ទីក្រុងឡុង៖ ជំងឺរលាកស្រោមខួរដ៏ស្រួចស្រាល់កំពុងបង្កការភ័យខ្លាចនៅអង់គ្លេសបន្ទាប់ពីមនុស្ស២នាក់ (ម្នាក់ជានិស្សិតសាកលវិទ្យាល័យ និងម្នាក់ទៀតជាសិស្សថ្នាក់វិទ្យាល័យ) ទើបតែទទួលអនិច្ចកម្មកាលពីពេលថ្មីៗនេះបន្ទាប់ពីជំងឺនេះចាប់ផ្ដើមរាតត្បាតនៅតំបន់ខឹន (Kent)។ ទីភ្នាក់ងារសុខាភិបាលអង់គ្លេស UKHSA ថ្លែងថាខ្លួនទទួលបានរបាយការណ៍ថាមានករណីអ្នកឆ្លងជំងឺនេះចំនួន១៣នាក់នៅទីក្រុងខេនថឺប៊ូរី (Canterbury) ចាប់ពីថ្ងៃសុក្រដល់ថ្ងៃសៅរ៍សប្ដាហ៍មុន។ ក្នុងនោះ ២នាក់បានស្លាប់ដូចរៀបរាប់ខាងលើ។
សាកលវិទ្យាល័យខេនទទួលស្គាល់ថាអ្នកស្លាប់ម្នាក់ជានិស្សិតសាកលវិទ្យាល័យ។ ចំណែកលោកស្រីហេឡិន វេតលី (Helen Whately) ជាអ្នកតំណាងរាស្ត្រអះអាងថាម្នាក់ទៀតជាសិស្សវិទ្យាល័យ Faversham។ លោកស្រីបានបង្ហោះសារនៅលើហ្វេសប៊ុកថា «ការរាតត្បាតនៃជំងឺរលាកស្រោមខួរកំពុងបង្កការភ្ញាក់ផ្អើលយ៉ាងខ្លាំងនៅក្នុងសហគមន៍របស់យើង។ លោកស្រីមានអារម្មណ៍សោកស្ដាយរកអ្វីប្រៀបផ្ទឹមពុំបាន ហើយលោកស្រីសូមចូលរួមរំលែកមរណទុក្ខជាមួយក្រុមគ្រួសារជនរងគ្រោះ»។
សិស្ស និងនិស្សិតនៅតំបន់ខេនថឺប៊ូរី (Canterbury) កំពុងសម្រុកទៅចាក់វ៉ាក់សាំង។ ក្រុមអ្នកជំនាញព្រមានថាការផ្ទុះឡើងនូវជំងឺនេះអាចជាប់ពាក់ព័ន្ធនឹងជំងឺរលាកស្រោមខួរប្រភេទថ្មី។ គេគិតថាក្លឹបកម្សាន្តមួយកន្លែងដែលអាចផ្ទុកមនុស្សបាន១៦០០នាក់ និងដែលក្រុមសិស្ស-និស្សិតឧស្សាហ៍ចេញ-ចូល អាចជាកន្លែងចាប់ផ្ដើមនៃការផ្ទុះជំងឺនេះ។ ឥឡូវនេះ អាជ្ញាធរសុខាភិបាលបានទាក់ទងទៅមនុស្សជាងបីម៉ឺននាក់ដើម្បីពិនិត្យមើលសុខភាព។ សូមជម្រាបថាជំងឺរលាកស្រោមខួរប្រភេទថ្មីនេះគឺផ្គួបគ្នាទាំងរលាកស្រោមខួរផង និងជំងឺពុលឈាមម៉្យាងផងដែរ (Septicemia)។
រោគសញ្ញានៃជំងឺនេះមានដូចជាឡើងកម្ដៅក្នុងខ្លួនខ្លាំង, ឈឺក្បាលធ្ងន់ធ្ងរ, រឹងក, ក្អួតវ៉កៗ និងចាញ់ពន្លឺ។ និស្សិតម្នាក់ឈ្មោះស្ទីវវឹន (Steven) អាយុ១៨ឆ្នាំរៀននៅសាកលវិទ្យាល័យ Canterbury Christchurch University ប្រាប់ថាអាជ្ញាធរបានសួរនាំនិស្សិតថាតើពួកគេប្រាស្រ័យទាក់ទងគ្នានៅកៀកៗគ្នាដែរឬទេ។ និស្សិតច្បាប់រូបនេះប្រាប់ថាគាត់ទើបតែចូលក្លិបខាងលើនេះចំនួន២ដងត្រឹមតែរយៈពេល២សប្ដាហ៍ប៉ុណ្ណោះ។
ស្ទីវវឹនប្រាប់ថានារីម្នាក់ដែលទៅជាមួយគាត់ដើម្បីចាក់ថ្នាំអង់ទីប៊ីយ៉ូទិចកាលពីមុននោះបានធ្វើធ្វើតេស្តឃើញថានាងបានឆ្លងជំងឺនេះចូលទៅក្នុងខ្លួនរួចហើយ។ ដូចនេះ គាត់ប្រាប់ថាគាត់ត្រូវការចាក់ថ្នាំអង់ទីប៊ីយ៉ូទិចជាប្រញាប់។ ប៉ុន្តែដំណើរការផ្ដល់ថ្នាំនេះមានភាពយឺតយ៉ាវ។ រហូតមកដល់ពេលនេះ គាត់មិនទាន់បានចាក់ថ្នាំនៅឡើយទេ។ លោកអេនឌ្រូ ប្រេះស្តុន (Andrew Preston) ជាគ្រូបង្រៀនមីក្រុបវិទ្យានៅសាកលវិទ្យាល័យបាស (University of Bath) យល់ថាការរីករាលដាលនៃជំងឺរលាកស្រោមខួរប្រភេទថ្មីនេះហាក់មានសភាពខុសពីធម្មតា៕ ប្រភព៖ The Independent, The Sun
ចែករំលែកព័តមាននេះ