បង្ក្រា.បលើផ្ទៃសមុទ្រ ចា.ប់ឈ្មួញអាវុ.ធ និងគ្រឿងញៀ.នជិត១តោន
- ព្រះសីហនុ
ខេត្តព្រះសីហនុ ៖ នៅថ្ងៃទី២៣ ខែកញ្ញា ឆ្នាំ២០២៦ វេលាម៉ោង០០និង១០នាទីរំលងអធ្រាត្រ លោកឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក បានដឹកនាំអនុប្រធាននាយកដ្ឋាន កម្លាំងអង្គភាពបង្ក្រាបបទល្មើសលើផ្ទៃសមុទ្រ និងកម្លាំងវរសេនាតូចនគរបាលការពារព្រំដែនទឹក លេខ២៤០ ប្រចាំខេត្តព្រះសីហនុ នៃនាយកដ្ឋាននគរបាលការពារព្រំដែនទឹក ដែលបានដាក់បណ្ដាញសម្ងាត់ជាច្រើនថ្ងៃ រហូតឈានដល់ការកំណត់មុខសញ្ញា និងកំណត់គោលដៅជាក់លាក់ ធ្វើការបង្ក្រាបបទល្មើសជួញដូរគ្រឿងញៀន និងជួញដូរអាវុធខុសច្បាប់ នៅម្ដុំកោះឫស្សី ក្នុងភូមិសាស្ត្រដែនសមុទ្រខេត្តព្រះសីហនុ ។
ប្រតិបត្តិការនេះ បានធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ ស ថេត អគ្គស្នងការនគរបាលជាតិ និងមានការណែនាំពីនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការទទួលទិសភូមិភាគទី៣ ទី៤ និងទី៥ ក្រោមការសម្របសម្រួលពីតំណាងអយ្យការអមសាលាដំបូងខេត្ត ។
របាយការណ៍របស់នាយកដ្ឋាននគរបាលការពារព្រំដែនទឹក បានបញ្ជាក់ថា ក្រោយទទួលបានព័ត៌មានសម្ងាត់ កម្លាំងនគរបាលនាយកដ្ឋានការពារព្រំដែនទឹក ដឹកនាំបញ្ជាផ្ទាល់ពីលោកឧត្តមសេនីយ៍ឯក ទូច ពលៈ ប្រធាននាយកដ្ឋាន ដោយសហការជាមួយកម្លាំងស្នងការដ្ឋាននគរបាលខេត្តព្រះសីហនុ បានធ្វើការស្ទាក់ និងចាប់ឃាត់អូប័រ១គ្រឿង មានជនជាតិចិន២នាក់ ។
បន្ទាប់ពីបង្ក្រាបបាន កម្លាំងនគរបាលបានបន្តប្រតិបត្តិការ ហើយឈានដល់ការឃាត់រថយន្តចំនួន២គ្រឿង និងចាប់ជនជាតិចិន៥នាក់ទៀត ព្រមទាំងដកហូតម្សៅសថ្លាសង្ស័យជាសារធាតុញៀន សរុបចំនួន៤២បាវ (ទម្ងន់ប្រមាណ ៨៤០គីឡូក្រាម) ។
ក្រៅពីថ្នាំញៀនដ៏ច្រើននេះ កម្លាំងនាយកដ្ឋាននគរបាលការពារព្រំដែនទឹក បានដកហូតម៉ូតូ ចំនួន៣គ្រឿង អាវុធវែងចំនួន១០ដើម អាវុធខ្លីចំនួន៣៩ដើម (បង់ចំនួន១០៨ គ្រាប់ចំនួន៧ ៩៣៧គ្រាប់ ប្រដាប់ខ្ទប់សំឡេងចំនួន៨) ។
បច្ចុប្បន្ន មនុស្ស និងវត្ថុតាងខាងលើ ត្រូវបានប្រគល់ជូនស្នងការដ្ឋាននគរបាលខេត្តព្រះសីហនុ ដើម្បីអនុវត្តនីតិវិធីបន្ត ៕
ចែករំលែកព័តមាននេះ