ឯកឧត្តម ហេង សួរ ចូលរួមសម្ពោធ “សម្ព័ន្ធអតីតជនជាតិខ្មែរនៅអ៊ីស្រាអែល” ដែលជាឱកាសភ្ជាប់ទំនាក់ទំនង និងជាកម្លាំងចលករថ្មី សម្រាប់អភិវឌ្ឍមូលធនមនុស្ស
- ភ្នំពេញ
រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាសហអធិបតី ជាមួយលោក Rami Teplitskiy អនុប្រធានបេសកកម្មនៃស្ថានទូតរដ្ឋអ៊ីស្រាអែល ក្នុងពិធីសម្ពោធ “សម្ព័ន្ធអតីតជនជាតិខ្មែរនៅអ៊ីស្រាអែល” (ACI) និងការចាប់ផ្តើមនៃក្លឹបសាលម (Shalom) នៅកម្ពុជា នាព្រឹកថ្ងៃទី៦ ខែវិច្ឆិកា ឆ្នាំ២០២៦ នៅសណ្ឋាគារ Himawari ដោយមានការចូលរួមពីថ្នាក់ដឹកនាំក្រសួង តំណាងស្ថានទូតអ៊ីស្រាអែល កុងស៊ុលកិត្តិយសអ៊ីស្រាអែល សភាពាណិជ្ជកម្មកម្ពុជា-អ៊ីស្រាអែល និងអតីតនិស្សិតជាច្រើនរូប ។ កម្មវិធីនេះជាការភ្ជាប់ទំនាក់ទំនង រវាងអតីតនិស្សិតមកពីវិស័យ និងជំនាន់ផ្សេងៗ ដើម្បីចែករំលែកជំនាញ ចំណេះដឹង និងបទពិសោធ ព្រមទាំងពង្រឹងភាពជាដៃគូ កម្ពុជា-អ៊ីស្រាអែល ជាពិសេសលើវិស័យមូលធនមនុស្ស នវានុវត្តន៍ កសិកម្ម និងអប់រំបណ្តុះបណ្តាលវិជ្ជាជីវៈ ។
ថ្លែងទៅកាន់អង្គពិធី ឯកឧត្តមរដ្ឋមន្ត្រីបានអបអរសាទរ និងវាយតម្លៃខ្ពស់ចំពោះសម្ព័ន្ធ ACI ទីភ្នាក់ងារ MASHAV ស្ថានទូតអ៊ីស្រាអែល កុងស៊ុលកិត្តិយសនៃរដ្ឋអ៊ីស្រាអែលប្រចាំកម្ពុជា និងសភាពាណិជ្ជកម្មកម្ពុជា-អ៊ីស្រាអែល ដែលបានសហការរៀបចំព្រឹត្តិការណ៍ជាប្រវត្តិសាស្ត្រនេះឡើង សំដៅពង្រឹងទំនាក់ទំនងទ្វេភាគីរវាងកម្ពុជា និងអ៊ីស្រាអែល ។ ពិធីសម្ពោធជាផ្លូវការនេះ បានបង្កើតនូវក្របខ័ណ្ឌស្ថាប័នដ៏សំខាន់ ក្នុងការប្រែក្លាយជំនាញ និងសមត្ថភាពបុគ្គលម្នាក់ៗទៅជាកម្លាំងចលករយុទ្ធសាស្ត្រ សម្រាប់អភិវឌ្ឍជាតិ ហើយការចាប់ផ្តើមនៃក្លឹបសាលមជាការភ្ជាប់កម្ពុជា ទៅនឹងចលនាសកលនៃក្លឹប ដែលនឹងជួយសម្រួលដល់ការចែករំលែកបទពិសោធ ចំណេះដឹង និងការផ្តួចផ្តើមគំនិតដែលជំរុញដោយសហគមន៍ ដើម្បីជាប្រយោជន៍ដល់សេដ្ឋកិច្ច-សង្គមប្រកបដោយចីរភាពនៅកម្ពុជា ជាពិសេសគឺជាការចូលរួមដ៏សំខាន់មួយ ដែលរាជរដ្ឋាភិបាលកម្ពុជាត្រូវការ ដើម្បីសម្រេចចក្ខុវិស័យឆ្នាំ២០៥០ កម្ពុជាក្លាយជាប្រទេសមានចំណូលខ្ពស់ ។
ឯកឧត្តមមានប្រសាសន៍ថា ផ្អែកលើជោគជ័យនាពេលកន្លងមក យ៉ាងហោចណាស់ពលករកម្ពុជាចំនួន ២ពាន់នាក់ នឹងទទួលបានឱកាស ចូលរួមក្នុងកម្មវិធីការងារ និងបណ្តុះបណ្តាលនៅអ៊ីស្រាអែល លើវិស័យកសិកម្មទំនើប ប្រព័ន្ធស្រោចស្រព បច្ចេកវិទ្យាផ្ទះកញ្ចក់ ការគ្រប់គ្រងទឹកឆ្លាតវៃ និងការគ្រប់គ្រងធនធានប្រកបដោយចីរភាព តាមរយៈការចុះហត្ថលេខាលើកិច្ចព្រមព្រៀង ជាប្រវត្តិសាស្ត្រជាមួយគ្នាកាលពីខែធ្នូ ឆ្នាំ២០២៥ ។ ឯកឧត្តមបានលើកទឹកចិត្ត ដល់អតីតនិស្សិតឱ្យចូលរួមចែករំលែកជំនាញ បទពិសោធ និងធ្វើជាអ្នកណែនាំដល់យុវជនជំនាន់ក្រោយ ជាពិសេសជួយគាំទ្រពលករកម្ពុជា ដែលមានបំណងទៅបំពេញការងារ នៅអ៊ីស្រាអែល និងចូលរួមជាគ្រូឧទ្ទេសជួយបំប៉នសមត្ថភាពពលករ ឱ្យមានជំនាញបច្ចេកទេសចាំបាច់ សមត្ថភាពចេះភាសាកម្រិតមូលដ្ឋាន និងយល់ដឹងពីវប្បធម៌អ៊ីស្រាអែល ។ ឯកឧត្តមសង្ឃឹមយ៉ាងមុតមាំថា សម្ព័ន្ធ ACI និងក្លឹបសាលម នឹងក្លាយជាកម្លាំងចលករដ៏រឹងមាំ ក្នុងការជំរុញនវានុវត្តន៍ ឧត្តមភាពវិជ្ជាជីវៈ និងកិច្ចសហប្រតិបត្តិការរវាងស្ថាប័ននានា និងធ្វើឱ្យចំណងមិត្តភាពរវាងប្រទេសទាំងពីរ បន្តរីកចម្រើនដែលផ្តល់ឧត្តមប្រយោជន៍យូរអង្វែង ដល់ប្រជាជាតិទាំងពីរ ។
នាឱកាសនោះ លោក Rami Teplitskiy បានគូសបញ្ជាក់ថា គំនិតផ្តួចផ្តើមនេះមានគោលបំណងបណ្តុះបណ្តាល និងអភិវឌ្ឍអ្នកដឹកនាំជំនាន់ក្រោយ ពង្រឹងកិច្ចសហប្រតិបត្តិការកម្ពុជា-អ៊ីស្រាអែល លើកកម្ពស់ជីវភាពរស់នៅរបស់ប្រជាពលរដ្ឋ និងរួមចំណែកដល់ការអភិវឌ្ឍសង្គមកម្ពុជា ។ លោកក៏បានលើកឡើងពីសារៈសំខាន់ នៃមូលធនមនុស្ស ចំណេះដឹង នវានុវត្តន៍ និងភាពច្នៃប្រឌិត ដែលជាធនធានដ៏មានតម្លៃបំផុត និងជួយឱ្យអ៊ីស្រាអែលសម្រេចបាន នូវវឌ្ឍនភាពគួរឱ្យកត់សម្គាល់ ក្នុងវិស័យកសិកម្ម ការគ្រប់គ្រងទឹក បច្ចេកវិទ្យា និងវិស័យផ្សេងៗទៀត ៕ អត្ថបទសហការ
ចែករំលែកព័តមាននេះ