ម្ដាយពិការភ្នែករែកពុនជីវភាព ! មើលថែប្ដី និងកូនប្រុស ២នាក់ ដែលវង្វេ.ងស្មារតី
- កំពត
ខេត្តកំពត ៖ តើពួកគាត់ជួបការលំបាកបែបណាទៅ សម្រាប់ការរស់នៅ ក្នុងគ្រួសារមួយ ដែលមានអ្នកសតិមិនល្អ ៣នាក់ ហើយម្ដាយដែលពិការភ្នែកបែរជាត្រូវទទួលមើលថែ ។ ពិតជាសោកសៅពេកណាស់ ។ គ្រួសារមួយនេះ មានកូនប្រុស ២នាក់សុទ្ធតែធ្លាក់ខ្លួនឈឺ ហើយប្រែក្លាយទៅជាមនុស្សសតិមិនល្អ ឯឪពុកក៏ធ្លាក់ខ្លួនឈឺហើយសតិមិនល្អដូចកូនដែរ ។ ចំណែកស្ត្រីជាម្ដាយ និងជាប្រពន្ធពិការភ្នែកខាងស្ដាំទៀត ដោយសារតែគ្រាប់ស្រូវខ្ទាតចូល ។
គ្រួសារមួយដែលមានសមាជិក ៤នាក់ សុទ្ធតែមានជំងឺសតិមិនល្អ និងពិការភ្នែកនេះ សព្វថ្ងៃរស់នៅក្នុងភូមិច្រេស ឃុំបឹងសាលាខាងត្បូង ស្រុកកំពង់ត្រាច ។ ស្ត្រីឈ្មោះ អ៊ៅ យ៉ន អាយុ ៦៣ឆ្នាំ បាននិយាយរៀបរាប់ថា គ្រួសារគាត់ទុក្ខត្រួតលើទុក្ខ កូនប្រុស ២នាក់ ម្នាក់ឈ្មោះ សុខ អុច អាយុ ៣៦ឆ្នាំ ធ្លាប់បួសជាសង្ឃ បានធ្លាក់ខ្លួនឈឺ ហើយក្លាយជាមនុស្សវង្វេងសតិ និងកូនប្រុសម្នាក់ទៀតឈ្មោះ សុខ ធា អាយុ ៣៤ឆ្នាំ ក៏សតិមិនល្អដែរ ។
កូនៗទាំង ២នាក់ សុទ្ធតែត្រូវបង្ខំចិត្តដាក់ច្រវាក់ជើងទាំង ២នាក់ ។ ម្នាក់ៗមិនក្រោម ១៥ឆ្នាំទៅ ២០ឆ្នាំនោះទេ ។ ប៉ុន្តែថ្មីៗនេះ ប្ដីរបស់គាត់ឈ្មោះ សុខ ភូ អាយុ ៦០ឆ្នាំ ទៅហើយក៏ឈឺដូចកូនៗដែរ ។ ស្ត្រីជាប្រពន្ធនិយាយទៀតថា កូនប្រុសទាំង ២នាក់ និងប្ដីសុទ្ធតែត្រូវដាក់ច្រវាក់ជើងដូចៗគ្នា ឱ្យនៅតែក្នុងផ្ទះ ។ រីឯខ្លួនគាត់ក៏ពិការភ្នែកទៀត ពឹងផ្អែកលើបងប្អូនអ្នកភូមិជួយជាអង្ករ ព្រោះលក់ដីយកលុយមើលកូនៗ និងប្ដីអស់ហើយ គ្មានអ្វីសល់ក្រៅពីសំបកខ្លួនឈឺរីងរៃនេះឡើយ ។
ស្ត្រីកម្សត់ពិការភ្នែករូបនេះ បាននិយាយគួរឲ្យអាណិតទៀតថា គាត់ទីទ័លពេកណាស់ យប់ឡើងដើរឆ្លុះរកខ្យង និងក្ដាមលក់ ដើម្បីទិញអង្ករចិញ្ចឹមកួនៗ និងប្ដី និងសងការប្រាក់ដែលជំពាក់គេ ៤លានរៀល ។ គ្រួសារគាត់បានទទួលប័ណ្ណក្រីក្រដែរ ដែលក្នុង ១ខែបើកបានជាង ១០ម៉ឺនរៀល បានរស់ទាំងមហាវេទនារហូតមក ៕
ចែករំលែកព័តមាននេះ