ខេត្តប៉ៃលិន ៖ នាព្រឹកថ្ងៃទី១៣ ខែតុលា ឆ្នាំ២០២៦ លោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញសំណេះសំណាល សួរសុខទុក្ខ និងជូនដំណើរប្រជាពលរដ្ឋ ដែលវិលត្រឡប់ទៅធ្វើការវិញ បន្ទាប់ពីបាន មកលេងស្រុកកំណើត ក្នុងឱកាសពិធីបុណ្យភ្ជុំបិណ្ឌ និងថ្លែងអំណរគុណដល់រាជរដ្ឋាភិបាល ចំពោះកម្មវិធីជិះរថយន្តក្រុងដោយឥតគិតថ្លៃ របស់រដ្ឋាករស្វយ័ត ដឹកជញ្ជូនសាធារណៈរថយន្តក្រុង City Bus រាជធានីភ្នំពេញ ។
លោកជំទាវ បាន ស្រីមុំ បានថ្លែងអំណរគុណសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ដែលបានណែនាំឱ្យរដ្ឋបាលរាជធានីភ្នំពេញ សហការជាមួយក្រសួងការងារ និងបណ្តុះបណ្តាលវិជ្ជាជីវ ដើម្បីរៀបចំជូនដំណើរប្រជាពលរដ្ឋ កម្មករ កម្មការិនី ធ្វើការនៅរាជធានីភ្នំពេញ ទៅតាមបណ្តាខេត្តទាំង២៤ ដោយមិនគិតថ្លៃ តាមការប្រើប្រាស់សេវារថយន្តក្រុង City Bus សាធារណៈរាជធានីភ្នំពេញ ដើម្បីជួបជុំសាច់ញាតិនៅរដូវបុណ្យភ្ជុំបិណ្ឌ ហើយជារៀងរាល់ឆ្នាំប្រជាពលរដ្ឋ បានមកទទួលសេវាជិះរថយន្តក្រុង ឥតគិតថ្លៃនេះ ប្រមាណ៥ទៅ ៦ម៉ឺននាក់ ដែលអាចកាត់បន្ថយការចំណាយបានច្រើន ។
លោកជំទាវអភិបាលខេត្ត បានបញ្ជាក់ថា ជារៀងរាល់ឆ្នាំ រដ្ឋបាលរាជធានីភ្នំពេញ ទទួលនូវការណែនាំ និងអនុសាសន៍ដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី ក្នុងការបម្រើ ប្រជាពលរដ្ឋ ក្នុងរដូវបុណ្យទាន ហើយបន្ទាប់មកទៀត ក្នុងនីតិកាលទី៧នេះ សម្តេចធិបតី ហ៊ុន ម៉ាណែត ក៏បន្តប្រពៃណីនេះ តាមគោលការណ៍របស់សម្តេចតេជោ ដោយបានឱ្យរដ្ឋបាលរាជធានី ភ្នំពេញ រៀបចំរថយន្តក្រុង ចំនួន៦០០គ្រឿង ដើម្បីជូនដំណើរប្រជាពលរដ្ឋ ទៅបុណ្យភ្ជុំបិណ្ឌតាមប្រពៃណីជាតិ នៅតាមបណ្តាខេត្ត ទាំងពេលធ្វើដំណើរទៅស្រុក កំណើត និងពេលវិលត្រឡប់មកធ្វើការវិញ ។
ចំណែកប្រជាពលរដ្ឋ បានថ្លែងអំណរគុណដល់រាជរដ្ឋាភិបាល និងរាជធានីភ្នំពេញ ចំពោះកម្មវិធីផ្តល់សេវា រថយន្តក្រុងសាធារណៈ City Bus ដោយឥតបង់ប្រាក់ ជាពិសេសតែងតែដាក់ឱ្យដំណើរការក្នុងឱកាសបុណ្យទានធំៗ ដូចជាបុណ្យចូលឆ្នាំថ្មី ឬបុណ្យភ្ជុំបិណ្ឌ គឺពិតជាបានជួយសម្រាលបន្ទុកចំណាយរបស់ពួកគាត់ ដែលជាកម្មករ កម្មការិនី និងនិស្សិត យ៉ាងច្រើន ក្នុងការធ្វើដំណើរ ទៅលេងស្រុកកំណើត និងជួបជុំក្រុមគ្រួសារ ។
តាមសេចក្តីជូនដំណឹងរបស់រដ្ឋបាលរាជធានី បានឱ្យដឹងថា៖ រដ្ឋបាលរាជធានីភ្នំពេញ នឹងរៀបចំរថយន្តក្រុង ចំនួន ៦០០គ្រឿង សម្រាប់បម្រើសេវាដឹកជញ្ជូនសាធារណៈ ដោយមិនបង់ប្រាក់ រយៈពេល ០៥ថ្ងៃ ចាប់ពីថ្ងៃទី០៩ ដល់ ថ្ងៃទី១៣ ខែតុលា ឆ្នាំ២០២៦ ដើម្បីជួយសម្រួលដល់ការចំណាយរបស់ប្រជាពលរដ្ឋ ក្នុងការធ្វើដំណើរ ទៅលេងស្រុកកំណើត ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរផងដែរ ៕
ចែករំលែកព័តមាននេះ