រាជធានីភ្នំពេញ ៖ អតីតតារាសម្តែងអ្នកនាង សឿ សុធារ៉ា បានបង្ហាញក្តីរំពឹងថា កូនស្រីតែមួយរបស់នាង ដែលកំពុងប្រឹងប្រែងសិក្សានាពេលបច្ចុប្បន្ននេះ នឹងចាប់យកជំនាញពេទ្យ ឬក៏ផ្នែកឱសថនាពេលអនាគត…
រាជធានីភ្នំពេញ ៖ អតីតតារាសម្តែងអ្នកនាង សឿ សុធារ៉ា បានបង្ហាញក្តីរំពឹងថា កូនស្រីតែមួយរបស់នាង ដែលកំពុងប្រឹងប្រែងសិក្សានាពេលបច្ចុប្បន្ននេះ នឹងចាប់យកជំនាញពេទ្យ ឬក៏ផ្នែកឱសថនាពេលអនាគត ខណៈពេលដែលនាងចាត់ទុកជំនាញមួយនេះសំខាន់ដែលអាចស្រោចស្រង់ជីវិតមនុស្សទូទៅ ។
ការដាក់គោលដៅចង់ឲ្យកូនស្រីចាប់ជំនាញជាគ្រូពេទ្យពីសំណាក់អ្នកនាង សឿ សុធារ៉ា នាពេលនេះ គឺដោយនាងបានភ្ជាប់ជាមួយនឹងការទទួលមរណៈភាពដោយសារជំងឺរបស់ឪពុកម្តាយ និងបងស្រីរបស់នាង ដែលនេះជារឿងសោកសៅបំផុត សម្រាប់អ្នកនាងដែលបានបាត់បង់សមាជិកគ្រួសារជាបន្តបន្ទាប់ដល់ទៅ៣នាក់ក្នុងរយៈពេលតែ២ឆ្នាំប៉ុណ្ណោះ ។
សឿ សុធារ៉ា បានបញ្ជាក់តាមរយៈសំណេរបង្ហោះលើបណ្តាញសង្គមថា ពិមានកូនម៉ាក់ កូនត្រូវតែខំរៀន បើអាចកូនចាប់យកជំនាញពេទ្យ ឬផ្នែកឱសថក៏បាន ព្រោះម៉ាក់យំនឹកអាណិតអ៊ីធារីទាំងយប់ ទាំងថ្ងៃ កូនអាចធ្វើអំពើល្អដ៏ពេញទៅដោយបុណ្យបរិបូរណ៍បំផុត គឺជួយស្រោចស្រង់ជីវិតមនុស្សទូទៅពីជំងឺនានាផង ។
យ៉ាងណា ក្រោយឃើញការបង្ហោះសំណេរខាងលើ ពីសំណាក់អ្នកនាង សឿ សុធារ៉ា នាពេលនេះ គេបានឃើញមានមហាជន និងមិត្តភក្តិរបស់នាងក៏បានចូលទៅខមមិនដោយម្នាក់ៗបានជូនពរទៅកាន់កូនស្រីរបស់នាងឲ្យសមតាមបំណង និងមានអនាគតល្អ ។
គួរបញ្ជាក់ថា បន្ទាប់ពីចែកផ្លូវគ្នាជាមួយតារាចម្រៀងលោក សាពូន មីដាដា មក អតីតតារាសម្តែងអ្នកនាង សឿ សុធារ៉ា បានទទួលរ៉ាប់រងបីបាច់ថែរក្សាកូនប្រុសស្រីរបស់ខ្លួនចំនួន២នាក់ ក្នុងស្ថានភាពជីវភាពដ៏លំបាក ។
ដោយសារឃើញជីវភាពរបស់នាងមានការលំបាកនោះ កន្លងមក គេឃើញមានសប្បុរសជន ជាពិសេស បណ្តាអ្នកសិល្បៈដូចគ្នា បាននាំគ្នាចូលរួមជួយឧបត្ថម្ភដល់ សឿ សុធារ៉ា ជាបន្តបន្ទាប់ ហើយជាពិសេសនោះ កូនៗទាំង២របស់នាងក៏បានទទួលអាហារូបករណ៍១០០%ពីលោកបណ្ឌិត លី ឆេង អគ្គនាយកប៊ែលធី គ្រុប ដើម្បីសិក្សានៅសាលាប៊ែលធី អន្តរជាតិទាំងថ្នាក់ចំណេះទូទៅ និងភាសាអង់គ្លេសទូទៅរហូតដល់បញ្ចប់ថ្នាក់ទី១២ ។
បច្ចុប្បន្ន កូនស្រីរបស់អ្នកនាង សឿ សុធារ៉ា បានចម្រើនវ័យកាន់តែធំ និងមានរូបសម្រស់ស្រស់ស្អាត ហើយជាពិសេសទៀតនោះ កូនស្រីរបស់នាង ឈ្មោះ សាពូន ដារ៉ាភិមាន ក៏មានដុងលើវិស័យសិល្បៈដូចទៅនឹងឪពុកម្តាយផងដែរ ។
កន្លងមក កូនស្រីរបស់តារាសម្តែងរូបនេះ ក៏ធ្លាប់បញ្ចេញសមត្ថភាពអាចលេងហ្គីតា និងច្រៀងបទរបស់លោកសាពូន មីដាដា ជាឪពុកបានយ៉ាងល្អ ខណៈពេលដែលកូនស្រីរបស់នាងក៏ធ្លាប់បានចូលប្រឡូកនៅក្នុងការសម្តែងភាពយន្តផងដែរ ។
យ៉ាងណា បើទោះបីជាកូនស្រីមានដុងលើសិល្បៈនេះក៏ដោយ ប៉ុន្តែកន្លងមក ក្នុងនាមជាឪពុកលោក សាពូន មីដាដា បានបង្ហាញបំណងមិនចង់ឲ្យកូនស្រីប្រឡូកក្នុងវិស័យនេះឡើយ ខណៈពេលដែលអ្នកនាង សឿ សុធារ៉ា បានបង្ហាញបំណងផ្ទុយ ពោលនាងក៏ជម្រុញ និងចង់ឲ្យកូនស្រីប្រឡូកក្នុងវិស័យសិល្បៈ ៕
ចែករំលែកព័តមាននេះ