រាជធានីភ្នំពេញ ៖ ការជន់លិចដោយជំនន់ទឹកភ្លៀងនៅចំណុចខ្លះ នៃរាជធានីភ្នំពេញប៉ុន្មានថ្ងៃនេះ វាមិនធ្ងន់ធ្ងរទេ ដោយសារចុងរដូវវស្សា អាចនៅមានស្ថានភាពភ្លៀងជាប់ៗគ្នាជាច្រើន និងបន្តបន្ទាប់។ ប៉ុន្តែទោះបីជាយ៉ាងណា អាជ្ញាធររាជធានី មន្ទីរជំនាញ និងអាជ្ញាធរខណ្ឌ មិនបានទំនេរដៃដោះស្រាយនោះទេ ។
លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានបញ្ជាក់ឱ្យដឹងនារសៀលថ្ងៃទី២៣ តុលា ២០២៦ នេះថា ក្រោមការដឹកនាំរបស់លោក ឃួង ស្រេង អភិបាលរាជធានីភ្នំពេញ ការងារស្តារប្រឡាយ ស្ដារប្រព័ន្ធលូ និងការស្ថាបនាស្ថានីយបូមទឹកថ្មី ត្រូវបានរដ្ឋបាលរាជធានីភ្នំពេញ អាជ្ញាធរខណ្ឌ និងមន្ទីរជំនាញ សម្រុកធ្វើយុទ្ធនាការស្ដារតាំងពីរដូវប្រាំងមកម្ល៉េះ បានជាច្រើនខ្សែ និងជាបន្តបន្ទាប់ ដោយមានទាំងគម្រោងហិរញ្ញប្បទានរបស់រាជរដ្ឋាភិបាល តាមរយៈក្រសួងពាក់ព័ន្ធផងដែរ ។
ជាលទ្ធផល នៃការអនុវត្តគម្រោងទាំងនោះ ឃើញថាស្ថានភាព នៃការជន់លិចក៏មិនមានរយៈពេលយូរថ្ងៃដូចឆ្នាំកន្លងមកដែរ ។
លោកស្រីបន្តថា ការជន់លិចដោយជំនន់ទឹកភ្លៀង នៅចំណុចខ្លះ នៃរាជធានីភ្នំពេញ ប៉ុន្មានថ្ងៃនេះ ក៏មិនធ្ងន់ធ្ងរទេ ដោយសារចុងរដូវវស្សាអាចនៅមានស្ថានភាពភ្លៀងជាប់ៗគ្នាជាច្រើន និងបន្តបន្ទាប់។ ប៉ុន្តែទោះបីជាយ៉ាងណា អាជ្ញាធររាជធានី មន្ទីរជំនាញ និងអាជ្ញាធរខណ្ឌ មិនបានទំនេរដៃដោះស្រាយនោះទេ ។
ជាក់ស្ដែង ដោយមានការណែនាំពីលោក ឃួង ស្រេង អភិបាលរាជធានីភ្នំពេញ, លោក ឯក ឃុនដឿន អភិបាលរងរាជធានីភ្នំពេញ និងលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ នៅព្រឹកថ្ងៃទី២៣ តុលា ឆ្នាំ២០២៦នេះ បានដឹកនាំក្រុមការងារចុះពិនិត្យ និងបើកទ្វារទឹកប្រឡាយអមផ្លូវដែក ដើម្បីរំដោះជំនន់ទឹកភ្លៀង ដែលលិចផ្លូវជាតិលេខ៤ ក្នុងភូមិសាស្ត្រខណ្ឌកំបូល រាជធានីភ្នំពេញ ។
បន្ថែមពីនេះ កាលពីម្សិលមិញ ថ្ងៃទី២២ តុលា លោក ឯក ឃុនដឿន ក៏បានចុះពិនិត្យស្ថានភាពទឹកជន់លិច នៅម្ដុំវត្តសំរោងអណ្តែត ស្ថិតក្នុងខណ្ឌសែនសុខ រួមជាមួយលោក ចេង មុនីរ៉ា អភិបាល នៃគណៈអភិបាលខណ្ឌសែនសុខ ដើម្បីធ្វើយ៉ាងណារកមធ្យោបាយរំដោះជំនន់ទឹកភ្លៀង កុំឱ្យលិចលង់លំនៅឋានប្រជាពលរដ្ឋ ។
លោកស្រីអ្នកនាំពាក្យ ក៏បានសូមការសហការពីបងប្អូនប្រជាពលរដ្ឋនៅតាមមូលដ្ឋាន ជួយទុកដាក់វិចខ្ចប់សំរាមឱ្យបានត្រឹមត្រូវ ពិសេសកុំនាំគ្នាបោះចូលក្នុងប្រឡាយ និងលូ ដែលបង្កឱ្យស្ទះចរន្ធទឹកហូរ ៕
ចែករំលែកព័តមាននេះ