វ័យ៣១ឆ្នាំ មិនទាន់យកគូជីវិត អតីតបេក្ខភាពបវរកញ្ញា ហួត ស្រីខួច ទម្លាយមូលហេតុពិត
- ភ្នំពេញ
រាជធានីភ្នំពេញ ៖ តារាសម្តែង និងជាអតីតបេក្ខភាពបវរកញ្ញា ហួត ស្រីខួច បានប្រាប់ពីមូលហេតុដ៏សំខាន់មួយដែលធ្វើឲ្យនាងមិនទាន់អាចយកគ្រួសារបាននៅឡើយ បើទោះបីជាបច្ចុប្បន្ននាងបានឈានចូលដល់វ័យ៣១ឆ្នាំ ហើយក៏ដោយ ។
មូលហេតុនោះត្រូវបានតារាស្រីរូបនេះបញ្ជាក់ថា ដោយសារតែនាងនៅមិនទាន់ជួបមនុស្សប្រុសល្អពិតប្រាកដតាមអ្វីដែលនាងចង់បាន ខណៈពេលដែលរឿងយកគ្រួសារនេះមិនមែននាងមិនគិត និងមិនចង់បាននោះឡើយ ព្រោះបច្ចុប្បន្ននាងក៏មានវ័យកាន់តែច្រើនហើយដែរ ។
តាមរយះសំណេរបង្ហោះលើបណ្តាញសង្គម បេក្ខភាពបវរកញ្ញាលំដាប់រងទី៣ Miss Universe Cambodia 2025 ហួន ស្រីខួច បានលើកឡើងថា អាយុ 31 ឆ្នាំហើយ គេសួរថា ហេតុអ្វីមិនយកគ្រួសារ ចម្លើយ ៖ មិនមែនមិនចង់យកទេ ចង់បាន តែមិនទាន់ជួបមនុស្សល្អពិតប្រាកដ ។
កញ្ញាបានបន្តថា ធ្វើជាមនុស្សស្រីរឹងមាំពិតជាពិបាក តែក៏មានមោទនភាព ដែលឆ្លងរឿងមេរៀនជិវិតជាច្រើន ធ្វើអោយខ្ញុំរឹងមាំផ្លូវចិត្ត នឹងផ្លូវកាយ ។
កញ្ញាបញ្ជាក់ថា និយាយពីរឿងគូជិវិតវិញ គឺចង់បានអ្នកដែលមានចិត្តល្អ ចេះគោរពមនុស្សជុំវិញខ្លួន អ្នកដែលចេះអោយតម្លៃស្ដ្រី និងមានក្ដីស្រឡាញ់ពិតប្រាកដ Respect and love is importance បើយកមកហើយ ត្រូវរកទុកផ្លូវចិត្ត ។
យ៉ាងណាបើតាម ហួន ស្រីខួច នៅយូរបន្ដិចក៏មិនជាបញ្ហាដែរ សំខាន់បំផុត មនុស្សស្រីគ្រប់រូបត្រូវចេះស្រឡាញ់ខ្លួនឯងអោយល្អជាមុនសិន កុំបោះបង់ចោលការងារ ត្រូវរឹងមាំផ្នែកសេរីភាពហិរញ្ញវត្ថុ ទើបយើងអាចមានក្ដីសុខផ្លូវចិត្ត ។
ជាការកត់សម្គាល់ តារាសម្តែង និងជាអតីតតារាចម្រៀង ហួន ស្រីខួច គឺជាអ្នកសិល្បៈមួយរូបដែលមានការកើតសសើរយ៉ាងខ្លាំងពីសំណាក់មហាជន ដោយសារតែនាងមានការតស៊ូ និងប្រឹងប្រែងយ៉ាងខ្លាំងក្នុងវិស័យមួយនេះ ។
អ្វីពិសេសថែមទៀតនោះតារាស្រីរូបនេះបានខិតខំដោយមិនចុះចាញ់ក្នុងការចូលរួមប្រកួតវិស័យបវរកញ្ញា បើទោះបីជាមិនបានគ្រងម្កុដ ប៉ុន្តែនាងតែងតែទទួលបានចំណាត់ថ្នាក់ល្អក្នុងការប្រកួត ពោលនាងធ្លាប់ជាប់ចំណាត់ថ្នាក់លំដាប់រងទី ៣ Miss Supranational Cambodia 2023 និង Miss Universe Cambodia 2025 ។
ហួន ស្រីខួច ហៅកញ្ញា អេរីកា ក៏ធ្លាប់ជាជ័យលាភីលំដាប់រងទី២ នៃការប្រកួតកញ្ញាឯកកម្ពុជាប្រចាំ ឆ្នាំ ២០២១ (Miss Cambodia 2021) នាពេលកន្លងមក ហើយកញ្ញាក៏បានក្លាយជាតំណាងឱ្យកម្ពុជា សម្រាប់ចូលរួមប្រកួតកញ្ញាឯកអន្តរជាតិ-Miss Crystal Angel International 2021 ផងដែរ ។
បច្ចុប្បន្ន ហួន ស្រីខួច កំពុងមានមមាញឹកយ៉ាងខ្លាំងក្នុងការងារសិល្បៈរបស់ខ្លួនមិនថា ការងារសម្តែង បង្ហាញម៉ូដ និងថតសម្អាងការនោះឡើយ ខណៈពេលរឿងរ៉ាវស្នេហារបស់តារាស្រីរូបនេះហាក់មិនទាន់មានដំណឹងលេចឮណាមួយនៅឡើយទេ ៕
ចែករំលែកព័តមាននេះ