បង្ក្រាបចិនម្នាក់ប្រើប្រាស់គ្រឿងញៀ.នមានកាំភ្លើ.ងវែង-ខ្លី
- ប៉ៃលិន
ខេត្តប៉ៃលិន ៖ ក្រោយការស៊ើបអង្កេត និងតាមដានយ៉ាងយកចិត្តទុកដាក់ ខណៈដែលមាន រាយការណ៍ពីប្រជាពលរដ្ឋ កម្លាំងនគរបាលនៃអធិការដ្ឋាននគរបាលស្រុកសាលាក្រៅ បានឈានដល់ចុះបង្ក្រាបករណីកាន់កាប់ រក្សាទុកកាំភ្លើងដោយខុសច្បាប់ និងជួញដូរគ្រឿងញៀន ដោយបានឃាត់ខ្លួនបុរសចិនម្នាក់ ។
ហេតុការណ៍នេះ បានកើតឡើងកាលពីថ្ងៃទី៧ ខែវិច្ឆិកា ឆ្នាំ២០២៦ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានបង្ហើបឱ្យដឹងថា បន្ទាប់ពីកម្លាំងនគរបាលបានតាមដានអស់រយៈពេលជាយូរ ហើយដោយមានការរាយការណ៍ពីប្រជាពលរដ្ឋមូលដ្ឋានថាមានជនជាតិចិនស្នាក់នៅ ហើយប្រើប្រាស់គ្រឿងញៀន និងមានអាវុធខុសច្បាប់ផងនោះ ទើបនគរបាលបានឆ្មក់ទៅដល់កន្លែងជនសង្ស័យស្នាក់នៅ ។ ខណៈដែលឃើញចិននោះកំពុងតែប្រើប្រាស់ថ្នាំញៀន ក៏ចាប់ផ្តើមត្រួតពិនិត្យបន្តក៏បានឃើញមានរក្សាទុកនូវថ្នាំញៀនដោយខុសច្បាប់ និងមានអាវុធខ្លី១ដើម ដែលមានគ្រាប់ចំនួន១១គ្រាប់ និងអាវុធវែង១ដើម មានគ្រាប់ចំនួន២២គ្រាប់ ។
ប្រភពពីប្រជាពលរដ្ឋបានឱ្យដឹងថា គ្រាន់តែឃើញរូបភាពបង្ហោះនៅលើបណ្តាញសង្គម មានរូបភាពអាវុធវែង និងអាវុធខ្លី ពិតជាធ្វើឱ្យពួកគាត់ដែលរស់នៅក្បែរជនជាតិចិននេះ មានការព្រួយបារម្ភយ៉ាងខ្លាំង ។ ពួកគាត់ក៏សម្តែងនូវការសប្បាយចិត្ត ពេលដែលនគរបាលស្រុកសាលាក្រៅបានធ្វើការបង្ក្រាបទាន់ពេលវេលា មុនពេលជនជាតិចិនរូបនោះអាចនឹងអុកឡុក ឬដើរលួចប្លន់ ព្រោះមានអាវុធលួចលាក់នៅនឹងដៃ ដោយមិនខ្លាចញញើតអ្វីនោះឡើយ ។
ពួកគាត់ក៏សូមអរគុណដល់កងកម្លាំងនគរបាលដែលមានភាពអង់អាចក្លាហានលះបង់ពេលវេលាដើម្បីភូមិ-ឃុំមានសុវត្ថិភាព និងដើម្បីសេចក្ដីសុខជូនបងប្អូនប្រជាពលរដ្ឋក្នុងមូលដ្ឋាន ។
សមត្ថកិច្ចបានធ្វើការដកហូតកាំភ្លើងខ្លី គ្រាប់ ទូរស័ព្ទ និងសម្ភារៈមួយចំនួន ព្រមទាំងរថយន្តមែរសឺដេស ពាក់ផ្លាកលេខ ភ្នំពេញ 2CL-9776 ពណ៌ខ្មៅ១គ្រឿង ។ មានដំណឹងថាការបង្ក្រាបនេះត្រូវបានគេលាក់រឿងមិនឱ្យធ្លាយដល់អ្នកកាសែតទេ…ម្ល៉ោះហើយដឹងប៉ុន្មាននិយាយប៉ុណ្ណឹង៕
ចែករំលែកព័តមាននេះ