ដឹងមូលហេតុហើយ! ករណីអគ្គិភ័យឆេះផ្ទះលក់ហ្គាស រាលដាលផ្ទះ៤ខ្នងទៀត នៅទីប្រជុំជនអ្នកលឿង
- ព្រៃវែង
ខេត្តព្រៃវែង ៖ ផ្ទះប្រជាពលរដ្ឋ១ខ្នងត្រូវអណ្តាតភ្លើងឆាបឆេះយ៉ាងសន្ធោសន្ធៅអស់ទាំងស្រុង ខណៈផ្ទះពលរដ្ឋ៤ខ្នងទៀតរងការប៉ះពាល់ពីករណីអគ្គីភ័យនៅតំបន់ទីប្រជុំជនអ្នកលឿងត្រើយខាងកើត បង្កការភ្ញាក់ផ្អើលកាលពីវេលាម៉ោង១២ និង៥នាទីរសៀលថ្ងៃទី២៧ ខែសំហា ឆ្នាំ២០២៦ ស្ថិតក្នុងភូមិលេខ២ ឃីព្រែកខ្សាយ”ខ” ស្រុកពាមរក៍ ខេត្តព្រៃវែង។
យោងតាមរបាយការណ៍របស់សមត្ថកិច្ចបានអោយដឹងថា ដោយទទួលបានសេចក្ដីរាយការណ៍ពីលោកវរសេនីយ៍ឯក សេង ពន្លក អធិការនគរបាលស្រុកពាមរក៍ នៅវេលាម៉ោង ថ្ងៃកើតហេតុខាងលើថា មានករណីអគ្គិភ័យឆាបឆេះផ្ទះពលរដ្ខនៅតំបន់ទីប្រជុំជនអ្នកលឿងត្រើយខាងកើត ភ្លាមនោះ ឯកឧត្តម សួន សុម៉ាលីន អភិបាលខេត្តព្រៃវែង និងជាប្រធានគណៈបញ្ជាការឯកភាពខេត្ត លោកឧត្តមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែង បានដឹកនាំបញ្ជាកម្លាំងដោយផ្ទាល់ ចុះអន្តរាគមន៍ជួយពន្លត់ករណីអគ្គិភ័យដ៏ធំមួយនេះ ដោយអគ្គីភ័យបានឆាបឆេះផ្ទះប្រជាពលរដ្ឋដែលរងការប៉ះពាល់សរុបចំនួន ៥ ខ្នង ឆេះខូចខាតអស់ទាំងស្រុង ១ ខ្នង និងផ្ទះចំនួន៤ខ្នងទៀតរងការខូចខាតប្រហែល៧០% . ៨០%. ៣០% និង ២០% រោលខ្លោចដោយសារផ្សែងអណ្ដាតភ្លើង ។
ជាមួយគ្នានោះដែរ លោកឧត្តមសេនីយ៍ទោ ស្នងការ ក៏បានដាក់បទបញ្ជាដល់លោកអធិការនគរបាលក្រុង-ស្រុកទាំង១៣ អោយបញ្ជូនកម្លាំងមកជួយអន្តរាគមន៍ពន្លត់ជាបន្ទាន់ ជាពិសេសរថយន្តពន្លត់អគ្គិភ័យតាមបណ្ដាអធិការរដ្ឋាននគរបាលក្រុង-ស្រុកទាំង១៣ក្នុងខេត្តព្រៃវែង បូករួមជាមួយឡានទឹកនៃអធិការដ្ឋាននគរបាលស្រុកលើកដែកនឹងស្រុកកៀនស្វាយ ខេត្តកណ្តាល សរុបឡានទឹកប្រហែល៧-៨គ្រឿងចេញមកអន្តរាគមន៍ ជួយព្រមៗគ្នា និងរួមសហការជាមួយប្រជាការពារនឹងបងប្អូនប្រជាពលរដ្ឋបាញ់ពន្លត់ប្រើរយ:ពេលប្រហែលចូល៤ម៉ោងទើបគ្រប់ស្ថានការបានទាំងស្រុង។
គូសបញ្ជាក់ថា ករណីបង្កជាអគ្គិភ័យឆាបឆេះផ្ទះប្រជាពលរដ្ឋខាងលើ គឺបណ្ដាលមកពីទុស្សេខ្សែភ្លើង ដោយម្ចាស់ផ្ទះមានមុខរបរជាអ្នកលក់ និងបញ្ចូលធុងហ្គាស ជាលទ្ធផលសមត្ថកិច្ចយើង ក៏បានជួយពន្លត់គ្រប់គ្រងករណីអគ្គិភ័យនេះបាន ១០០% ដោយពុំមានប្រជាពលរដ្ឋណាម្នាក់មានគ្រោះថ្នាក់ដល់អាយុជីវិត ឬរងរបួសនោះឡើយ ដោយគ្រាន់តែមានមន្ត្រីនគរបាលខ្លះគាត់រងរបួសដោយសារពុលផ្សែងភ្លើងប៉ុណ្ណោះ។
ទន្ទឹមនោះលោកឧត្តមសេនីយ៍ទោ ឈឿន ប៊ុនឆនស្នងការនគរបាលខេត្តព្រៃវែង សូមគោរពថ្លែងអំណរអរគុណយ៉ាងជ្រាលជ្រៅបំផុតចំពោះការលះបង់កម្លាំងកាយចិត្ត មនសិកា ឆន្ទៈ ដ៏មោះមុតរបស់កងកម្លាំងនគរបាលខេត្តព្រៃវែង ព្រមទាំងប្រជាការពារ ប្រជាពលរដ្ឋទាំងអស់ដែលបានខ្នះខ្នែងជួយអន្តរាគមន៍ពន្លត់អគ្គីភ័យនេះបានទាន់ពេលវេលា៕
ចែករំលែកព័តមាននេះ