រំលត់អធិករណ៍រវាងព្រះចៅអធិការ និងគណៈកម្មការវត្ត
- មណ្ឌលគិរី
ខេត្តមណ្ឌលគិរី ៖ អធិករណ៍មួយដែលបានកើតឡើងនៅវត្តអូរធែលតេជោមានជ័យ ត្រូវបានបញ្ចប់ដោយព្រះអនុគណស្រុកពេជ្រាដា តំណាងព្រះមេគណខេត្ត បញ្ចប់ជម្លោះរវាងពុទ្ធបរិស័ទចំណុះជើងវត្ត និងចៅអធិការ ព្រមទាំងគណៈកម្មការវត្ត និងបានរំសាយរម្ងាប់អធិករណ៍នៅព្រឹកថ្ងៃទី២៤ ខែកញ្ញា ឆ្នាំ២០២៦ ។
ការរំលត់អធិករណ៍នេះ ដោយសារមានការគាំទ្រពីបរិស័ទ និងគណៈកម្មការវត្តផង ដោយមន្ត្រីសង្ឃបានសម្រេចឱ្យចៅអធិការចាស់ នៅគ្រប់គ្រងគង់នៅក្នុងវត្តបន្ត ។
តាមប្រភពពីពុទ្ធបរិស័ទចំណុះជើងវត្ត បានឱ្យដឹងថា ព្រះចៅអធិការនាម ហេង ចាន់រិទ្ធ បានមានជម្លោះជាមួយគណៈកម្មការវត្ត ហើយក៏ឈានដល់ការរំសាយចេញ ។ គណៈកម្មការវត្តដែលរំសាយចេញនោះមាន ឈ្មោះ គួន ធី ឈ្មោះ រស់ សាវុធ និងឈ្មោះ ស៊ឹម ស៊ាន ដែលបានចោទថា ព្រះចៅអធិការបានប្រព្រឹត្តអំពើខុសឆ្គងលើព្រះសង្ឃ ព្រមទាំងបង្កអធិករណ៍ក្នុងវត្តទាំងមូល ឱ្យមានការបែកបាក់សាមគ្គីផ្ទៃក្នុង ។
ម្យ៉ាងទៀត ប្រសិនបើទុកបុគ្គលទាំង៣រូបនេះទៀត វត្តអារាមមិនមានការអភិវឌ្ឍ និងអាប់ឱនតម្លៃព្រះពុទ្ធសាសនាទាំងមូលផងដែរ ។
ទោះបីជាបែបណា ការរំលត់អធិការណ៍នេះ ត្រូវបានព្រះអនុគណ សុំឱ្យរក្សាទុកគណៈកម្មការបន្តធ្វើបុណ្យទាន រង់ចាំបោះឆ្នោតតាមក្រោយ ។
នៅចំពោះព្រះភក្ត្រមន្ត្រីសង្ឃ ដោយមានការគាំទ្រពីពុទ្ធបរិស័ទជិត១០០នាក់ បានលើកដៃគាំទ្រ និងបូករួមទាំងគណៈកម្មការ តាជី យាយជីផងនោះ សុំឱ្យរក្សាព្រះចៅអធិការគ្រប់គ្រងបន្ត ដោយមិនមានការដោះដូរ និងបង្រួបបង្រួមសហការគោរពបូជា និងធ្វើការកសាងវត្តបន្ត ។
ជាចុងក្រោយ មន្ត្រីសង្សតំណាងព្រះមេគណខេត្ត បានផ្ដាំផ្ញើ ធ្វើយ៉ាងណាព្រះចៅអធិការរក្សាភាពស្ងប់ស្ងាត់ សន្តិភាព ដើម្បីថែរក្សាព្រះពុទ្ធសាសនា ហើយត្រៀមបុណ្យកាន់បិណ្ឌ និងភ្ជុំបិណ្ឌ ដែលនឹងចូលមកដល់នៅថ្ងៃ១រោច ខែភទ្របទ ខាងមុខឱ្យបានល្អផូរផង់ តាមមាគ៌ាព្រះពុទ្ធសាសនា ៕
ចែករំលែកព័តមាននេះ