រកឃើញហើយ សា.ក.ស.ពកុ.មារា០២នាក់បងប្អូនដែលល.ង់ទឹកនៅស្រុកថ្មគោល
- បាត់ដំបង
ខេត្តបាត់ដំបង ៖ នៅវេលាម៉ោង៧និង២៥នាទីព្រឹកថ្ងៃទី០៣ តុលា នេះ សមត្ថកិច្ចបានប្រកាសថា គេបានរកឃើញសាកសពកុមារា០២នាក់បងប្អូន ដែលត្រូវជំនន់ទឹកហូរកួច បាត់ខ្លួនស្ទើរពេញមួយថ្ងៃមួយយប់ នៅចំណុចវាលស្រែមួយកន្លែង ក្នុងភូមិស្នូលកោង ឃុំបឹងព្រឹង ស្រុកថ្មគោល ចម្ងាយពីទីទាំងកើតហេតុប្រហែល១៥០ម៉ែត្រ ។ កុមាររងគ្រោះទាំង០២នាក់បងប្អូន ម្នាក់ឈ្មោះ ដែន ផាន់ណា ភេទប្រុស អាយុ១៣ឆ្នាំ (បង) និងឈ្មោះ ដែន វ៉ាន់ដា ភេទប្រុស អាយុ០៥ឆ្នាំ (ប្អូន) រស់នៅភូមិព្រះពន្លា ឃុំរ៉ូងជ្រៃ ស្រុកថ្មគោល ។
កុមារារងគ្រោះ០២នាក់បងប្អូននេះ ត្រូវទឹកជំនន់ហូរកួចបាត់ខ្លួន កាលពីរសៀលថ្ងៃទី០២ តុលា នៅចំណុចភូមិ-ឃុំកើតហេតុខាងលើ ពេលកំពុងនាំគ្នាដើរឆ្លងកាត់កំណាត់ផ្លូវដែលលិចលង់ទៅដោយជំនន់ទឹកល្ហល្ងាច ខណៈឪពុកកំពុងដើរអូសម៉ូតូដែលរលត់ម៉ាស៊ីនឆ្លងកាត់ទឹកនៅខាងមុខ ។
គួររលឹកថា កាលពីរសៀលថ្ងៃទី០២ តុលា ឪពុកជនរងគ្រោះបានជិះម៉ូតូឌុបកូនប្រុស០២នាក់ខាងលើ ឆ្លងកាត់តាមដងផ្លូវដែលទឹកជំនន់កំពុងជន់លិច និងហូរកួចយ៉ាងខ្លាំង។ ពេលគាត់ឌុបកូនប្រុសដល់កន្លែងទឹកជ្រៅ ដែលកំពុងហូរកួចខ្លាំងផង ក៏រលត់ម៉ាស៊ីនម៉ូតូកណ្ដាលទឹក ។ ពេលដែលម៉ូតូរលត់ ឪពុកក៏ដាក់កូនឲ្យចុះដើរកាត់ទឹកតាមពីក្រោយ ហើយគាត់ដើរអូសម៉ូតូនៅខាងមុខ ។
ប៉ុន្តែពេលគាត់ដើរអូសម៉ូតូបានបន្តិច គាត់ក៏ងាកមករកកូននៅខាងក្រោយ ដោយក្ដីតក់ស្លុតយ៉ាងខ្លាំង ព្រោះបាត់កូនប្រុសទាំង០២នាក់ ឃើញតែទឹកជំនន់កំពុងហូរឆ្លងកាត់ផ្លូវល្ហល្ហាច ។ រន្ធត់ចិត្តពេកណាស់ នៅពេលឪពុកងាកមករកកូន មិនឃើញកូន ឃើញតែស្បែកជើងកូនប្រុសអណ្ដែតទឹករប៉ាត់រប៉ាយលើផ្ទៃទឹក ដែលកំពុងហូរកួចចូលប្រព័ន្ធលូនៅក្បែរនោះ ។
គាត់គ្មានសង្ឃឹមថា កូនប្រុសនៅរស់រានមានជីវិតទេ នៅពេលឃើញស្បែកជើងកូនៗកំពុងត្រូវទឹកហូរកួច តែមិនឃើញស្រមោលកូនប្រុសជាទីស្រលាញ់ បើទោះជាឪពុករូបនេះ បានប្រឹងប្រែងចុះរាវររកទាំងចិត្តរន្ធត់ ជាមួយនឹងសម្រែកសុំជំនួយពីអ្នកភូមិ និងអ្នកដំណើរ ។
អ្នកភូមិ សាច់ញាតិ និងកម្លាំងសមត្ថកិច្ច បាននាំគ្នាចុះរាវរកក្មេងប្រុស០២នាក់បងប្អូន ស្ទើរគ្រប់ទីកន្លែង កណ្ដាលផ្ទៃទឹកដ៏ធំល្វឹងល្វើយ ដែលកំពុងហូរឆ្ពោះទៅកាន់ផ្នែកខាងក្រោម ។ សមត្ថកិច្ចនិងអ្នកភូមិ រួមទាំងសាច់ញាតិជនរងគ្រោះផង បានបែងចែកជាក្រុមៗ ត្រួតពិនិត្យតាមគោលដៅនានា ដើម្បីតាមស្វែងរកកុមារាដ៏កំសត់ ។
ចាប់តាំងពីម៉ោងកើតហេតុ រហូតដល់ព្រលប់នៅតែគ្មានតម្រុយពីកុមាររងគ្រោះ រហូតអាណាព្យាបាល និងបងប្អូន សម្រេចនិមន្តព្រះសង្ឃរៀបចំពិធីបួងសួងនៅកន្លែងកើតហេតុ ដើម្បីឆាប់បានរកឃើញសាកសពកុមារទាំង០២នាក់ ប៉ុន្តែនៅតែពុំអាចរុករកឃើញដដែល ទីបំផុត នៅព្រឹកថ្ងៃទី ០៣ តុលា នេះ ទើបក្រុមគ្រួសារ និងអ្នកភូមិប្រទះឃើញសាកសពកុមារាទាំង០២នាក់បងប្អូននេះ នៅប៉ែកខាងក្រោមទីតាំងកើតហេតុ ប្រហែល១៥០ម៉ែត្រ បន្ទាប់ពីសាច់ញាតិបន្តតាមស្វែងរកស្ទើរពេញមួយថ្ងៃមួយយប់ ៕
ចែករំលែកព័តមាននេះ