សិស្សនិទ្ទេស A ចំនួន២៥រូបបន្ថែមទៀត នៅខេត្តកំពង់ឆ្នាំង ទទួលបានរង្វាន់លើកទឹកចិត្ត
- កំពង់ឆ្នាំង
ខេត្តកំពង់ឆ្នាំង៖ សិស្សនិទ្ទេស A ចំនួន២៥រូប បន្ថែមទៀតក្នុងចំណោម៣១ រូប ទូទាំងខេត្តកំពង់ឆ្នាំង ឆ្នាំសិក្សា ២០២៥-២០២៦ ក្នុងនោះមកពីក្រុងកំពង់ឆ្នាំង ស្រុករលាបៀរ ស្រុកកំពង់ត្រឡាច និងស្រុកកំពង់លែង បានទទួលរង្វាន់លើកទឹកចិត្ត ពីរដ្ឋបាលខេត្តកំពង់ឆ្នាំង សហការជាមួយព្រះអង្គ ចន្ទមុន្នី ចៅអធិការវត្តចន្ទប្បជោត្តនារាម ហៅវត្តសុត ។
ពិធីផ្តល់រង្វាន់លើកទឹកចិត្តដល់សិស្សនិទ្ទេស A ខាងលើនេះបានធ្វើឡើងកាលពីរសៀលថ្ងៃទី២៤ ខែតុលា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ព្រះអង្គ ចន្ទមុន្នី ចៅអធិការវត្ត ចន្ទប្បជោត្តនារាម ហៅវត្តសុត មន្ត្រីរាជការ មន្ទីរជុំវិញខេត្ត លោកគ្រូ អ្នកគ្រូ មាតាបីតាសិស្ស ជាច្រើនរូប។
ឯកឧត្តមបណ្ឌិតសភាចារ្យ អ៊ុក រ៉ាប៊ុន បានសម្ដែងនូវការអបអរសាទរយ៉ាងកក់ក្តៅ និងបានគូសបញ្ជាក់ថា ជោគជ័យដ៏ត្រចះត្រចង់នេះកើតចេញពីការខិតខំប្រឹងប្រែងផ្ទាល់ខ្លួនរបស់សិស្សានុសិស្ស។ ការលះបង់ និងការបណ្ដុះបណ្ដាល ពីសំណាក់លោកគ្រូ អ្នកគ្រូ និងអាណាព្យាបាល។ គោលនយោបាយអប់រំដ៏ត្រឹមត្រូវ របស់រាជរដ្ឋាភិបាល ក្នុងការលើកកម្ពស់គុណភាពធនធានមនុស្ស។
ក្នុងឱកាសដ៏ថ្លៃថ្លានោះដែរ ព្រះអង្គ ចន្ទមុន្នី បានផ្ដល់អនុសាសន៍សំខាន់ៗដល់សិស្សានុសិស្ស ត្រូវខិតខំ បន្តរៀនសូត្រ រៀនសូត្របន្ត ដើម្បីយកលទ្ធផលល្អ ធ្វើជាទុន និងជាស្ពានដើម្បីបន្តក្រេបជញ្ជក់ចំណេះដឹងលើមុខវិជ្ជាដែលត្រូវរៀន សម្រាប់អនាគត ។ រក្សាសីលធម៌ ប្រកាន់ខ្ជាប់នូវចរិតស្លូតបូត គុណធម៌ និងការគោរពប្រណិប័តន៍ព្រះពុទ្ធសាសនា ជៀសឆ្ងាយពីគ្រឿងញៀន ព្រោះគ្រឿងញៀនមិនស្គាល់សិស្សនិទ្ទេស A នោះឡើយ។សូមកុំចង់សាកល្បងអោយសោះ ។ ជាពិសេសត្រៀមខ្លួនបម្រើជាតិ ខិតខំអភិវឌ្ឍន៍សមត្ថភាពផ្ទាល់ខ្លួន ដើម្បីក្លាយជាសសរទ្រូងដ៏រឹងមាំក្នុងការចូលរួមអភិវឌ្ឍន៍ប្រទេសជាតិនាពេលអនាគត ៕
ចែករំលែកព័តមាននេះ