កិច្ចបញ្ចប់បុណ្យភ្ជុំបិណ្ឌ! ពិធីដង្ហែដូនតា និងអត្ថន័យដ៏ជ្រាលជ្រៅនៃជំនឿ
- សៀមរាប
ខេត្តសៀមរាប ៖ កាលពីថ្ងៃទី១២ ខែតុលា ឆ្នាំ២០២៦ នៅវត្តសំរោង ស្ថិតក្នុងភូមិសំរោងជើង ឃុំសំរោង ស្រុកសូទ្រនិគម ខេត្តសៀម រាប បានរៀបចំពិធីដង្ហែដូនតា ដើម្បីបន្តអនុវត្តទំនៀមទម្លាប់របស់ខ្មែរ ។
ពិធីដង្ហែដូនតានេះ មានអត្ថន័យជ្រាលជ្រៅពាក់ព័ន្ធនឹងជំនឿ ការគោរពដឹងគុណចំពោះបុព្វការីជន និងការថែរក្សាមរតកវប្បធម៌ប្រពៃណីពីដូនតាឱ្យបានគង់វង្ស ក្រោយពិធីបុណ្យកាន់បិណ្ឌ និងបុណ្យភ្ជុំបិណ្ឌ ដែលជាពិធីបុណ្យប្រពៃណីព្រះពុទ្ធសាសនា ដ៏សំខាន់មួយរបស់ប្រជាជនខ្មែរ ត្រូវបានបញ្ចប់ ។
ពិធីដង្ហែដូនតា គឺជាទំនៀមទម្លាប់មួយដែលមានការអនុវត្តខុសៗគ្នាទៅតាមតំបន់ និងសហគមន៍ ដោយមានការជួបជុំគ្នារបស់ប្រជាពលរដ្ឋ អាចារ្យ ព្រមទាំងពុទ្ធបរិស័ទ ដើម្បីចូលរួមក្នុងកិច្ចពិធីតាមប្រពៃណីដែលសហគមន៍បានប្រណិប័តន៍តាំងពីបុរាណកាលមក។
តាមរយៈពិធីនេះ ប្រជាពលរដ្ឋបានបង្ហាញពីការគោរពស្រឡាញ់ និងការដឹងគុណចំពោះបុព្វការីជន ដែលបានចែកឋានទៅ ព្រមទាំងបន្តបណ្តុះស្មារតីកូនចៅជំនាន់ក្រោយឱ្យយល់ដឹងពីតម្លៃនៃប្រពៃណីខ្មែរ និងចេះថែរក្សាទំនៀមទម្លាប់ដ៏ល្អរបស់ខ្មែរ។
លោក គង់ ស្រស់ ហៅអាចារ្យ យ៉ត បានមានប្រសាសន៍ថា ក្រោយពីពិធីបុណ្យភ្ជុំបិណ្ឌបានបញ្ចប់ទៅ គឺដល់ពេលដែលវិញ្ញាណក្ខន្ធញាតិកាគ្រប់ៗសន្តាន ត្រូវវិលត្រឡប់ទៅកាន់ទីកន្លែងដើមវិញ ទើបមានការរៀបចំពិធីដង្ហែ ឬបញ្ជូនដូនតាដើម្បីបញ្ចប់កិច្ច។
លោកបន្តថា កាលពីមុន ពិធីនេះគឺធ្វើតែតាមផ្ទះរៀងៗខ្លួនប៉ុណ្ណោះ ប៉ុន្តែសម្រាប់ឆ្នាំនេះ ព្រះតេជគុណ ថង់ ចន្ថា ព្រះគ្រូចៅ អធិការវត្តសំរោង បានរៀបចំឱ្យមានការជួបជុំគ្នាច្រើន និងធ្វើការដង្ហែរតាមផ្លូវសាធារណៈ ដើម្បីឱ្យសាធារណៈជន ជាពិសេសយុវជនជំនាន់ក្រោយបានឃើញ និងធ្វើការសិក្សាឈ្វេងយល់ រួមគ្នាថែរក្សាប្រពៃណីទំនៀមទម្លាប់នេះបន្តទៅមុខទៀត។
លោកអាចារ្យ យ៉ត បានបន្តថា ការរក្សាប្រពៃណីទំនៀមទម្លាប់មិនត្រឹមតែជាការបន្តនូវជំនឿ ដែលមានតាំងពីបុរាណកាលប៉ុណ្ណោះទេ ប៉ុន្តែក៏ជាការពង្រឹងសាមគ្គីភាពក្នុងក្រុមគ្រួសារ និងសហគមន៍ ព្រមទាំងជម្រុញឱ្យកូនចៅចេះគោរពចាស់ទុំ ស្រឡាញ់វប្បធម៌ជាតិ និងចូលរួមថែរក្សាមរតកប្រពៃណីខ្មែរឱ្យបានយូរអង្វែង។
នៅក្នុងពិធីនេះដែរ យើងសង្កេតឃើញថា គេយកដើមចេកមកឆ្លាក់ក្បាច់ ឬឆ្លាក់ធ្វើជារាងក្បូន ឬរានទេវតា/រានព្រលឹង និងទូក តំណាងឱ្យយានជំនិះសម្រាប់ឲ្យវិញ្ញាណក្ខន្ធដូនតាជិះត្រឡប់ទៅកាន់ទីកន្លែង ឬពិភពរបស់ខ្លួនវិញ ។ ដោយមានការតុបតែងក្បូន គេរៀបចំដាក់ស្លឹកត្នោត ស្លឹកចេក ព្រមទាំងចំណីអាហារ ផ្លែឈើ និងនំចំណីផ្សេងៗ នៅលើក្បូននោះ ដើម្បីជាស្បៀងអាហារជូនដូនតាធ្វើដំណើរតាមផ្លូវ៕
ចែករំលែកព័តមាននេះ