រាជធានីភ្នំពេញ ៖ អតីតតារាចម្រៀងអ្នកនាង ម៉ៅ ស៊ីណាត បានបញ្ជាក់ពីមូលហេតុសំខាន់មួយដែលនាំឲ្យនាងខកខានបាត់មុខក្នុងវិស័យសិល្បៈអស់ជាច្រើនឆ្នាំ ចុងក្រោយ បើទោះបីជាបច្ចុប្បន្ន អ្នកនាងនៅតែអាចបន្តអាជីពមួយនេះបានដដែលក៏ដោយ ។…
រាជធានីភ្នំពេញ ៖ អតីតតារាចម្រៀងអ្នកនាង ម៉ៅ ស៊ីណាត បានបញ្ជាក់ពីមូលហេតុសំខាន់មួយដែលនាំឲ្យនាងខកខានបាត់មុខក្នុងវិស័យសិល្បៈអស់ជាច្រើនឆ្នាំ ចុងក្រោយ បើទោះបីជាបច្ចុប្បន្ន អ្នកនាងនៅតែអាចបន្តអាជីពមួយនេះបានដដែលក៏ដោយ ។
មូលហេតុនោះ ត្រូវបានអ្នកនាងបញ្ជាក់ថា ការអន់ចិត្តចំពោះវិស័យមួយនេះ បានធ្វើឲ្យអ្នកនាងសម្រេចចិត្តមិនបន្តអាជីពសិល្បៈចម្រៀងបន្តទៀត ខណៈពេលដែលការរស់នៅប្រចាំថ្ងៃក៏អ្នកនាងកម្រនឹងច្រៀងលេងដែរ ។
តាមរយៈវីដេអូខ្លីមួយដែលបង្ហោះតាមបណ្តាញសង្គម អ្នកនាង ម៉ៅ ស៊ីណាត បានលើកឡើងថា តាមសមត្ថភាពរបស់នាងនៅអាចច្រៀងបាន គ្រាន់តែពេលនេះ នាងមិនចង់ច្រៀង សូម្បីតែច្រៀងនៅក្នុងផ្ទះ ក៏អ្នកនាងមិនចង់ច្រៀងដែរ ។
អ្នកនាងថា សួរថា មានមូលហេតុអ្វី គឺមានអារម្មណ៍ថា អន់ចិត្តក្នុងវិស័យមួយនឹង និយាយដោយត្រង់ ហើយក៏អត់ចង់ច្រៀង ច្រៀងបានរាំបាន អត់មានបញ្ហា គ្រាន់តែអន់ចិត្ត ហើយភាពអន់ចិត្តនេះនាំឲ្យអស់អារម្មណ៍ អ្វីក៏ដោយបើវាអស់ចិត្តហើយ គឺចប់ ។
នាងបន្តថា ភ្លេចអស់ហើយបទចម្រៀង កាលពីនៅចូលចិត្តច្រៀង សូម្បីតែប្តីខ្លួនក៏មិនហ៊ានមកបញ្ចប់ការងារច្រៀងនេះដែរ តែអស់អារម្មណ៍ខ្លួនឯង ទោះទៅលក់ត្រកួនក៏បានអត់បញ្ហា ។
យ៉ាងណាក៏ដោយ សម្រាប់ការអន់ចិត្តចំពោះវិស័យមួយពីសំណាក់អ្នកនាង ម៉ៅ ស៊ីណាត គឺមិនត្រូវបានអ្នកនាងបញ្ជាក់ឲ្យបានច្បាស់លាស់ថា ជារឿងអ្វីដែរ ប៉ុន្តែនៅតែអរគុណសម្រាប់មហាជនមួយចំនួនដែលនៅតែគាំទ្រ និងលើកទឹកចិត្តឲ្យនាងបន្តអាជីពសិល្បៈមួយនេះ ។
ជាការកត់សម្គាល់ កន្លងមក អ្នកនាង ម៉ៅ ស៊ីណាត ធ្លាប់បានលើកឡើងប្រាប់បណ្តាញសារព័ត៌ មានក្នុងស្រុកមួយថា សង្គមសិល្បៈមួយនេះ ពោរពេញដោយបក្សពួកនិយមខណៈនាងផ្ទាល់ ក៏មិនហ៊ានបង្ខំនរណាម្នាក់ឱ្យលើកស្ទួយសិល្បករចាស់ ឬខ្លួនឯងផ្ទាល់ដែលកំពុងធ្លាក់ខ្លួនដែរ ។
អ្នកនាងបន្ថែមថា ការងារសិល្បៈបច្ចុប្បន្ន ពោរពេញដោយបក្សពួកនិយម និងមិនថាបច្ចុប្បន្ន ឬកន្លងមក ឱ្យតែពេលសិល្បកររូបណារៀបការ ឬដល់វ័យរៀងជ្រេរដឹងតែធ្លាក់កូដ ឬអាចនិយាយបានថា មិនសូវសំបូរការងារធ្វើដូចមុនឡើយ។
អ្នកនាងបញ្ជាក់ថា ការនិយាយបែបនេះ មិនមែនខ្លួនស្អប់ការងារសិល្បៈទេ គឺស្រឡាញ់ទើបបន្តដល់បច្ចុប្បន្ន ហើយអាជីពសិល្បៈនេះ បានផ្តល់កិត្តិយស និងការងារមកដល់នាង តែមិនបានធ្វើឱ្យនាងមានបានអ្វីជាដុំកំភួនទេ ។
គួរបញ្ជាក់ថា បន្ទាប់ពីឃ្លាតខ្លួនពីអាជីពសិល្បៈអ្នកនាង ម៉ៅ ស៊ីណាត បានចាប់អាជីពថ្មី គឺរបរលក់សម្លៀកបំពាក់តាមអនឡាញ ខណៈពេលដែលអ្នកនាងតែងតែបង្ហាញសកម្មភាពនានាស្ទើរមិនដាច់តាមរយៈបណ្តាញសង្គម ៕
ចែករំលែកព័តមាននេះ