អាងស្តុកទឹកនៅភាគនិរតីនៃរាជធានីភ្នំពេញ មានសក្តានុពលបម្រើផលកសិកម្មគ្រប់រដូវ និងជួយកាត់បន្ថយគ្រោះទឹកជំនន់
- កំពង់ស្ពឺ
ខេត្តកំពង់ស្ពឺ ៖ ជប៉ុនផ្តល់ឥណទានសម្បទានជាង ៣២ ពាន់លានយ៉េន ស្តារ និងកែលម្អប្រព័ន្ធស្រោចស្រពភាគនិរតីរាជធានីភ្នំពេញ បម្រើផលប្រយោជន៍ដីកសិកម្មរាប់ម៉ឺនហិកតា និងប្រព័ន្ធរំដោះទឹក ។ លោក ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម បានឱ្យដឹងថា ៖ «គោលបំណងនៃគម្រោង គឺដើម្បីបង្កើនផលិតភាពកសិកម្ម និងកាត់បន្ថយការខូចខាតដោយសារទឹកជំនន់នៅតាមតំបន់ជនបទ និងតំបន់ជួបការលំបាក តាមរយៈការស្តារឡើងវិញ និងកែលម្អប្រព័ន្ធស្រោចស្រព និងប្រព័ន្ធរំដោះទឹកដែលមានស្រាប់ ដើម្បីរួមចំណែកលើកកម្ពស់កម្រិតជីវភាពរស់នៅក្នុងប្រទេសកម្ពុជា» ។
សូមជម្រាបថា «គម្រោងកែលម្អ និងស្តារឡើងវិញប្រព័ន្ធស្រោចស្រព និងរំដោះទឹក ភាគនិរតីនៃរាជធានីភ្នំពេញ» គឺជាជំនួយអភិវឌ្ឍន៍ផ្លូវការរបស់ប្រទេសជប៉ុន (ឥណទានសម្បទាន ODA) ដែលគិតត្រឹមឆ្នាំ ២០២៦ នេះ ប្រើប្រាស់ទំហំទឹកប្រាក់សរុប ៣២ ៣២៥លានយ៉េន ។ គម្រោងនេះផងដែរ ស្ថិតនៅសំណង់ទ្វារទឹករលាំងជ្រៃ ក្នុងស្រុកសំរោងទង ខេត្តកំពង់ស្ពឺ ។
លោក ពេជ្រ វាសនា បន្តថា សំណង់ទ្វារទឹកនេះសំខាន់ណាស់ក្នុងខេត្តកំពង់ស្ពឺ ក៏ដូចជាខេត្តកណ្ដាល និងខេត្តតាកែវ ។ ខាងលើនៃសំណង់ទ្វារទឹកយើងនេះមានអាងស្តុកទឹកធំមួយឈ្មោះថា អាងស្តុកទឹកតាសាល ហើយអាងស្តុកទឹកមួយទៀតកំពុងសាងសង់ គឺអាងស្តុកទឹកស្ទឹងឃ្លៀច និងអាងស្តុកទឹកមួយទៀតឈ្មោះថា អាងទឹកស្តុកទឹកស្វាហាប់ ដែលកំពុងចរចាហើយអាចនឹងថាចាប់ផ្ដើមសាងសង់នៅឆ្នាំក្រោយនេះហើយ ដែលជាប្រភពទឹកដ៏សំខាន់មួយសម្រាប់ជួយដល់ខេត្តកំពង់ស្ពឺ យើងនិងខេត្តតាកែវ ខេត្តកណ្តាល និងផ្នែកខ្លះនៃរាជធានីភ្នំពេញ ។
លោក ពេជ្រ វាសនា ថា ៖ «អាងទឹកទាំងបីនេះមិនត្រឹមតែជាប្រភព នៃការផ្គត់ផ្គង់ទឹកដល់ការស្រោចស្រព ដល់ការប្រើប្រាស់ទឹក ក៏ជួយការដល់ថែរក្សា នូវលំហូរបរិស្ថាននៅតាមស្ទឹងទៀត ។ អាងស្តុកទឹកធំនេះបានបម្រើដល់កសិកម្ម ឧស្សាហកម្ម កាត់បន្ថយគ្រោះទឹកជំនន់នៅរដូវវស្សា ហើយផ្ដល់ទឹកនៅរដូវប្រាំង ដល់ប្រជាជនដែលប្រើប្រាស់នៅក្នុងខេត្តកំពង់ស្ពឺ ខេត្តកណ្ដាល និងខេត្តតាកែ និងផ្នែកខ្លះនៃរាជនីភ្នំពេញ ។ លោកថា នេះគឺជាសំណង់មេដែលបែងចែកទឹកស្រោចស្រពទៅប្រឡាយមេរលាំងជ្រៃខាងជើង និងប្រឡាយមេរលាំងជ្រៃខាងត្បូង ដែលអាចស្រោចស្រពលើផ្ទៃដីសរុបទាំងអស់ ១៦៩១០ហិកតា សល់ពីនេះ គឺយើងអាចបង្ហូរទម្លាក់តាមដងស្ទឹងព្រែកត្នោត និងទៅដល់ទ្វារទឹកកណ្ដាលស្ទឹង នៅផ្លូវជាតិលេខ ៣ (ដែលហៅថាសំណង់ 7 មករា) ហើយមានសំណង់សំណង់ 7 មករា ទប់ស្ទឹងទៀត យើងបង្វែរទឹកចេញពីស្ទឹងព្រែកត្នោតចូលស្រោចស្រពទៅលើប្រឡាយប៉េតុងដែលជាជំនួយឥតសំណងរបស់ជប៉ុន គេហៅថាប្រព័ន្ធកណ្តាលស្ទឹង ដែលអាចស្រោចស្រពលើផ្ទៃដីបានជិត ២ពាន់ហិកតាទៀត» ។
លោក ពេជ្រ វាសនា បន្ថែមថា ការគ្រប់គ្រងទឹករបស់យើង មានការប្រយ័ត្នប្រយែងខ្លាំងណាស់ តាំងពីខ្សែរទឹកខាងលើ (បានពីតំបន់ភ្នំ) រហូតដល់បឹងទំនាបមេគង្គ (ទៅដល់ព្រលានថ្មី) កន្ទុយស្ទឹងព្រែកត្នោតយើងនឹងធ្លាក់ទៅដល់ព្រលានថ្មី ។
សូមបញ្ជាក់ថា «គម្រោងកែលម្អ និងស្តារឡើងវិញប្រព័ន្ធស្រោចស្រព និងរំដោះទឹក ភាគនិរតីនៃរាជធានីភ្នំពេញ» មានវិសាលភាពលើផ្ទៃដីស្រោចស្រពនៅក្នុងតំបន់ ក្នុងស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ ជាង ២ពាន់ហិកតា ដែលមានប្រជាពលរដ្ឋទទួលផលជាង ៣ ៧០០គ្រួសារ ។ ទ្វារទឹករលាំងជ្រៃស្រោចស្រពលើផ្ទៃដីជាង ១ម៉ឺន ៦ពាន់ហិកតា និងមានប្រជាពលរដ្ឋទទួលផលជាង ៤ពាន់គ្រួសារ ។ គម្រោងនេះបានចាប់ផ្តើមអនុវត្តនៅខែតុលា ឆ្នាំ ២០១៤ និងគ្រោងបញ្ចប់នៅខែមិថុនា ឆ្នាំ ២០៣០ មានពីរអនុគម្រោងគឺទី ១ អនុគម្រោងរលាំងជ្រៃ និង ២ អនុគម្រោងកណ្តាលស្ទឹង-បាទី ៕
ចែករំលែកព័តមាននេះ