ឃុំខ្លួនក្មេងទំនើង៣ក្រុមមានរហស្សនាមថា «ប្លុកសេដ(MS), កាហ្វេស្វាយ និងក្រុមចេកឆាប» ដាក់គុកព្រៃ.ស
- ភ្នំពេញ
រាជធានីភ្នំពេញ ៖ អយ្យការអមសាលាដំបូងរាជធានីភ្នំពេញបានប្រកាសព័ត៌មានស្តីពីការចោទប្រកាន់លើក្រុមក្មេងចំនួន៣ក្រុម ដែលមានរហស្សនាមក្រុម ប្លុកសេដ (MS), ក្រុមកាហ្វេស្វាយ និងក្រុមចេកឆាប រួចបានចាត់បញ្ជូនទៅចៅក្រមស៊ើបសួរ សម្រេចឃុំខ្លួនក្មេងទំនើងចំនួន៩នាក់ដាក់ពន្ធនាគារព្រៃ.សជាបណ្តោះអាសន្ន ពីបទហិង្សាដោយមានស្ថានទម្ងន់ទោស និងលួចមានស្ថានទម្ងន់ទោស ។
អ្នកនាំពាក្យនៃអយ្យការអមសាលាដំបូងរាជធានីភ្នំពេញ សូមជម្រាបថា កាលពីថ្ងៃទី២០ ខែកញ្ញា ឆ្នាំ២០២៦ វេលាម៉ោង០១និង០០នាទី រំលងអធ្រាត្រ មានក្មេងទំនើងចំនួន៣ក្រុម រហស្សនាមក្រុមប្លុកសេដ(MS), ក្រុមកាហ្វេស្វាយ និងក្រុមចេកឆាប មានគ្នាប្រហែល២២នាក់ ជិះម៉ូតូប្រហែល១០គ្រឿង ប្រដាប់ដោយមួកសុវត្តិភាព និងដុំថ្ម បានបបួលគ្នាជិះម៉ូតូចេញវាយលើក្រុមក្មេងទំនើងផ្សេងទៀតជាការកាត់សាញ និងកម្សាន្តអារម្មណ៍ ។
លុះនៅពេលក្រុមក្មេងទំនើងខាងលើ នាំគ្នាជិះម៉ូតូមកដល់ចំណុចផ្លូវជាតិលេខ៣ កែងផ្លូវបត់ចូលទៅវត្តជន្លង់ម្លូ ស្ថិតក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ស្រាប់តែជួបនឹងក្រុមជនរងគ្រោះឈ្មោះ វណ្ណា សុផែណារិទ្ធ ភេទប្រុស អាយុ១៧ ឆ្នាំ មានគ្នាចំនួន៦នាក់ ជិះម៉ូតូចំនួន៣គ្រឿង ឃើញដូច្នោះ ស្រាប់តែក្រុមក្មេងទំនើង៣ក្រុមបាននាំជិះដេញតាមវាយ និងគប់លើជនរងគ្រោះ ដែលបណ្តាលឲ្យជនរងគ្រោះដួល ហើយជនរងគ្រោះក៏រត់ចោលម៉ូតូ រួចគេចខ្លួនចូលទៅភូមិប្រជាពលរដ្ឋនៅជិតនោះ ។
ភ្លាមនោះ ក្រុមក្មេងទំនើងក៏បន្តនាំគ្នាធ្វើសកម្មភាពរត់ចូលទៅវាយម៉ូតូរបស់ជនរងគ្រោះ និងលួចម៉ូតូរបស់ជនរងគ្រោះយកទៅបាត់ ។ បន្ទាប់ពីធ្វើសកម្មភាពរួច ក្រុមក្មេងទំនើងនាំគ្នាជិះម៉ូតូគេចខ្លួន ។ លុះរហូតមកដល់ថ្ងៃទី២៦ ខែកញ្ញា ឆ្នាំ២០២៦ វេលាម៉ង១ និង០០ នាទី កម្លាំងសមត្តកិច្ចបានស្រាវជ្រាវឃាត់ខ្លួនជនសង្ស័យចំនួន០៩នាក់ និងបានកសាងសំណុំរឿងបញ្ជូននកអយ្យការអមសាលាដំបូងរាជធានីភ្នំពេញ ដើម្បីចាត់ការទៅតាមនីតិវិធី ។
ចំណែកឯបក្សពួកផ្សេងទៀត ដែលពាក់ពន្ធនិងករណីខាងលើនេះ សមត្ថកិច្ចកំពុងស្រាវជ្រាវបន្ត។ ក្រោយពីបានទទួល និងពិនិត្យលើសំណុំរឿងនេះ តំណាងអយ្យការសម្រេចចោទប្រកាន់លើជនសង្ស័យទាំង៩នាក់ និងបក្សពួកពីបទ.ហិង្សាដោយមានស្ថានទម្ងន់ទោស និងលួចមានស្ថានទម្ងន់ទោស ប្រព្រឹត្តនៅចំណុចមុខក្លោងទ្វារវត្តជម្លង់ម្លូ ផ្លូវជាតិលេខ៣ ភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ កាលពីថ្ងៃទី២០ ខែកញ្ញា ឆ្នាំ២០២៦ បទល្មើសដែលមានបញ្ញត្តិឲ្យផ្តន្ទាទោសតាមមាត្រា២១៨ ចំណុច២ ចំណុច៣ មាត្រា ៣៥៣ និងមាត្រា ៣៥៧ នៃក្រមព្រហ្មទណ្ឌ តាមរយៈដីកាសន្និដ្ឋានបញ្ជូនរឿងឲ្យស៊ើបសួរលេខ៤០១៤ អ.យ.ធ ចុះថ្ងៃទី១ ខែតុលា ឆ្នាំ២០២៦ និងបានបញ្ជូនសំណុំរឿងនេះទៅកាន់ចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីថាត់ការបន្តតាមនីតិវិធី ។
នេះហើយក្រុមក្មេងទំនើង៣ក្រុម ក្រុមប្លុកសេដ (សេដខ្លាំងពេក) ក្រុមកាហ្វេស្វាយ និងក្រុមចេកឆាប ដែលជាការកាត់សាញ និងកំសាន្តអារម្មណ៍ ទីបំផុតដេកគុកព្រៃ.ស៕
ចែករំលែកព័តមាននេះ