រាជធានីភ្នំពេញ ៖ តារាចម្រៀងលោក ខេមរៈ សិរីមន្ត បានធ្វើការឆ្លើយតបភ្លាមៗ ទៅកាន់ម្ចាស់គណនេយ្យហ្វេសប៊ុកមួយរូប ជុំវិញការរិះគន់ជាមួយនឹងការប្រើពាក្យសម្តីបែបលេបខាយមិនល្អ ទៅលើសកម្មភាពច្រៀងសម្តែងរបស់លោកនៅលើឆាកតន្ត្រីមួយកាលពីពេលថ្មីៗនេះ ។…
រាជធានីភ្នំពេញ ៖ តារាចម្រៀងលោក ខេមរៈ សិរីមន្ត បានធ្វើការឆ្លើយតបភ្លាមៗ ទៅកាន់ម្ចាស់គណនេយ្យហ្វេសប៊ុកមួយរូប ជុំវិញការរិះគន់ជាមួយនឹងការប្រើពាក្យសម្តីបែបលេបខាយមិនល្អ ទៅលើសកម្មភាពច្រៀងសម្តែងរបស់លោកនៅលើឆាកតន្ត្រីមួយកាលពីពេលថ្មីៗនេះ ។
ម្ចាស់គណនេយ្យមួយដែលមានឈ្មោះ Phan Phana បានធ្វើការរិះគន់ដោយប្រើពាក្យថា ធ្វើអ្វីមិនច្រឡំគេ គេថា គេហើយ ទៅលើរូបភាពវីដេអូសម្តែងរបស់តារាចម្រៀងលោក ខេមរៈ សិរីមន្ត ដែលបានរៀបចំស្ទាយដោយលោកអង្គុយនៅលើកៅអីធំមួយ ហើយរុញឡើងមកលើកឆាកតន្ត្រីដោយមានអ្នករាំអមឆាកផងដែរ ។
យ៉ាងណា ចំពោះការរិះគន់ពីសំណាក់ម្ចាស់គណនេយ្យហ្វេសប៊ុកមួយនេះ ត្រូវបានតារាចម្រៀងលោក ខេមរៈ សិរីមន្ត បានធ្វើការឆ្លើយតប ដោយលោកបានចាត់ទុកថា ការរិះគន់នេះមកលើរូបលោក គឺជាការមិនទាន់យល់ច្បាស់ពីសិល្បៈនៃការច្នៃប្រឌិត ខណៈពេលដែលលោកតែងតែរកគំនិតច្នៃប្រឌិតថ្មីសម្រាប់អ្នកគាំទ្រ ក្នុងដំណើរអាជីពសិល្បៈរបស់លោកជាង២០ឆ្នាំមកនេះ ។
តាមរយៈសំណេរដែលបានបង្ហោះលើបណ្តាញសង្គមតារាចម្រៀងលោក ខេមរៈ សិរីមន្ត បានលើកឡើងថា ជំរាបសួរបងសិល្បៈ គឺជាជំនាញរបស់ខ្ញុំជាង២០ឆ្នាំមកហើយសិល្បៈ គឺជាការច្នៃប្រឌិត ដើម្បីកុំឲ្យអ្នកគាំទ្រមានការធុញទ្រាន់ ប៉ុន្តែបើបងគិតថា បងចេះជាងខ្ញុំ ខ្ញុំធ្វើទៅមិនត្រូវ សូមបងមកធ្វើខ្លួនឯងចុះ ហើយធ្វើយ៉ាងណាឲ្យមានប្រជាប្រិយភាពឱ្យខ្លាំងខ្ញុំចាំគាំទ្របងដែរ ប៉ុន្តែតាមមើលទៅ បងដូចជាចេះគ្រប់រឿងពេកហើយ រឿងអ្វីក៏បងចេះលើសគេដែរ ។ លោកបញ្ជាក់ថា តែអាចទេ ជំនាញសិល្បៈឱ្យខ្ញុំចេះជាងបងបន្តិចទៅបានទេ ។
យ៉ាងណា ក្រោយឃើញសារឆ្លើយតបពីសំណាក់លោកខេមរៈ សិរីមន្ត ទៅលើម្ចាស់គណនេយ្យខាងលើនេះ គេឃើញមានមហាជន ជាពិសេស បណ្តាអ្នកគាំទ្ររូបលោកជាច្រើនបានចូលទៅធ្វើការខមមិន ដោយម្នាក់ៗបានស្នើឲ្យតារាចម្រៀងរូបនេះ កុំចាប់អារម្មណ៍ច្រើនចំពោះបុររូបនេះ ដ្បិតបុរសខាងលើ គេតែងតែដើរតួប្រឆាំងស្ទើរតែគ្រប់រឿងទាំងអស់ ។
ពួកគេបញ្ជាក់ថា បុរសរូបនេះ គឺតាំងខ្លួនជាអ្នកនយោបាយប្រឆាំង ចំណែកលោកខេមរៈ សិរីមន្ត គឺជាអ្នកសិល្បៈ គឺមិនដូចគ្នា ឬពាក់ព័ន្ធគ្នាឡើយ ខណៈពេលដែលពួកគេនៅតែគាំទ្រចំពោះការច្នៃប្រឌិតបែបសិល្បៈពីតារាចម្រៀងរូបនេះជានិច្ច ៕
ចែករំលែកព័តមាននេះ