គីម ស៊ីវឡាម បដិសេធការយល់ច្រឡំ ក្រោយនាងបង្ហោះរូបកំពុងសម្រាកព្យាបាលក្នុងមន្ទីរពេទ្យ
- ភ្នំពេញ
រាជធានីភ្នំពេញ ៖ តារាសិចស៊ីគឹម ស៊ីវឡាម បដិសេធចំពោះការយល់ឃើញពីបុគ្គលមួយចំនួនថា នាងរងការវាយដុំ បន្ទាប់ពីឃើញរូបថតមួយសន្លឹករបស់នាងត្រូវគេបង្ហោះលើបណ្តាញសង្គមកំពុងស្ថិតក្នុងមន្ទីរពេទ្យ និងមានស្នាមជាំពេញដៃ ។
កាលពីថ្ងៃទី២៨ តុលា ២០២៦ តារាសម្តែងស្រីរូបនេះបញ្ជាក់ថា «អរគុណដល់ពុកម៉ែ បងប្អូនក្នុងសិល្បៈដែលបារម្ភ និងសួរសុខទុក្ខខ្ញុំ ហើយក៏សុំការអាធ្យាស្រ័យដែរchat មកខ្ញុំមិនបានតប ។
ខ្ញុំគេងសង្គ្រោះបន្ទាន់៤ថ្ងៃហើយ ស្ថានភាពជំងឺខ្ញុំ គឺបេះដូងតាំងពីដើម ហើយពេលនេះផ្លូវដង្ហើមខ្ញុំក៏មិនទាន់ស្រួលដែរ ព្រោះទាក់ទងនឹងសួត ។
សូម បងៗកុំយល់ច្រឡំថាជាំដៃ ត្រូវគេវ៉ៃខ្ញុំ គ្មានអាណាមកហ៊ានប៉ះខ្ញុំទេ ហើយបើប៉ះមែនទាល់តែងាប់រៀងខ្លួន ព្រោះខ្ញុំមិនមែនស្រីសុភាពត្រឹមត្រូវមកឈរឱ្យគេវ៉ៃទេ !
មួយរយៈនេះសុខភាពខ្ញុំខ្សោយខ្លាំង គេងមិនគ្រប់ ញ៉ាំរបស់អត់ប្រយោជន៍ គ្មានកម្លាំងការងារឆាប់ហត់ ធ្វើទុក្ខខ្ញុំសន្លប់ បានបងៗការងារជួយធ្វើម៉េចឱ្យខ្ញុំដឹងខ្លួន ។
បើនិយាយទៅរឿងសន្លប់វិញពីមុន២ខែចូលកាលម៉ែត៣-៤ដង បើខឹងច្រើនដួលដាក់អុកស៊ីសែន ។
សង្ឃឹម បងៗកុំប្រកាន់ដែលឆាត មិនតប បើចង់ដឹងច្បាស់មកមើលនៅមន្ទីរពេទ្យបាន កំពុងតាមដានបេះដូង និងសួត ។
ណាមួយឆ្នាំនេះខ្ញុំគត់ឆ្នាំផង ខែ៤ក្រឡាប់ឡាន៥ជុំ ឥឡូវឈឺជិតងាប់ជិតរស់ដល់ថ្ងៃខួបចូល៣០ឆ្នាំគត់ ឆ្ងល់ខ្លួនឯងម៉េចជីវិតថ្លៃម្ល៉េះ» ។
ក្រោយឃើញការបញ្ជាក់ពីគីម ស៊ីវឡាម បែបនេះមហាជន ជាពិសេសបណ្តាអ្នកគាំទ្ររូបនាងជាច្រើនបានជូនពរនាងឲ្យឆាប់បានជាសះស្បើយ និងមានសុខភាពល្អប្រសើរឡើងវិញ ។
តារាសម្តែងសាច់សខ្ចី រាងខ្ពស់ស្រឡះ ទឹកមុខទាក់ទាញ មានមន្តស្នេហ៍ កញ្ញាគីម ស៊ីវឡាម បច្ចុប្បន្នការងារសិល្បៈហក់ឡើងខ្លាំង ជាពិសេសនោះគឺមានវត្តមានច្រើន ក្នុងMV ចម្រៀងរបស់ផលិតកម្ម ល្បីៗ ។
តារាស្រីរូបនេះបញ្ជាក់ថា ការងារសិល្បៈនាងទទួលបានទាំងអស់ គឺដោយសារការខិតខំប្រឹងប្រែង តស៊ូរបស់នាងផ្ទាល់ ដោយគ្មានខ្សែ ឬបក្ខពួកអ្វីឡើយ ពោលគឺដោយសារសមត្ថភាព និងការខិតខំប្រឹងប្រែង ៕
ចែករំលែកព័តមាននេះ