កន្លងមកយើងឮតែម្នាក់ៗរអ៊ូរឿងសាំងឡើងថ្លៃ ប៉ុន្តែបើក្រឡេកមកមើលតម្លៃ ហ្គាស (LPG)វិញ អ្នករត់កង់បីឥណ្ឌាស្ទើរតែដាច់ខ្យល់បាត់ទៅហើយ ។ ខណៈពេលដែលការជជែកវែកញែក អំពីការឡើងថ្លៃនៃប្រេងសាំងកំពុងក្លាយជាប្រធានបទក្ដៅគគុក ក្រុមអ្នកប្រកបរបររត់ម៉ូតូកង់បីឥណ្ឌាដែលប្រើប្រាស់ហ្គាស (LPG)…
កន្លងមកយើងឮតែម្នាក់ៗរអ៊ូរឿងសាំងឡើងថ្លៃ ប៉ុន្តែបើក្រឡេកមកមើលតម្លៃ ហ្គាស (LPG)វិញ អ្នករត់កង់បីឥណ្ឌាស្ទើរតែដាច់ខ្យល់បាត់ទៅហើយ ។ ខណៈពេលដែលការជជែកវែកញែក អំពីការឡើងថ្លៃនៃប្រេងសាំងកំពុងក្លាយជាប្រធានបទក្ដៅគគុក ក្រុមអ្នកប្រកបរបររត់ម៉ូតូកង់បីឥណ្ឌាដែលប្រើប្រាស់ហ្គាស (LPG) ជាចម្បងកំពុងប្រឈមមុខនឹងវិបត្តិសេដ្ឋកិច្ចកាន់តែអាក្រក់ ដោយសារតម្លៃហ្គាស បានកើនឡើងរហូតដល់ជាងពីរដង បើធៀបនឹងតម្លៃកាលពីពេលមុន ។
តាមរយៈការអង្កេត និងការគណនាផ្អែកលើទិន្នន័យជាក់ស្ដែង នៅតាមស្ថានីយឥន្ធនៈបង្ហាញឱ្យឃើញនូវគម្លាតនៃការកើនឡើងដ៏គួរឱ្យព្រួយបារម្ភរវាងប្រភេទថាមពលទាំងពីរ ។ ចំពោះតួលេខនៃការប្រែប្រួល គឺប្រេងសាំងធម្មតា បានកើនឡើងពី៣,៨០០រៀល ដល់៥,៥០០រៀល ក្នុងមួយលីត្រ ដែលស្មើនឹងអត្រាកើនឡើង៤៤.៧៤% ។ ប៉ុន្តែហ្គាស (LPG) ដែលធ្លាប់មានតម្លៃត្រឹមតែ១,៨០០រៀល ពេលនេះបានហក់ឡើងដល់៣,៧០០រៀលក្នុងមួយលីត្រ ។ នេះ គឺជាការកើនឡើងដ៏វិលមុខរហូតដល់១០៥.៥៥% ពោល គឺឡើងថ្លៃជាងមុនលើសពី២ដង ។
បងប្អូនអ្នករត់ម៉ូតូកង់បីបានលើកឡើងថា ទោះបីជាពួកគេចំណាយលើការចាក់ហ្គាសច្រើនជាងមុនទ្វេដងក៏ដោយ ប៉ុន្តែប្រាក់ចំណូលដែលទទួលបានពីអតិថិជនមិនបានកើនឡើងតាមនោះទេ ។ ការប្រកួតប្រជែងតម្លៃ តាមរយៈកម្មវិធីទូរស័ព្ទ (App) និងការធ្លាក់ចុះនៃចំនួនអ្នកជិះដោយសារអតិផរណា បានធ្វើឱ្យជីវភាពប្រចាំថ្ងៃរបស់ពួកគេធ្លាក់ចូលក្នុងស្ថានភាពដុនដាប ។ «កាលពីមុន ចាក់ហ្គាសតែ១ម៉ឺនរៀល អាចរត់បានពេញមួយព្រឹក ប៉ុន្តែពេលនេះត្រូវចំណាយជិត២ម៉ឺនរៀល ។
ចំណេញបានមក គឺគ្រាន់តែទូទាត់ថ្លៃហ្គាស និងថ្លៃបាយ សឹងតែមិនសល់សម្រាប់បង់ធនាគារ ឬជួយគ្រួសារឡើយ» នេះ គឺជាសម្ដីរៀបរាប់របស់អ្នករត់កង់បីម្នាក់នៅរាជធានីភ្នំពេញ ។ អ្នកវិភាគសេដ្ឋកិច្ចសង្គមបានសង្កេតឃើញថា មហាជនភាគច្រើនផ្ដោតអារម្មណ៍តែលើតម្លៃសាំងធម្មតា ដោយភ្លេចគិតថា ហ្គាស ដែលជាប្រភពថាមពលសម្រាប់អ្នកចំណូលទាបបំផុត បែរជាមានអត្រាកើនឡើងខ្ពស់បំផុតទៅវិញ ។ ការកើនឡើង១០៥.៥៥%នេះ មិនមែនជាការកើនឡើងធម្មតាទេ ប៉ុន្តែវា គឺជាបន្ទុកសេដ្ឋកិច្ចដែលច្របាច់ជីវភាពអ្នកក្រីក្រឱ្យកាន់តែតូចចង្អៀត ។
សាធារណជន និងអ្នកប្រកបរបរដឹកជញ្ជូន សង្ឃឹមថា នឹងមានយន្តការអន្តរាគមន៍ណាមួយ ដើម្បីជួយសម្រួលដល់តម្លៃហ្គាស ឬការកំណត់គោលនយោបាយឧបត្ថម្ភធនណាមួយដល់អ្នករកស៊ីក្រៅប្រព័ន្ធ ដើម្បីធានាថាពួកគេអាចបន្តមុខរបរនេះទៅមុខទៀតបាន៕
ចែករំលែកព័តមាននេះ