Miss Global 2017 ចង់ចំណាយពេលនៅកម្ពុជាធ្វើសកម្មភាពមនុស្សធម៌
- ភ្នំពេញ
រាជធានីភ្នំពេញ ៖ កាលពីព្រឹកថ្ងៃទី២១ វិច្ឆិកា ឆ្នាំ២០១៧ បវរកញ្ញា Miss Global 2017 ដែលទើបតែទទួលជ័យលាភីកាលពីពេលថ្មីៗកន្លងមក…
រាជធានីភ្នំពេញ ៖ កាលពីព្រឹកថ្ងៃទី២១ វិច្ឆិកា ឆ្នាំ២០១៧ បវរកញ្ញា Miss Global 2017 ដែលទើបតែទទួលជ័យលាភីកាលពីពេលថ្មីៗកន្លងមក បានទៅធ្វើសកម្មភាពមនុស្សធម៌នៅអង្គការ«លើកស្ទួយប្រជាពលរដ្ឋ» អតីតតំបន់ចាក់សំរាម ស្ទឹងមានជ័យ រាជធានីភ្នំពេញ ។
Miss Global 2017 ជនជាតិប្រេស៊ីលកញ្ញាBarbara Vitorelli និង Miss Global 2015 ចំណាត់ថ្នាក់លេខ៣ កញ្ញាGeri Donchera ពីប្រទេសប៊ុលហ្គារីបានចូលរួមកម្មវិធីតាមការរៀបចំពីក្រុមហ៊ុនទឹកពិសាអេរ៉ូទិច ដោយបានចែកអំណោយដល់កុមារ និងប្រគល់រថយន្តជូនដល់អង្គការតាមរយៈលោកជំទាវវណ្ណ លុយ ។ កញ្ញា Barbara Vitorelli បានថ្លែងថានាង និងអ្នករៀបចំកម្មវិធីបវរកញ្ញាបានសហការជាមួយក្រុមហ៊ុនទឹកបរិសុទ្ធអេរ៉ូទិចមានអំណោយខ្លះចែកជូនដល់កុមាររស់នៅអង្គការនោះ ។ នាងនិយាយថា «នាងខ្ញុំសប្បាយចិត្តបានជួប ប្អូនៗកុមារដែលក្រីក្រ អាណាព្យាបាលជាអ្នករើសសំរាម ហើយខ្លះទៀតគ្មានឳពុកម្តាយគួរឱ្យអាណិត ។ កុមារនៅមានអនាគតវែងឆ្ងាយ ហើយអាចផ្លាស់ប្តូរ ប្អូនៗក្លាយជាធនធានមនុស្សថ្មីបាន កាលណាគាត់រៀនសូត្រចេះដឹងមានអ្នកអប់រំ ។ ក្រោយជាប់ឈ្មោះបវរកញ្ញាឯកមកនាងខ្ញុំពិតជាដក់អារម្មណ៍ចង់បន្តវត្តមាននៅក្នុងប្រទេសកម្ពុជាឱ្យបានយូរទៀតដើម្បីបង្កើតសកម្មភាពមនុស្សធម៌បានច្រើនរូបភាព»។
អំណោយដែលកុមារទទួលបាននាឱកាសនោះ ម្នាក់ៗ២ម៉ឺនរៀល នំ សៀវភៅ ទឹកដោះគោ ប៊ិក និងបាយឆាយ៉ាងចូវម្នាក់១ប្រអប់ ។
អ្នកស្រីវណ្ណ លុយ ប្រធានក្រុមហ៊ុនទឹកបរិសុទ្ធអេរ៉ូទិចសប្បាយរីករាយដែលបានសហការជាមួយក្រុមបវរកញ្ញាទៅសួរសុខទុក្ខកុមារកម្ពុជា ។ ជាមោទនភាពមួយដែលកម្ពុជារៀបចំធ្វើជាម្ចាស់ផ្ទះប្រឡងបវរកញ្ញានេះឡើង វាដូចជាការផ្សព្វផ្សាយវិស័យទេសចរណ៍មួយចំណែកដែរ ។
លោកស្រីនួន ភិមាន ស្ថាបនិកអង្គការលើកស្ទួយប្រជាពលរដ្ឋបានថ្លែងថា ភាគច្រើនកុមារជាអ្នកក្រីក្រ អ្នកខ្លះរើសសំរាម ខ្លះមានម្តាយឬឳពុកធ្វើការនៅថៃ ។ ពួកគេមានសិទ្ឋិទទួលការអប់រំផ្នែកភាសាអង់គ្លេស ហើយភាសាខ្មែរតាមកម្មវិធីក្រសួងអប់រំ ។
បវរកញ្ញាទាំងពីរនាក់បានចែកអំណោយបន្ថែមពីលើលោកជំទាវវណ្ណ លុយ ដែលផ្តល់ជូនរថយន្តមួយគ្រឿងសម្រាប់ដឹកកុមារ៣០០នាក់ពីមណ្ឌលក្បែរព្រៃសទៅរៀននៅស្ទឹងមានជ័យ ។
កុមាររៀននៅអង្គការ សរុប១៥០០នាក់ដោយសាលាទទួលរ៉ាប់រងខោអាវ អាហារ និងសម្ភារសិក្សា ៕
ចែករំលែកព័តមាននេះ