូបញ្ញា ២-ឈ្មោះ ហ៊ុនស្រីកា ៣-ឈ្មោះ យឹម វិសាល ហៅពៅ ៤-ឈ្មោះ ជ័យ សុភាព និង៥-ឈ្មោះ ងូវ សុភារម្យ រួមទាំងវត្ថុតាងសមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្តស្វាយរៀង ចាត់ការតាមនីតិវិធីនៅព្រឹកថ្ងៃទី២៤ មករា ២០១៨ ។ ចំណែកជនជាតិវៀតណាម៤នាក់ និងខ្មែរម្នាក់សមត្ថកិច្ចឱ្យដឹងថា បើតាមការសាកសួរគឺគ្មានការពាក់ពន្ធ័ក្នុងការជួញដូរ ឬចែកចាយគ្រឿងញៀនទេ ដូច្នេះសមត្ថកិច្ចធ្វើកិច្ចសន្យានិងអប់រំរួចបានដោះលែងឱ្យមានសេរីភាពវិញ ។ សរុបប្រតិបត្តិការនេះក្រុមជនជួញដូរគ្រឿងញៀនដែលទាក់ទិនពិតប្រាកដមាន៥នាក់ ក្នុងនោះមានស្រីម្នាក់ ៕
ចែករំលែកព័តមាននេះ