ដាំកូនត្នោត ៣ពាន់ដើម នៅលើខ្នងទំនប់ព្រៃទន្លេ ជាប់ព្រំដែនវៀតណាម ដើម្បីលើកកម្ពស់បរិស្ថាន និងអត្តសញ្ញាណជាតិ
- កំពត
ខេត្តកំពត ៖ អាជ្ញាធរខេត្តកំពតបានដាំកូនត្នោតចំនួន៣ពាន់ដើម កាលពីព្រឹកថ្ងៃទី29 ខែសីហា ឆ្នាំ2026 នៅលើខ្នងទំនប់ព្រៃទន្លេ ត្រង់ចំណុចភូមិសំរោងចិន ស្រុកបន្ទាយមាស ខេត្តកំពត ។
សូមបញ្ជាក់ផងដែរថា ឃុំព្រៃទន្លេ គឺជាឃុំមួយក្នុងស្រុកបន្ទាយមាស តែមានភូមិសាស្ត្រជាប់និងប្រទេសវៀតណាម ។
លោកនូរ ចន្ទ័ដា អភិបាលស្រុកបន្ទាយមាស បានមានប្រសាសន៍ថា ប្រជាពលរដ្ឋនៅស្រុកបន្ទាយមាស90ភាគរយបានពឹងផ្អែកលើវិស័យផ្នែកកសិកម្ម ។
លោកអភិបាលស្រុក បានមានប្រសាសន៍បន្តថា ស្រុកបន្ទាយមាសមានឃុំចំនូន15 តែមានឃុំចំនួន2 និងមានភូមិសាស្ត្រជាប់ប្រទេសវៀតណាមគឺឃុំត្នោតចុងស្រង់និងឃុំព្រៃទន្លេ ។ លោកបានបញ្ជាក់ថា កូនត្នោតដែលយើងចូលរួមដាំទាំងអស់គ្នានៅទំនប់ព្រៃទន្លេនេះ មានចំនួន3ពាន់ដើម ប៉ុន្តែចាត់ទុកថា អាជ្ញាធរខេត្តកំពតដាំកូនត្នោតចំនួន3ពាន់ដើមនេះជាលើកទី១ហើយសម្រាប់ស្រុកបន្ទាយមាស ។
ឯកឧត្តមម៉ៅ ធនិន អភិបាលខេត្តកំពត មានប្រសាសន៍ថា ការដាំដើមត្នោតដើម្បីបរិស្ថានបៃតង និងមរតកវប្បធម៌ជាតិនិងអោយស្គាល់អត្តសញ្ញាណដូនតារបស់យើង និងអបអរសារទររុក្ខទិវា 9 កក្កដា ឆ្នាំ2026ផង ។
ឯកឧត្តមម៉ៅ ធនិន អភិបាលខេត្តកំពត បានមានប្រសាសន៍ថា អាជ្ញាធរមូលដ្ឋានគ្រប់ឃុំ បើមានពលរដ្ឋសុំច្បាប់រៀបអាពាហ៍ពិពាហ៍ បើអាចធ្វើបាន គួតែអោយសាម៉ីខ្លួនទាំងពីរនាក់មកចូលរួមដាំដើមត្នោតមួយដើមសិន ហើយយើងថតទុកអនុស្សាវរីយ៍ ។
ឯកឧត្តមបានណែនាំទៅកងនគរបាលការពារព្រំដែនគោក អោយជួយការពារស្រោចទឹក មើលថែទាំរហូតដល់កូនត្នោតធំ ។
ក្នុងពិធីដាំកូនត្នោតនោះដែរ ក៍មានការជួយច្រូតកាត់ប្រមូលផលស្រូវរបស់ប្រជាពលរដ្ឋនៅឃុំព្រៃទន្លេផងដែរ ៕
ចែករំលែកព័តមាននេះ