ខេត្តបន្ទាយមានជ័យ ៖ ផ្ទះចំនួន៩ខ្នងនៅភូមិចំនួន៣ ក្នុងឃុំស្រះរាំង ស្រុកមង្គលបុរី ត្រូវបានខ្យល់ព្យុះបោកបក់បណ្តាលឱ្យខូចខាត កាលពីយប់ថ្ងៃទី២៩ កក្កដា ២០១២ ។
តាមរបាយការណ៍របស់លោកវរសេនីយ៍ត្រីយ៉ត សុផល អធិការនគរបាលស្រុកមង្គលបុរីបានឱ្យដឹងថា នៅយប់កើតហេតុមានភ្លៀងធ្លាក់យ៉ាងខ្លាំង រួមជាមួយនឹងខ្យល់ព្យុះបានបោកបក់ បណ្តាលឱ្យផ្ទះប្រជាពលរដ្ឋនៅភូមិចំនួន៣ ក្នុងឃុំស្រះរាំង៩ខ្នង គឺភូមិតាអិន១ ចំនួន៣ខ្នង ត្រូវរបើកដំបូលស័ង្ក សី ស្ទើរទាំងស្រុង ភូមិក្រូចចំនួន៥ខ្នង របើកដំបូលស័ង្កសី ក្នុងនោះមាន១ខ្នង ត្រូវបានខ្យល់ព្យុះកួចទម្លាក់ពីលើជើងកំណល់ បណ្តាលឱ្យរបួសម្ចាស់ផ្ទះឈ្មោះជុំ ប៊ុនថន ភេទប្រុស អាយុ៧៨ឆ្នាំ រងរបួសគ្រេចចង្កេះ និងចំនួន២ខ្នងទៀត ត្រូវដើមឈើដួលរលំសង្កត់ និងភូមិចម្ការចេក មាន១ខ្នង របើកដំបូលស័ង្កសីចំនួន១០សន្លឹក ។
លោកអធិការនគរបាលស្រុកបានបញ្ជាក់ថា ករណីគ្រោះធម្មជាតិដោយសារខ្យល់ព្យុះនេះ គឺពុំបណ្តាលឱ្យមានមនុស្ស ឬសត្វរងគ្រោះថ្នាក់ដល់អាយុជីវិតនោះទេ គឺគ្រាន់តែខូចខាតផ្ទះ និងសម្ភារតែប៉ុណ្ណោះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ