ខេត្តប៉ៃលិន ៖ ប្រជាពលរដ្ឋ២គ្រួសារ ទទួលរងគ្រោះដោយសារការឆ្លងចរន្តអគ្គិសនីឆាបឆេះផ្ទះ១ខ្នង រួចក៏ឆេះបន្តបន្ទាប់គ្នា ខណៈដែលម្ចាស់ចាក់សោទុក ។
ហេតុការណ៍អគ្គិភ័យឆាបឆេះផ្ទះប្រជាពលរដ្ឋនេះ បានកើតឡើងនៅវេលាម៉ោង៤ និង៤៥នាទីរសៀលថ្ងៃទី១៧ ខែតុលា ឆ្នាំ២០២៦ ត្រង់ចំណុចមុខស្ថានីយ៍ប្រេងសាំងតេលា សុខ លឿន ស្ថិតនៅក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីអាជ្ញាធរមូលដ្ឋាន បានឱ្យដឹងថា ម្ចាស់ផ្ទះមាន ឈ្មោះ ស៊ូ ស្រីមុំ ភេទស្រី អាយុ២៨ឆ្នាំ ជនជាតិខ្មែរអ៊ិស្លាម មានទីលំនៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ស្នាក់នៅបណ្ដោះអាសន្នក្នុងភូមិប៉ាងរលឹម សង្កាត់អូរតាវៅ ក្រុងប៉ៃលិន ខេត្តប៉ៃលិន។
ប្រភពដដែលបានបន្តទៀតថា មុនពេលកើតហេតុកាលពីវេលាម៉ោង០៣និង៣០នាទីរសៀល ម្ចាស់ផ្ទះបានបិទប៉ារ៉ែតភ្លើងអគ្គិសនី និងចាក់សោផ្ទះចោល រួចធ្វើដំណើរទៅទីរួមខេត្ដប៉ៃលិន ដូចសព្វ១ដង។ ស្រាប់តែនៅវេលាម៉ោង០៣និង៤៥នាទី មានប្រជាពលរដ្ឋបានទូរស័ព្ទប្រាប់ថា មានករណីភ្លើងឆេះផ្ទះ ទើបគាត់បានជិះម៉ូតូត្រឡប់មកវិញ ក៏ប្រទះឃើញផ្ទះរបស់ខ្លួនពិតជាបានឆាបឆេះយ៉ាងសន្ធោសន្ធៅបាត់ទៅហើយ ក៏ស្រែកទ្រហោយំឱ្យគេឯងជួយយកទឹកទៅពន្លត់ តែអ្វីៗបានហួសពេលបាត់ទៅហើយ ។
ប្រភពដដែលបញ្ជាក់ថា សម្ភារៈដែលទទួលរងការខូចខាតរួមមាន ៖ ទី១-ផ្ទះ១ខ្នង ទំហំ៥ គុណ១៥ម ធ្វើអំពីដែក ប្រក់ដំបូលស័ង្កសី ខូចខាតទាំងស្រុង, ទី២- ម៉ាស៊ីនបោកខោអាវ ចំនួន១គ្រឿង, ទី៣- ទូរទឹកកក ចំនួន១គ្រឿង, ទី៤-ម៉ូតូម៉ាកវ៉េវស៊េរី ឆ្នាំ២០១២ ចំនួនមួយគ្រឿង, ទី៥-ឯកសារសំបុត្រកំណើតសៀវភៅគ្រួសារ សម្លៀកបំពាក់ និងសម្ភារៈប្រើប្រាស់មួយចំនួន, ទី៦- ធុងហ្គាសនៅសល់ ចំនួន៩ធុង និងសំបកធុងហ្គាសមួយចំនួន, ទី៧-ម៉ូទ័របូមហ្គាស ចំនួន១គ្រឿង -សរុបទឹកប្រាក់ប្រហែល ចំនួន៤៣០០ដុល្លារ ។
ករណីខាងលើនេះ បង្កឱ្យប៉ះពាល់ដល់ផ្ទះប្រជាពលរដ្ឋដែលនៅក្បែរគ្នា ចំនួន២ខ្នងផ្ទះ ដូចខាងក្រោម ៖
ផ្ទះទី១ ៖ ម្ចាស់ឈ្មោះ តន អៀង ភេទស្រីអាយុ៤៦ឆ្នាំ មុខរបរលក់ម្ហូប និងអីវ៉ាន់ចាប់ហួយ តិចតួច មានទីលំនៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្ដប៉ៃលិន -សម្ភារៈខូចខាតផ្ទះខូចខាត៨០% ១-ផ្ទះទំហំ៥ គុណ១២ម៉ែត្រ ធ្វើអំពីឈើប្រកដំបូង ស័ង្កសី ២-អង្ករ ចំនួន៤ការ៉ុង និងអីវ៉ាន់ម្ហូប និងអីវ៉ាន់ចាប់ហួយខូចខាតមួយចំនួន ៣-ខ្យូង ចំនួន៣០បេ ៤-សម្ភារៈសម្លៀក បំពាក់មួយចំនួន -សរុបទឹកប្រាក់ប្រហែល ចំនួន១៥០០ដុល្លារ ។
ផ្ទះទី២ ៖ ម្ចាស់ឈ្មោះ ស៊ុន ភារិន ភេទប្រុសអាយុ៣៥ឆ្នាំ មុខរបរជាងក្រឡឹងដែក មានទីលំនៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្ដប៉ៃលិន -ផ្ទះ១ខ្នងទំហំ៥ គុណ១២ម៉ែត្រ ធ្វើអំពីដែកប្រក់ដំបូលស័ង្កសី២០% ១-សម្ភារៈខូចខាត ជញ្ជាំងស័ង្កសីនិងដំបូល១ចំហៀងផ្ទះ ២-សម្ភារៈគ្រឿងបន្លាស់មួយចំនួន -សរុបទឹកប្រាក់ទាំងអស់ ប្រហែល១០០០ដុល្លារ ។
ករណីខាងលើនេះ កម្លាំងរដ្ឋបាលក្រុងប៉ៃលិន ដឹកនាំដោយលោកអភិបាលក្រុង លោកវរសេនីយ៍ទោ មាឃ សារ៉ន អធិការនគរបាលក្រុងប៉ៃលិន បានដឹកនាំកម្លាំងវេនប្រចាំបញ្ជា នៃអធិការដ្ឋាននគរបាលក្រុងប៉ៃលិន, កម្លាំងប៉ុស្តិ៍នគរបាលរដ្ឋបាលក្រុងប៉ៃលិន សហការជាមួយកម្លាំងបង្ការពន្លត់ អគ្គិភ័យ និងសង្គ្រោះ និងកម្លាំងវេនប្រចាំបញ្ជា នៃស្នងការដ្ឋាននគរបាលខេត្តប៉ៃលិន ប្រើប្រាស់ទឹកអស់ ចំនួន៣រថយន្ត ធ្វើការបាញ់ពន្លត់ភ្លើងរលត់ទាំងស្រុង ៕
ចែករំលែកព័តមាននេះ