ភ្នំពេញ ៖ ធនាគារជាតិនៃកម្ពុជា បានស្នើដល់អាជ្ញាធរមានសមត្ថកិច្ចឱ្យ ចាត់វិធានការតាមផ្លូវច្បាប់ចំពោះបុគ្គលដែលបង្កើត ឬផ្សព្វផ្សាយព័ត៌មានមិនពិត ពាក់ព័ន្ធនឹងវិស័យធនាគារ និងហិរញ្ញវត្ថុ ដែលអាចបង្កការភាន់ច្រឡំដល់សាធារណជន និងប៉ះពាល់ដល់ទំនុកចិត្តលើប្រព័ន្ធធនាគារ ។
ក្នុងសេចក្តីជូនដំណឹងមួយ ចុះថ្ងៃទី២ ខែតុលា ធនាគារជាតិនៃកម្ពុជា បានលើកឡើងថា នាពេលកន្លងមកមានការផ្សព្វផ្សាយព័ត៌មានតាមបណ្តាញសង្គម ដោយលើកឡើងថា គ្រឹះស្ថានធនាគារ និងហិរញ្ញវត្ថុមួយចំនួន កំពុងប្រឈមបញ្ហា ឬអាចជួបប្រទះបញ្ហានាពេលខាងមុខ ។
ធនាគារជាតិបានបញ្ជាក់ថា ព័ត៌មានដែលមិនមានមូលដ្ឋានពិតប្រាកដបែបនេះអាចធ្វើឱ្យសាធារណជនមានការយល់ច្រឡំ និងអាចបង្កផលប៉ះពាល់ដល់អ្នកប្រើប្រាស់សេវាធនាគារ ក៏ដូចជា ទំនុកចិត្តលើប្រព័ន្ធធនាគារទាំងមូល ។
ជាមួយគ្នានេះ ធនាគារជាតិនៃកម្ពុជា បានថ្កោលទោសចំពោះការបង្កើត និងការផ្សព្វផ្សាយព័ត៌មានមិនពិតដោយចេតនា ហើយបានស្នើឱ្យអាជ្ញាធរមានសមត្ថកិច្ចពាក់ព័ន្ធចាត់វិធានការតាមច្បាប់ចំពោះបុគ្គលដែលជាប់ពាក់ព័ន្ធ ។
ធនាគារជាតិនៃកម្ពុជាក៏បានអំពាវនាវឱ្យសាធារណជនប្រុងប្រយ័ត្ន ហើយកុំបន្តចែករំលែកព័ត៌មានដែលមិនមានប្រភពច្បាស់លាស់ និងគួរតាមដានព័ត៌មានពីប្រភពផ្លូវការ ជាពិសេសធនាគារជាតិនៃកម្ពុជា និងស្ថាប័នមានសមត្ថកិច្ចពាក់ព័ន្ធ ៕
ចែករំលែកព័តមាននេះ