ទីក្រុងសេអ៊ូល ៖ ខណៈពេលដែលគីមឈី (Kimchi) របស់ប្រទេសកូរ៉េខាងត្បូងទទួលបានប្រជាប្រិយភាពយ៉ាងខ្លាំងនៅទូទាំងពិភពលោកក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែក្រឡេកទៅប្រជាជនកូរ៉េខាងត្បូងខ្លួនឯង បែរជាបរិភោគអាហារបែបប្រពៃណីមួយនេះកាន់តែតិចជាងមុនទៅវិញ។ នេះបើតាមប្រភពពីទីភ្នាក់ងារសារព័ត៌មានកូរ៉េខាងត្បូង យ៉ុនហាប់ (Yonhap) ចេញផ្សាយកាលពីពេលថ្មីៗនេះ។
ទិន្នន័យកាលពីថ្ងៃទី៩ ខែសីហា ឆ្នាំ២០២៦ បានបង្ហាញថា ប្រជាជនកូរ៉េខាងត្បូងកំពុងតែបរិភោគគីមឈីតិចជាងមុនខ្លាំង បើទោះបីជាមុខម្ហូបប្រចាំជាតិសាសន៍មួយនេះ កំពុងទទួលបានការពេញនិយមយ៉ាងខ្លាំងលើពិភពលោកក៏ដោយ។ តាមការសិក្សារួមគ្នាមួយដោយក្រុមអ្នកស្រាវជ្រាវពីសាកលវិទ្យាល័យ Chung-Ang សាកលវិទ្យាល័យជាតិ Jeju និងវិទ្យាស្ថានពិភពលោកស្តីអំពីគីមឈី (WiKim) បានឱ្យដឹងថា អត្រាប្រជាជនកូរ៉េខាងត្បូងដែលមិនបានបរិភោគគីមឈីទាល់តែសោះក្នុងរយៈពេល ២៤ ម៉ោងចុងក្រោយ បានកើនឡើងពី ១១,៧% ក្នុងឆ្នាំ ២០១០ ដល់ ២២,៧% ក្នុងឆ្នាំ ២០២៤។ ការសិក្សានេះផ្អែកលើទិន្នន័យអង្កេតពិនិត្យសុខភាព និងអាហារូបត្ថម្ភជាតិរបស់ប្រទេសកូរ៉េខាងត្បូង ចាប់ពីឆ្នាំ ២០១០ ដល់ឆ្នាំ ២០២៤។
បើគិតតាមយេនឌ័រវិញ អត្រាអ្នកមិនបរិភោគគីមឈីក្នុងរយៈពេល ២៤ ម៉ោងចុងក្រោយ បានកើនឡើងពី ១០,២% ដល់ ២០,៦% ចំពោះបុរស និងពី ១៣,១% ដល់ ២៤,៨% ចំពោះស្ត្រី។ លើសពីនេះ ការបរិភោគគីមឈីជាម្ហូបបន្ទាប់បន្សំបានធ្លាក់ចុះក្នុងចំណោមមនុស្សគ្រប់ក្រុមអាយុ លើកលែងតែក្រុមកុមារមានអាយុក្រោម ១០ ឆ្នាំប៉ុណ្ណោះ។ ការធ្លាក់ចុះនេះគឺច្បាស់ក្រឡែតបំផុតក្នុងចំណោមមនុស្សវ័យក្មេង និងកណ្តាល អាយុពី ២០ ដល់ ៣៩ ឆ្នាំ ដែលធ្លាក់ពី ៨២% ក្នុងឆ្នាំ ២០១០ មកនៅ ៦៦% ក្នុងឆ្នាំ ២០២៤។ ផ្ទុយទៅវិញ មនុស្សកាន់តែច្រើនបរិភោគគីមឈីជាគ្រឿងផ្សំសម្រាប់មុខម្ហូបឆ្អិនផ្សេងៗទៀត ដូចជាសម្លគីមឈីជាដើម។
ការសិក្សានេះបានបង្ហាញថា កត្តាសេដ្ឋកិច្ចសង្គមក៏ជះឥទ្ធិពលដល់ការបរិភោគគីមឈីផងដែរ ដោយក្រុមអ្នកមានចំណូលទាបបំផុត បង្ហាញពីអត្រានៃការទទួលទានគីមឈីខ្ពស់ជាងក្រុមអ្នកមានកម្រិតចំណូលខ្ពស់បំផុត។ ក្រុមស្រាវជ្រាវបានចង្អុលបង្ហាញថា ការផ្លាស់ប្តូរនៃការបរិភោគអាហារហឹរ ឆ្លុះបញ្ចាំងពីការប្រែប្រួលនៃសមាសធាតុចំណីអាហារ និងទម្លាប់នៃការបរិភោគជារួមនៅក្នុងប្រទេសកូរ៉េខាងត្បូង៕
ចែករំលែកព័តមាននេះ