ខេត្តមណ្ឌលគិរី ៖ ដើម្បីរំលឹកដល់ព្រះរាជបូជនីយកិច្ចដ៏ឧត្តុង្គឧត្តម និងព្រះរាជបេសកកម្មដ៏ថ្លៃថ្លាបំផុតរបស់ ព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យជាតិ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងខ្លាំងក្លាក្នុងការតស៊ូទាមទារឯករាជ្យពេញបរិបូរណ៍ជូនជាតិមាតុភូមិកម្ពុជាពីអាណានិគមនិយមបារាំង កាលពីថ្ងៃទី៩ ខែវិច្ឆិកា ឆ្នាំ១៩៥៣ នាព្រឹកថ្ងៃទី០៩ ខែវិច្ឆិកា ឆ្នាំ២០២៦ រដ្ឋបាលខេត្តមណ្ឌលគិរីបានរៀបចំពិធីអបអរសាទរខួបអនុស្សាវរីយ៍លើកទី៧៣ នៃទិវាបុណ្យឯករាជ្យជាតិ និងទិវាកំណើតកងយោធពលខេមរភូមិន្ទ យ៉ាងមហោឡារិក នៅបរិវេណវិមានឯករាជ្យ ស្ថិតនៅក្រុងសែនមនោរម្យ។
ពិធីដ៏មានអត្ថន័យនេះប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និង ឯកឧត្តម គង់ គឹមនី អភិបាល នៃគណៈអភិបាលខេត្តមណ្ឌលគិរី ដោយមានការអញ្ជើញចូលរួមពីសំណាក់ ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត ព្រះមេគណទាំងពីរគណៈ លោក-លោកស្រីអភិបាលរងខេត្ត ព្រះរាជអាជ្ញា មេបញ្ជាការកងកម្លាំងប្រដាប់អាវុធទាំងបីប្រភេទ ប្រធានពន្ធនាគារខេត្ត ប្រធាន-អនុប្រធានមន្ទីរអង្គភាពជុំវិញខេត្ត លោកគ្រូអ្នកគ្រូ សិស្សានុសិស្ស ក្រុមយុវជនកាយរឹទ្ធិ ក្រុមយុវជន ស.ស.យ.ក. ក្រុមយុវជន ស.យ.ស.ស. និងបងប្អូនប្រជាពលរដ្ឋគ្រប់ជនជាតិយ៉ាងច្រើនកុះករ។
ឯកឧត្តម គង់ គឹមនី អភិបាលខេត្ត បានសម្តែងនូវការគោរពដឹងគុណយ៉ាងជ្រាលជ្រៅបំផុតចំពោះព្រះរាជបូជនីយកិច្ចដ៏ឧត្តុង្គឧត្តមរបស់ «ព្រះបរមរតនកោដ្ឋ» និងបានសម្តែងនូវការដឹងគុណដ៏ខ្ពង់ខ្ពស់ចំពោះ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលព្រះអង្គទ្រង់ជាម្លប់ដ៏ត្រជាក់ត្រជុំ និងជានិមិត្តរូបនៃឯកភាពជាតិ។
ឯកឧត្តមអភិបាលខេត្ត ក៏បានគូសបញ្ជាក់ពីការដឹងគុណយ៉ាងធំធេងចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដែលបាននាំមកនូវសន្តិភាពពេញលេញជូនជាតិ តាមរយៈនយោបាយឈ្នះ-ឈ្នះ និងបានសម្តែងការគាំទ្រយ៉ាងពេញទំហឹងចំពោះរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃ និងប្រកបដោយថាមពលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបន្តរក្សាបាននូវសុខសន្តិភាព ស្ថិរភាពនយោបាយ និងជំរុញការអភិវឌ្ឍប្រទេសជាតិប្រកបដោយចីរភាព។
ឯកឧត្តមអភិបាលខេត្ត បានលើកឡើងផងដែរថា រយៈពេល ៧៣ឆ្នាំកន្លងមកនេះ ប្រទេសកម្ពុជាបានឆ្លងកាត់ដំណាក់កាលប្រវត្តិសាស្ត្រជាច្រើន ប៉ុន្តែដោយសារស្មារតីស្នេហាជាតិ និងឆន្ទៈមោះមុតរបស់ប្រជាជន ទើបមាតុភូមិយើងទទួលបានការអភិវឌ្ឍរីកចម្រើនជាបន្តបន្ទាប់។ ជាមួយគ្នានេះ ឯកឧត្តមបានសម្តែងនូវការកោតសរសើរ និងរំលឹកគុណូបការៈចំពោះវីរភាពដ៏អង់អាចក្លាហានរបស់កងយោធពលខេមរភូមិន្ទ នាយទាហាន ពលទាហាន អតីតយុទ្ធជន ព្រមទាំងវីរយុទ្ធជន វីរយុទ្ធនារីទាំងអស់ ដែលបានលះបង់សាច់ស្រស់ឈាមស្រស់ដើម្បីការពារបូរណភាពទឹកដី និងសុខសន្តិភាពជូនប្រជាពលរដ្ឋ៕
ចែករំលែកព័តមាននេះ