កំពត៖ កាលពីព្រឹកថ្ងៃទី២៦ ខែកញ្ញា ឆ្នាំ២០២៦ កម្មករស៊ីឈ្នួលបំបែកថ្មចំនួន​២នាក់ បានរងគ្រោះថ្នាក់អកុសលដោយសារផ្ទាំងថ្មបាក់រលំសង្កត់បាត់បង់ជីវិត​នៅលើភ្នំល្អាង ស្ថិតក្នុងឃុំល្អាង ស្រុកដងទង់ ខេត្តកំពត ។

​យោងតាមប្រភពព័ត៌មានបឋមថា ជនរងគ្រោះទាំងពីរនាក់ដែល​ស្លាប់ក្នុងហេតុការណ៍នោះ រួមមាន៖ទី១– ឈ្មោះ ស៊ុម ណុប ភេទប្រុស អាយុ​៣០ឆ្នាំ រស់នៅភូមិល្អាង ឃុំល្អាង ស្រុកដងទង់ ខេត្តកំពត និងទី២– ឈ្មោះ សំ សុខលី ភេទប្រុស អាយុ​៣៤ឆ្នាំ រស់នៅ​ភូមិ​ដំណាក់ត្រាច ឃុំកណ្តោល ស្រុកទឹកឈូ ខេត្តកំពត។

​ទាក់ទងនឹងករណីខាងលើ អ្នកយកព័ត៌មានបានព្យាយាមទាក់ទងតាមទូរស័ព្ទទៅកាន់ លោក សេង សុគន្ធ អធិការនគរបាលស្រុកដងទង់ ដើម្បីសុំការពន្យល់​លម្អិតជុំវិញករណីអកុសលនេះ ប៉ុន្តែត្រូវបានលោកអធិការបញ្ជាក់ថា កំពុងជាប់រវល់​ធ្វើការ និងបានផ្តាច់ការទាក់ទងភ្លាមៗ ។

គួររំលឹកផងដែរថា កាលពីប៉ុន្មានឆ្នាំមុន ធ្លាប់មានករណីគ្រោះថ្នាក់ស្រដៀងគ្នានេះម្តងរួចមកហើយ ដោយមានកម្មករចំនួន​២នាក់បានបាត់បង់ជីវិត ដោយសារផ្ទាំងថ្មភ្នំល្អាងបាក់រលំសង្កត់ដូចគ្នា ដែលធ្វើឱ្យករណីគ្រោះថ្នាក់ទាំងពីរលើកនេះ (ទាំងមុនទាំងក្រោយ) បណ្តាលឱ្យមានមនុស្សស្លាប់សរុបចំនួន​៤នាក់ហើយ ។