បង្ក្រាបបទល្មើសនេសាទខុសច្បាប់ក្នុងស្រុកព្រែកប្រសព្វ រឹបអូសស្បៃមុងជាង១,៦០០ម៉ែត្រ
- ក្រចេះ
ខេត្តក្រចេះ ៖ កម្លាំងជំនាញនៃខណ្ឌរដ្ឋបាលជលផលក្រចេះ សហការជាមួយអាជ្ញាធរមូលដ្ឋានបានចុះល្បាត និងបង្ក្រាបករណីបទល្មើសជលផលទ្រង់ទ្រាយធំមួយ នៅក្នុងភូមិសាស្ត្រស្រុកព្រែកប្រសព្វ ដោយបានរឹបអូស និងបំផ្លាញចោលនូវឧបករណ៍នេសាទខុសច្បាប់ជាច្រើន ព្រមទាំងបានរំដោះកូនត្រីចម្រុះប្រមាណ១០០គីឡូក្រាម លែងចូលទៅក្នុងដែនទឹកធម្មជាតិ
វិញ ។
លោក ប៉ុន ពន្លក នាយខណ្ឌរដ្ឋបាលជលផលខេត្តក្រចេះបានបញ្ជាក់ថា ប្រតិបត្តិការនេះ បានធ្វើឡើងកាលពីថ្ងៃទី២១ ខែ
សីហា ឆ្នាំ២០២៦ ដោយមានការចូលរួមពីផ្នែករដ្ឋបាលជលផលព្រែកប្រសព្វ,កម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្ត, គណៈកម្មការស្រុក ដើម្បីទប់ស្កាត់ និងបង្ក្រាបបទល្មើសធនធានធម្មជាតិ, ក្រុមប្រឹក្សាឃុំចំបក់-ឃុំឫស្សីកែវ និងសហគមន៍នេសាទក្នុងតំបន់ សរុបចំនួន ១៥នាក់ និងប្រើប្រាស់ទូកម៉ាស៊ីនចំនួន៤គ្រឿង។
ក្នុងកិច្ចប្រតិបត្តិការចុះត្រួតពិនិត្យនៅតាមតំបន់ទំនាបលិចទឹកបឹងក្បាលខ្មោច និងបឹងវែង ស្ថិតក្នុងឃុំចំបក់ និងឃុំឫស្សីកែវ ស្រុកព្រែកប្រសព្វ កម្លាំងសមត្ថកិច្ចចម្រុះបានរកឃើញ និងរុះរើបំផ្លាញចោលនូវវត្ថុតាងបទល្មើស រួមមាន៖របាំងព្រួលស្បៃមុង៖ ចំនួន១៥ខ្សែ ប្រវែងសរុប១,៦៥០ម៉ែត្រ.លូស្បៃមុង៖ ចំនួន១៧មាត់ បង្គោលចម្រឹងឫស្សី៖ ចំនួន២៥៥ដើម.បន្ថែមពីលើការបង្ក្រាប និងរុះរើឧបករណ៍ខុសច្បាប់ទាំងនេះ មន្ត្រីជំនាញក៏បានជួយសង្គ្រោះ និងចាក់លែងត្រីចម្រុះទម្ងន់ប្រមាណ១០០គីឡូក្រាម ដែលជាប់នៅក្នុងឧបករណ៍ល្មើស ឱ្យចូលទៅក្នុងដែនទឹកធម្មជាតិវិញ ដើម្បីថែរក្សានិរន្តរភាពពូជត្រីនៅក្នុងតំបន់។
អាជ្ញាធរជលផលក៏បានអំពាវនាវដល់បងប្អូនប្រជានេសាទទាំងអស់ ឱ្យបញ្ឈប់ការប្រើប្រាស់ឧបករណ៍នេសាទដែលច្បាប់ហាមឃាត់ ដើម្បីរួមគ្នារក្សាធនធានជលផលឱ្យបានគង់វង្សសម្រាប់ជំនាន់ក្រោយ ៕
ចែករំលែកព័តមាននេះ