ផ្លែតាង៉ែន ឬមៀនប៉ៃលិន ទិន្នផលឆ្នាំនេះធ្លាក់ចុះបន្តិច
- ប៉ៃលិន
ខេត្តប៉ៃលិន ៖ រហូតមកដល់ថ្ងៃទី០៥ ខែតុលា ឆ្នាំ២០២៦នេះ ប្រជាកសិករមួយគ្រួសារកំពុងតែប្រមូលផលដំណាំផ្លែតាង៉ែន ហៅមៀនប៉ៃលិន ជាង១០០ដើមនៅលើដីចំការរបស់ខ្លួនយ៉ាងមមាញឹក ស្ថិតនៅក្នុងភូមិអូរច្រាលើ សង្កាត់ទួលល្វា ក្រុងប៉ៃលិន ខេត្តប៉ៃលិន ដើម្បីលក់ឱ្យឈ្មួញបានថវិកាសម្រាប់ផ្គត់ផ្គង់ជីវភាពគ្រួសារ និងសងជំពាក់បំណុលគេ ។
បើតាមប្រភពព័ត៌មានពីបុរសម្នាក់ ឈ្មោះ ម៉ៅ បានរៀបរាប់ឱ្យភ្នាក់ងារយើងដឹងថា ៖ គាត់បានដាំដំណាំតាង៉ែន ហៅមៀនប៉ៃលិននេះ អស់រយៈពេលជាច្រើនឆ្នាំមកហើយ ក៏បានប្រមូលផល១ឆ្នាំម្តងៗ ជាបន្តបន្ទាប់ ដោយពេលខ្លះតម្លៃទីផ្សារឡើងខ្ពស់បន្តិច និងពេលខ្លះទៀត ក៏ធ្លាក់ទាប ។ គាត់បន្តទៀតថា ដំណាំក្នុងចំការរបស់គាត់នាឆ្នាំនេះ ហាក់ដូចជាមានការថយទិន្នផលបន្តិច ព្រោះខ្វះខាតទឹកស្រោចស្រពដើម ខណៈពេលដែលដំណាំនេះកំពុងផ្កា ស្រាប់តែរាំងភ្លៀងរយៈពេលយូរ ។
ប្រភពដដែលបានបញ្ជាក់ទៀតថា ទោះបីជាយ៉ាងណា នាដើមខែតុលានេះ ដំណាំតាង៉ែនរបស់គាត់ បានទុំពេញដើមអស់ ហើយក៏បានជួលកម្មករឱ្យចូលទៅប្រមូលផលលក់ឱ្យឈ្មួញចិនដឹកយកទៅកែច្នៃធ្វើជាគ្រឿងកំប៉ុងនៅភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង ដោយគេម៉ៅទិញផ្លែល្អ ក្នុងតម្លៃ១គីឡូក្រាម៣៥០០រៀល។ តែបើផ្លែមិនសូវល្អ ក៏ធ្លាក់តម្លៃទៅតាមនោះដែរ ។ ពេលនេះ គាត់ប្រមូលផលបានជាង៣តោនហើយ ក៏នឹងប្រមូលផលជាបន្តបន្ទាប់រហូតដល់អស់ផ្លែពីដើម រួចក៏ទុករយៈពេល២ទៅ៣ខែ ទើបតែងមែកជាថ្មីម្តងទៀត និងដាក់អកម៉ូនឱ្យស្លឹកលូតលាស់ និងផ្កាផ្លែឡើងវិញ ។
បើតាមប្រភពព័ត៌មានពីឈ្មោះ សាន្ត ជាមេការប្រមូលផលផ្លែតាង៉ែន ហៅមៀនប៉ៃលិន ក៏បានបញ្ជាក់ដែរថា ថៅកែប្រមូលទិញផ្លែមៀនប៉ៃលិន យកទៅចូលរោងចក្រ រួចអប់ផ្លែក្នុងរោងម៉ាស៊ីន និងបកសម្បកផ្លែ ផលិតទៅជាគ្រឿងកំប៉ុង ដែលអាចទុកបានរយៈពេលយូរ ហើយបញ្ជូនទៅស្រុកចិន ដើម្បីផលិតជាគ្រឿងកំប៉ុងផ្សេងៗ លក់ចែកចាយទៅតាមរោងចក្រ នៅក្នុងបណ្តាប្រទេសផ្សេងៗ ។
ប្រភពបន្តថា ការប្រមូលទិញផ្លែតាង៉ែននេះ គឺមិនកំណត់នោះទេ ឱ្យតែមានគឺចាប់ផ្តើមជួលកម្មករឱ្យទៅប្រមូលផល ដោយគិតថ្លៃឈ្នួលក្នុង១គីឡូក្រាម៥០០រៀល បើសិនជាកម្មករប្រមូលផលបានច្រើន នោះនឹងទទួលបានប្រាក់កម្រៃច្រើនផងដែរ៕
ចែករំលែកព័តមាននេះ