ក្រុងប៉ោយប៉ែត ៖ ក្បួនព្យុះហយាត្រាដោយជិះកង់ប្រមាណ៨០គ្រឿងរបស់សប្បុរសជនអង្គការកម្ពុជានៃក្តីសង្ឃឹមហៅកាត់ថា CHO បានធ្វើឡើងតាមដងផ្លូវជាតិលេខ៦ ពីសៀមរាប ឆ្ពោះមកផ្លូវជាតិលេខ៥ រហូតដល់ក្រុងប៉ោយប៉ែត ដើម្បីផ្សព្វផ្សាយការទប់ស្កាត់ ការជួញដូរកេងប្រវ័ញ្ច រំលោភបំពានផ្លូវភេទលើកុមារ ដោយមានរថយន្តពេទ្យ និងរថយន្តស៊ីរ៉ែនរបស់សមត្ថកថិច្ចបានអមដំណើរមុខក្រោយ ខណៈមកដល់ចំណុចផ្លូវបំបែកក្រុងប៉ោយប៉ែត និងស្រុកម៉ាឡៃ ស្ថិតក្នុងភូមិកូនដំរី សង្កាត់និម្មិត កាលពីវេលាម៉ោង៦និង៤០នាទិល្ងាច ថ្ងៃទី៣០ តុលា ២០១១។
ជាមួយនេះគេសង្កេតឃើញលោកអភិបាល អភិបាលរងក្រុង ប្រធានមន្ទីរទេសចរណ៍ខេត្ត មេបញ្ជាការ មេបញ្ជាការរងគ្រប់អង្គ ភាពពាក់ព័ន្ធក្នុងក្រុង អាជ្ញាធរសង្កាត់-ភូមិព្រមទាំងអ្នកស្រុកបានរង់ចាំស្វាគមន៍ក្បួនព្យុះហយាត្រានេះយ៉ាងកក់ក្តៅដោយមានទាំងពិធីបំពាក់កម្រងផ្កាដល់ពួកគេលើផ្លូវជាតិផងដែរ ។ លោកខេម សុវណ្ណ ប្រធានគ្រប់គ្រងកម្មវិធីផ្នែកអប់រំរបស់អង្គការកម្ពុជានៃក្តីសង្ឃឹមបានប្រាប់កោះសន្តិភាពតាមទូរស័ព្ទនៅព្រលប់ថ្ងៃទី៣០ តុលា ២០១១ ថា ក្បួនព្យុះហយាត្រាខាងលើមានសប្បុរសជនរបស់អង្គការ CHO មកពី៣ប្រទេស រួមមានអូស្ត្រាលី កាណាដា និងអាមេរិក ចំនួន៦០នាក់ និង២០នាក់ទៀតជាមន្ត្រីនៃអង្គការ CHO នៅកម្ពុជា ។
មន្ត្រីខាងលើបន្តថា ថ្ងៃទី៣០ តុលា ២០១១ ធ្វើការដង្ហែព្យុះយាត្រាផ្សព្វផ្សាយដោយកង់ ហើយនៅព្រឹកថ្ងៃទី៣១ តុលា ២០១១ នឹងធ្វើក្បួនដង្ហែដោយថ្មើរជើងក្នុងអត្ថន័យផ្សព្វផ្សាយដូចខាងលើនៅក្រុងប៉ោយប៉ែត ចាប់ពីចំណុចរង្វង់មូលច្រកទ្វារអន្តរជាតិដល់ភូមិផ្សារកណ្តាលដែលមានចម្ងាយប្រហែល៣គីឡូម៉ែត្រ រួចនឹងប្រារព្ធធ្វើពិធីផ្សព្វផ្សាយបន្តក្រោមអធិបតីភាពលោកជំទាវ ជូ ប៊ុនអេង រដ្ឋលេខាធិការក្រសួងហាផ្ទៃតំណាងដ៏ខ្ពង់ខ្ពស់របស់លោក ស ខេង ឧបនាយករដ្ឋមន្ត្រី មន្ត្រីក្រសួងមហាផ្ទៃ និងមានការអញ្ជើញចូលរួមពីសំណាក់លោកអ៊ុង អឿន អភិបាលខេត្តបន្ទាយមានជ័យ អភិបាល អភិបាលរងក្រុងរួមទាំងតំណាងស្ថាប័នមកពីមន្ទីរពាក់ព័ន្ធជុំវិញខេត្ត-ក្រុងយ៉ាងច្រើនកុះករ ៕
ចែករំលែកព័តមាននេះ