ក្រោយកំណាត់ផ្លូវរងការខូចខាតដោយជំនន់ទឹកភ្លៀង នៅស្រុកសាមគ្គីមានជ័យ រដ្ឋមន្ត្រីក្រសួងអភិវឌ្ឍន៍ជនបទដឹកនាំមន្ត្រីជំនាញចុះនិងណែនាំត្រូវជួសជុលជាបន្ទាន់
- កំពង់ឆ្នាំង
ខេត្តកំពង់ឆ្នាំង ៖ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានណែនាំដល់អគ្គនាយកដ្ឋានបច្ចេកទេសរបស់ក្រសួង និងមន្ទីរអភិវឌ្ឍន៍ជនបទខេត្តកំពង់ឆ្នាំង សហការជាមួយអាជ្ញាធរមូលដ្ឋានស្រុក និងឃុំធ្វើការជួសជុលជាបន្ទាន់នូវកំណាត់ផ្លូវត្រង់ចំណុចដែលរងការខូចខាត ដោយសារជំនន់ទឹកភ្លៀង ដើម្បីឱ្យប្រជាជនប្រើប្រាស់បានដូចដើមវិញ ។
មានប្រសាសន៍បែបនេះ ក្នុងពេលឯកឧត្តម រួមដំណើរដោយឯកឧត្តមជាថ្នាក់ដឹកនាំ មន្ត្រីបចេ្ចកទេសក្រសួង និងមន្ត្រីនៃមន្ទីរអភិវឌ្ឍន៍ជនបទខេត្តកំពង់ឆ្នាំង ព្រមទាំងមានការចូលរួមពីសំណាក់អាជ្ញាធរមូលដ្ឋាន អញ្ជើញចុះពិនិត្យជាក់ស្ដែងហេដ្ឋារចនាសម្ព័ន្ធផ្លូវជនបទចំនួន០៣ខ្សែ ដែលបានរងផលប៉ះពាល់ដោយសារជំនន់ទឹកភ្លៀង ធ្វើឱ្យហូរច្រោះផ្លូវនៅក្នុងស្រុកសាមគ្គីមានជ័យ ។
ក្រោយការត្រួតពិនិត្យ បានរកឃើញចំណុចខូចខាត រួមមាន៖ ខ្សែទី១ ផ្លូវផ្សារត្រាចទៅដល់វត្តព្រះធាតុ ជាផ្លូវក្រាលកៅស៊ូពីរជាន់មានប្រវែងសរុប៣៥គ.ម. ទទឹង៦ម៉ែត្រ តភ្ជាប់ពីផ្លូវជាតិលេខ៥ ត្រង់ចំណុចផ្សារត្រាច ឃុំស្វាយ ដោយឆ្លងកាត់ ឃុំត្បែងខ្ពស់ ឃុំស្វាយជុក ទៅដល់ភូមិច្រកូវ ឃុំពាម ស្រុកសាមគ្គីមានជ័យ ។ ផ្លូវនេះ ត្រូវបានកសាងដោយក្រសួងអភិវឌ្ឍន៍ជនបទក្នុងឆ្នាំ២០១៥ ក្រោមក្របខណ្ឌគម្រោងកែលម្អផ្លូវជនបទជំហានទី១ (RRIP-I) ដោយប្រើប្រាស់ហិរញ្ញប្បទានពីធនាគារអភិវឌ្ឍន៍អាស៊ី (ADB) ។ នៅលើខ្សែផ្លូវនេះ ត្រូវបានទឹកទឹកហូរច្រោះជើងទេរ លូប្រអប់០១កន្លែង ។
ខ្សែទី២-ឈ្មោះផ្លូវជំទាវជ្រែង ទៅដល់ទ្រម៉ូងជ្រុំ ជាផ្លូវកម្រាលល្បាយក្រួសក្រហម មានប្រវែង៩,២០គ.ម. ទទឹង៦ម៉ែត្រ តភ្ជាប់ពីភូមិជំទាវជ្រែង ទៅដល់ភូមិទ្រម៉ុងជ្រុំ ឃុំក្រាំងល្វា ស្រុកសាមគ្គីមានជ័យ ។ ផ្លូវនេះ ត្រូវបានកសាងដោយនាយកដ្ឋានអភិវឌ្ឍន៍ហេដ្ឋារចនាសម្ព័ន្ធផ្លូវជនបទនៃក្រសួងអភិវឌ្ឍន៍ជនបទ ក្នុងឆ្នាំ២០១៨ ដោយប្រើប្រាស់ថវិការបស់រាជរដ្ឋាភិបាល ។
នៅលើខ្សែផ្លូវនេះ ត្រូវបានទឹកទឹកហូរច្រោះជើងទេរ និងចិញ្ចើមផ្លូវម្ខាង ប្រវែងប្រហែល ១០០ម៉ែត្រ ប៉ុន្ដែនៅអាចធ្វើចរាចរណ៍លើផ្លូវមួយចំហៀងបានជាធម្មតា ។ ផ្លូវ០១ខ្សែនេះ ត្រូវបានក្រសួងដាក់ទៅក្នុងគម្រោងស្ថាបនាផ្លូវធន់នឹងការប្រែប្រួលអាកាសធាតុ ក្រោមហិរញ្ញប្បទានដៃគូអភិវឌ្ឍន៍ នាពេលខាងមុខនេះ និង ខ្សែទី៣-ឈ្មោះផ្លូវ ស្ពានពោធិ ទៅដល់ស្ថានីយ៍រថភ្លើង មា.នកជាប្រភេទផ្លូវកម្រាលកៅស៊ូពីរជាន់ (DBST) មានប្រវែង ១២,៥០គ.ម. តភ្ជាប់ពីផ្លូវជាតិលេខ៥ ភូមិស្ពានពោធិ ឃុំសេដ្ឋី ទៅដល់ភូមិ មា.នក កើតឃុំត្បែងខ្ពស់ ស្រុកសាមគ្គីមានជ័យ ។
ផ្លូវនេះ ត្រូវបានកសាងដោយក្រសួងអភិវឌ្ឍន៍ជនបទក្នុងឆ្នាំ២០១៥ ក្រោមក្របខណ្ឌគម្រោងកែលម្អផ្លូវជនបទជំហានទី១ (RRIP-I) ដោយប្រើប្រាស់ហិរញ្ញប្បទានពីធនាគារអភិវឌ្ឍន៍អាស៊ី (ADB) ។ នៅលើខ្សែផ្លូវនេះ ត្រូវបានទឹកភ្លៀងជន់លិច និងហូរកាត់ផ្លូវ ប៉ុន្ដែនៅអាចបន្ដធ្វើចរាចរណ៍ទូទៅបានជាធម្មតា ។
ចែករំលែកព័តមាននេះ