ក្រសួងកសិកម្ម ជំរុញកសិករចងក្រងជាសហគមន៍កសិកម្មទំនើប ដើម្បីកាត់បន្ថយថ្លៃដើមផលិត និងទទួលបានអត្ថប្រយោជន៍ច្រើន
- ភ្នំពេញ
រាជធានីភ្នំពេញ ៖ នៅថ្ងៃទី ២៥ ខែតុលា ឆ្នាំ ២០២៦ តាមរយៈឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ៖ «បើទោះបីជាវេទិកា និងពិព័រណ៍កសិកម្មកម្ពុជា (CAFE26) ត្រូវបាបបញ្ចប់ ប៉ុន្តែសូមវិស័យឯកជន និងភាគីពាក់ព័ន្ធទាំងអស់ បន្តរក្សាទំនាក់ទំនងដែលឈានទៅដល់ការចុះកិច្ចសន្យា ជាមួយសហគមន៍កសិកម្ម ដើម្បីជំរុញលើការកែច្នៃកសិផល ការអភិវឌ្ឍន៍ភស្តុភារកម្មត្រជាក់ ការបង្កើតកញ្ចប់ហិរញ្ញវត្ថុ ដែលមានភាពបត់បែន កម្ចីការប្រាក់ទាបឆ្លើយតបនឹងបរិបទជាក់ស្តែង ការពង្រឹងខ្សែច្រវាក់តម្លៃ ការតភ្ជាប់ទីផ្សារ និងជំរុញកសិករចងក្រងជាសហគមន៍កសិកម្មទំនើប សំដៅកាត់បន្ថយថ្លៃដើមផលិត និងទទួលបានអត្ថប្រយោជន៍ជាច្រើន» ។
ឯកឧត្តមរដ្ឋមន្ត្រី ក៏បានណែនាំដល់បងប្អូនកសិករថា ប្រជាកសិករ និងសហគមន៍កសិកម្ម សូមបន្តផ្លាស់ប្តូរពីទំលាប់ ដែលមិនមានប្រសិទ្ធភាពសេដ្ឋកិច្ច មកជាការអនុវត្តន៍តាមបច្ចេកទេសថ្មីៗឆ្លាតវៃ ស្របទៅនឹងតម្រូវការទីផ្សារ សូមរួមគ្នាធ្វើកសិកម្មជាទម្រង់កសិកម្មទំនើប ដើម្បីបង្កើនកំលាំងផលិតប្រកបដោយនិរន្តភាព កាត់បន្ថយថ្លៃដើមផលិត និងគាំទ្រក្នុងផ្នែកដើមទុន ការពារពីហានិភ័យទីផ្សារ ទទូលបានការគាំទ្របច្ចេកទេស និងហេដ្ឋារចនាសម្ព័ន្តផ្សេងៗ ក្រសួងនៅក្បែរបងប្អូនជានិច្ច ដោយបញ្ចូនមន្ត្រីកសិកម្ម ឃុំឱ្យចុះជួយតម្រង់ទិស និងដោះស្រាយបញ្ហាប្រឈម ជូនដល់បងប្អូនដល់មូលដ្ឋាន ។
ឯកឧត្តមរដ្ឋមន្ត្រី ក៏បានលើកទឹកចិត្ត ដល់យុវជនឱ្យចូលរួមយ៉ាងសកម្មបន្ថែមទៀត ក្នុងវិស័យកសិកម្មកម្ពុជា ដែលនេះជាកត្តាសំខាន់ និងនាំមកនូវផលប្រយោជន៍ជាច្រើន ក្នុងការស្វែងរកឱកាសសម្រាប់កសិករ ការលើកកម្ពស់ បច្ចេកវិទ្យាកសិកម្ម និងទំនើបកម្មកសិកម្ម សហគ្រិនភាព និងការបង្កើនតម្លៃបន្ថែម សំដៅធានាបានសន្តិសុខស្បៀង ការលើកកម្ពស់ជីវភាពប្រជាពលរដ្ឋ និងការទ្រទ្រង់កំណើនសេដ្ឋកិច្ចជាតិ ។
ឯកឧត្តម រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏បានកោតសរសើរ និងវាយតម្លៃខ្ពស់នូវកិច្ចខិតខំប្រឹងប្រែងអស់ពីកម្លាំងកាយចិត្ត និងការលះបង់ពេលវេលារបស់ក្រុមការងារ CAFE26 ជាពិសេសកិច្ចសហការពីក្រសួងស្ថាប័នពាក់ព័ន្ធ អង្គការដៃគូអភិវឌ្ឍន៍ទាំងអស់ និងបងប្អូនអ្នកចូលរួម ដែលធ្វើឲ្យកម្មវិធីនេះទទួលបានជោគជ័យ និងរលូនគួរជាទីមោទកភាព ។
សូមជម្រាបផងដែរថា វេទិកា (CAFE26) ជាវេទិកាដ៏រស់រវើក និងការតាំងពិព័រណ៍ផលិតផលដ៏សម្បូរបែប ជាពិសេសការចូលរួមយ៉ាងច្រើនកុះករ ដែលបង្ហាញពីស្មារតីសហការគ្នា គ្រប់ភាគីពាក់ព័ន្ធទាំងអស់ ជួបជុំរវាងរដ្ឋាភិបាល វិស័យឯកជន ធុរកិច្ចជន វិនិយោគិនជាតិនិងអន្តរជាតិ ដៃគូអភិវឌ្ឍន៍ បណ្តាអង្គការ អ្នកស្រាវជ្រាវ អ្នកតាក់តែងគោលនយោបាយ អាជីវកម្ម អ្នកផលិត សហគមន៍កសិកម្ម និងកសិករ ផ្សាភ្ជាប់ទំនាក់ទំនង ការកសាងភាពជាដៃគូយូរអង្វែង ការតភ្ជាប់ខ្សែច្រវាក់តម្លៃកសិស្បៀងអាហារ ការផ្គូផ្គងអាជីវកម្ម ការចែករំលែកចំណេះដឹង និងបទពិសោធន៍ពីវាគ្មិនកិត្តិយសសំខាន់ៗ ដែលជាទិសដៅនៃកម្មវិធីនាពេលនេះ សំដៅប្រមូលផ្តុំកម្លាំងអភិវឌ្ឍន៍វិស័យកសិកម្មកម្ពុជាឱ្យដើរទៅមុខប្រកបដោយភាពស្វាហាប់ ការបង្កើតបរិយាកាសវិនិយោគ និងប្រព័ន្ធអេកូឡូស៊ីកសិកម្ម ៕
ចែករំលែកព័តមាននេះ