ពេជ្រ សូលីកា លក់តែសំឡេង មិនលក់…ទេ!
- ភ្នំពេញ
រាជធានីភ្នំពេញ ៖ តារាចម្រៀងពេជ្រ សូលីកា បានឆ្លើយតបទៅកាន់បុគ្គលមួយចំនួនដែលរិះគន់រូបនាង ។ តើគេរិះគន់រឿងអ្វី ហើយនាងឆ្លើយតបបែបណា ?
រូបភាពវីដេអូមួយបានបង្ហោះលើបណ្តាញសង្គម បង្ហាញពីសកម្មភាពរបស់ពេជ្រ សូលីកា ច្រៀងក្នុងភោជនីយដ្ឋានមួយកាលពីពេល ថ្មីៗកន្លងមក ។ ពេលនោះនាងបានស្លៀកខោខ្លីបង្ហាញសាច់យ៉ាងទ្រលុកទ្រលន់ ។
បន្ទាប់ពីទស្សនាវីដេអូនោះ អ្នកខ្លះសរសើរទឹកដមសំឡេង និងរូបសម្រស់របស់ពេជ្រ សូលីកា អ្នកខ្លះរិះគន់ថា នាងធាត់ជាងមុន ខ្លះថាមិនស្អាតទេ… ។
កាលពីថ្ងៃទី២៦ តុលា ២០២៦ ពេជ្រ សូលីកា តបអ្នកថានាងធាត់ នាងមិនស្អាតនោះវិញថា «តាំងពីដើមមកនាងខ្ញុំពេញចិត្តរូបរាងកាយដែលនាងខ្ញុំមានស្រាប់ ។ សម្រាប់ពាក្យរិះគន់របស់បងប្អូន គឺមិនបានចាក់ដោតចូលទៅក្នុងក្រអៅបេះដូងរបស់ខ្ញុំឡើយ ព្រោះបច្ចុប្បន្នខ្ញុំមានភាពរឹងមាំគ្រប់គ្រាន់ ហើយនាងខ្ញុំក៏មិនបានរឹងក្បាលថា គេរិះគន់ប៉ុណ្ណឹងហើយ ម្តេចមិនទៅស្ថាបនាឲ្យស្អាតតាមគេ ។
រាល់ថ្ងៃខ្ញុំពេញចិត្តនូវអ្វីដែលនាងខ្ញុំមានស្រាប់ទៅហើយ ដូច្នេះឈប់រិះគន់ខ្ញុំទៅ ហើយបច្ចុប្បន្ននាងខ្ញុំជាតារាចម្រៀងដែលលក់តែសំឡេង មិនលក់សម្រស់ឡើយ» ។
ពេជ្រ សូលីកា ថាប្រសិនបើនាងចង់ស្គម គឺតែមួយភ្លែតបានហើយ ដោយទៅបូបខ្លាញ់ក្បាលពោះ ខ្លាញ់ដើមដៃ និងហាត់ប្រាណតែបន្តិចគឺស្អាតដូចគេដូចឯងដែរហើយ ។ ប៉ុន្តែសព្វថ្ងៃដោយសារតែនាងមានការហត់នឿយ ព្រោះត្រូវរ៉ាប់រងគ្រួសារតែម្នាក់ឯង ដូច្នេះហើយនាងគ្មានពេលវេលាគិតពីផលប្រយោជន៍ខ្លួនឯងដោយត្រូវតែស្អាតគ្រប់ពេលវេលានោះទេ ព្រោះនាងមានកូន មានប្អូន និងមានកូនចៅជាច្រើនទៀតក្នុងបន្ទុក ។
ពេជ្រ សូលីកា បញ្ជាក់ថា «ខ្ញុំជាតារាចម្រៀងលក់សំឡេង ខ្ញុំអត់បានលក់សម្រស់នោះទេ អញ្ចឹងខ្ញុំអត់សូវខ្វល់ទេរឿងរូបរាងកាយ និងសម្រស់របស់ខ្ញុំ តែនៅក្នុងនាមយើងជាតារាយើងក៏ត្រូវការស្អាតដែរ ។
ប្រសិនបើជាអ្នកគាំទ្ររូបនាងខ្ញុំពិតប្រាកដគួរតែទទួលយកនូវភាពខ្វះខាតរបស់នាងខ្ញុំខ្លះ ព្រោះគ្រប់មនុស្ស ម្នាក់ៗកើតមកក៏មិនប្រាកដមានរូបរាងស្អាតទាំងអស់នោះដែរ» ៕
ចែករំលែកព័តមាននេះ