រាជធានីភ្នំពេញ ៖ តារាចម្រៀងអ្នកនាង សួស វីសា បានចេញមុខប្រកាសក្តែងៗជាសាធារណៈថា នាងកំពុងស្ថិតក្នុងការពិចារណាថា តើត្រូវបន្តអាជីពសិល្បៈចម្រៀងទៀតឬក៏អត់ បន្ទាប់ពីនាងបានអវត្តមានពីវិស័យមួយនេះអស់រយៈពេលជាង១ឆ្នាំមកនេះ ។…
រាជធានីភ្នំពេញ ៖ តារាចម្រៀងអ្នកនាង សួស វីសា បានចេញមុខប្រកាសក្តែងៗជាសាធារណៈថា នាងកំពុងស្ថិតក្នុងការពិចារណាថា តើត្រូវបន្តអាជីពសិល្បៈចម្រៀងទៀតឬក៏អត់ បន្ទាប់ពីនាងបានអវត្តមានពីវិស័យមួយនេះអស់រយៈពេលជាង១ឆ្នាំមកនេះ ។
តារាចម្រៀងរូបនេះបានលើកយកមូលហេតុសំខាន់ចំនួន៣ ដើម្បីឈានទៅដល់ការបញ្ចប់អាជីពសិល្បៈរបស់នាង ដោយនៅក្នុងនោះ មានចំណុចមួយដែលសំខាន់ គឺមិនមានកម្លាំងចិត្តចំពោះអាជីពមួយនេះ ។
តាមរយៈសំណេរបង្ហោះលើបណ្តាញសង្គម តារាចម្រៀងអ្នកនាង សួស វីសា បានលើកឡើងថា ខានប្រឡូកវិសយ័ចំរៀងជាង1ឆ្នាំហើយ គឺព្រោះតែរវល់🤰រួចហើយរវល់មើលថែកូន តែពេលនេះកំពុងគិតថា គួរវិលត្រឡប់ទៅវិញ ឬក៏គួរតែបញ្ចប់តែម្តង?😶🌫 ។
នាងបញ្ជាក់ថា មូលហេតុដែលនាងអាចនឹងបញ្ចប់អាជីពសិល្បៈនោះ គឺ១-លែងស្អាត ២-ចាស់ ៣-អត់កំលាំងចិត្ត ។
យ៉ាងណាក៏ដោយ បន្ទាប់ពីបានឃើញ សួស វីសា បានបង្ហោះសំណេរខាងលើនេះ គេឃើញមានមហាជន ជាពិសេស បណ្តាអ្នកគាំទ្ររូបនាងជាច្រើនរូប បាននាំគ្នាចូលទៅខមមិន ដោយម្នាក់ៗមិនចង់ឲ្យរូបនាងបញ្ចប់អាជីពចម្រៀងនាពេលនេះឡើយ ដោយសារតែនាងមានទឹកដមសំឡេងពីរោះ ខណៈពេលដែលបទចម្រៀងរបស់នាង ក៏មានការនិយមគាំទ្រច្រើនផងដែរ ។
គួរបញ្ជាក់ថា តារាចម្រៀងអ្នកនាង សួស វីសា បានខកខានមិនបានឡើងឆាកតន្ត្រី និងចេញបទចម្រៀងថ្មីបន្ថែមទៀត បន្ទាប់ពីនាងមានបញ្ហាបំពង់ក ក្នុងពេលដែលនាងមានគ្រួសារ និងងាកមកបើកអាជីវកម្មផ្ទាល់ខ្លួន ។
អ្នកនាង សួស វីសា ធ្លាប់បានបានលើកឡើងថា ខ្លួនពិតជាអន់ចិត្ត និងបាក់ទឹកចិត្តខ្លាំង ក្រោយមានបញ្ហាខូចបំពង់សំឡេង ដែលស្ទើរធ្វើឲ្យអ្នកនាងសឹងតែក្លាយជាមនុស្សខូចសតិអារម្មណ៍ ព្រោះត្រូវបាត់បង់សំឡេងដែលអាចច្រៀងពីរោះ និងតុងខ្ពស់ថែមទៀត។
ដោយសារតែបញ្ហាមួយនេះ បានធ្វើឱ្យអ្នកនាងបាត់បង់ការងារជាច្រើន ទាំងការងារច្រៀង ការងារលក់ផលិតផល ។ តារាចម្រៀងស្រីរូបនេះបានបន្ថែមថា បញ្ហាខូចបំពង់សំឡេងនេះ កើតឡើងនៅពេលអ្នកនាងឆ្លងជំងឺកូវីដ និងប្រឹងប្រែងនិយាយស្រែកខ្លាំងៗនៅពេល Live លក់ផលិតផល។
អ្នកនាងថា ខ្លួននាងផ្ទាល់ក៏បានមិនបានយកចិត្តទុកចំពោះបញ្ហាសួតដែលមានស្លេសច្រើន លុះនៅពេល Live ដោយសារតែប្រឹងនិយាយខ្លាំងពេក ទើបបណ្ដាលឱ្យស្លេសធ្លាក់ចូលបំពង់សំឡេង ហើយបង្ករោគរលាក និងបណ្ដាលឱ្យធ្ងន់ធ្ងរបែបនេះ។
យ៉ាងណា អ្នកនាងបានសម្រេចចិត្តទៅព្យាបាលជំងឺ (ខូចបំពង់សំឡេង) នៅប្រទេសក្រៅដោយអ្នកនាងរំពឹង ការជ្រើសរើសព្យាបាលជាមួយវិជ្ជបណ្ឌិតជំនាញនៅទីនោះ គឺអាចធ្វើឱ្យបំពង់សំឡេងអ្នកនាងបានធូរសះស្បើយដូចធម្មតា និងវិលមករកសំឡេងពីរោះឡើងវិញ។
ទោះជាយ៉ាងណា ក្នុងពេលដែលជំងឺបានធូរស្បើយនោះ រហូតមកទល់នាពេលនេះ សួស វីសា នៅមិនទាន់វិលឆាកតន្ត្រី និងចេញបទចម្រៀងថ្មីៗបន្ថែមទៀតនៅឡើយទេ ក្នុងពេលដែលអ្នកគាំទ្ររបស់នាងកំពុងរង់ចាំយ៉ាងអន្ទះសារ ៕
ចែករំលែកព័តមាននេះ