ចាប់បញ្ជូនជនជាតិថៃប្រព្រឹត្តអនឡាញស្គេមចំនួន៧៩នាក់ ត្រឡប់ទៅប្រទេសវិញ
- បន្ទាយមានជ័យ
ខេត្តបន្ទាយមានជ័យ ៖ ជនជាតិថៃប្រុស-ស្រីចំនួន៧៩នាក់ ដែលមកស្នាក់នៅក្នុងប្រទេសកម្ពុជា ប្រព្រឹតបទល្មើសអនឡាញ ស្គេម ត្រូវចាប់បញ្ជូនទៅប្រទេសខ្លួនវិញ នៅថ្ងៃទី១០ ខែកក្កដា ឆ្នាំ២០២៦ ។ នេះបើយោងតាមច្រកទ្វារព្រំដែនអន្តរជាតិប៉ោយប៉ែត ។
លោកឧត្ដមសេនីយ៍ត្រី អ៊ី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានដឹកនាំមន្ត្រីក្រោមឱវាទ សហការជាមួយកម្លាំងស្នាក់ការត្រៀមបណ្ដេញចេញខេត្តសៀមរាប នាយកដ្ឋានស៊ើបអង្កេត និងអនុវត្តនីតិវិជី អគ្គនាយកដ្ឋានអន្តោប្រវេសន៍ ដឹកនាំដោយលោកឧត្ដមសេនីយ៍ទោ យឿម ម៉ាន់ អនុប្រធាននាយកដ្ឋានស៊ើបអង្កេត និងអនុវត្តនីតិវិធី លោកឧត្ដមសេនីយ៍ត្រី អេង លីហួរ ស្នងការរងនៃស្នងការដ្ឋាននគរបាលខេត្តបន្ទាយមានជ័យ ដោយមានការចូលរួមពីអាជ្ញាធរដែនដី និងស្ថាប័នពាក់ព័ន្ធធ្វើការប្រគល់ទទួល និងបញ្ជូនចេញពីប្រទេសជនជាតិថៃ (ពាក់ព័ន្ធបទល្មើស Online Scams) ចំនួន៧៩នាក់ ក្នុងនោះ (ស្រី៣៤នាក់) ។
សមត្ថកិច្ចឱ្យដឹងថា បើទោះប្រទេសថៃបានបំពានដែនអធិបតេយ្យរបស់កម្ពុជា មិនទាន់ធូរស្បើយយ៉ាងណា ប៉ុន្តែខាងភាគីកម្ពុជាតែងតែយកចិត្តទុកដាក់ទៅលើជនជាតិថៃ ដែលលួចឆ្លងដែនខុសច្បាប់មកស្នាក់នៅប្រកបរបរកស៊ីខុសច្បាប់ ឬស្របច្បាប់យ៉ាងណាក៏ដោយ អាជ្ញាធរនិងសមត្ថកិច្ចព្យាយាមការពារយកចិត្តទុកដាក់លើបញ្ហាខាងលើនេះណាស់ ដូចជាចែកស្បៀងឱ្យហូប និងផ្ដល់ទឹកសុទ្ធជូនពួកគាត់ពិសារគ្រប់ៗគ្នា រួមទាំងថែរក្សាដឹកអ្នកជំងឺទៅព្យាបាលជាដើម មិនធ្វើទុកបុកម្នេញចំពោះជនជាតិថៃខាងលើនេះឡើយ ៕
ចែករំលែកព័តមាននេះ